រដ្ឋមន្រ្តី៖ ចាប់ពីថ្ងៃទី១៥មិថុនា អ្នកបើកឡានដឹកទំនិញ គ្មានបណ្ណបើកបរ មិនអនុញ្ញតឱ្យចេញពីកំពង់ផែឡើយ

2019-06-13 07:06:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានប្រកាសថា ចាប់ពីថ្ងៃទី១៥ ខែមិថុនា ឆ្នាំ២០១៩តទៅ អ្នកបើករថយន្តដឹកទំនិញដែលគ្មានបណ្ណបើកបរ នឹងមិនត្រូវបានអនុញ្ញាតឱ្យបើករថយន្តចេញពីកំពង់ផែឡើយ ដើម្បីកាត់បន្ថយគ្រោះថ្នាក់ចរាចរណ៍។ លោកថ្លែងដូច្នេះទៅកាន់អ្នកកាសែត ក្នុងអំឡុងពេលចុះត្រួតពិនិត្យស្ថានភាពផ្លូវជាតិលេខ៣ នាថ្ងៃទី១៣ ខែមិថុនា ឆ្នាំ២០១៩នេះ។

លោក ស៊ុន ចាន់ថុល ថ្លែងនាពេលកន្លងមក

លោករដ្ឋមន្រ្តីបានបញ្ជាក់យ៉ាងដូច្នេះថា៖ «**ចាប់ពីថ្ងៃ១៥នេះទៅ នឹងអនុវត្តចាប់ត្រួតពិនិត្យរថយន្តដឹកទំនិញចេញពីកំពង់ផែក្រុងភ្នំពេញ និងកំពង់ផែស្វយ័តក្រុងព្រះសីហនុ។ ទី១ អ្នកបើកបរ មានបណ្ណបើកបរត្រឹមត្រូវឬក៏គ្មាន។ បើគ្មានបណ្ណបើកបរត្រឹមត្រូវទេ យើងខ្ញុំមិនឱ្យឡានហ្នឹងចេញពីកំពង់ផែស្វយ័តក្រុងព្រះសីហនុ ឬកំពង់ផែស្វយ័តក្រុងភ្នំពេញទេ។ ទី២ ឡានគ្មានលក្ខណៈបច្ចេកទេសត្រឹមត្រូវ ឆៀកអត់បានត្រឹមត្រូវ អត់ឱ្យឡានហ្នឹងចេញទេ** (**ចេញពីកំពង់ផែ**)»។

ជាមួយគ្នានេះ លោក ស៊ុន ចាន់ថុល ក៏បានអំពាវនាវឱ្យក្រុមហ៊ុនរកស៊ីដឹកជញ្ជូនទាំងអស់ ត្រួតពិនិត្យបណ្ណបើកបរលើអ្នកបើកបររថយន្តរបស់ខ្លួនឱ្យហើយ ដើម្បីជៀសវាងការខាតបង់ពេលវេលា ក្នុងការដឹកជញ្ជូនទំនិញ ដោយសារការកកស្ទះនៅកំពង់ផែ ព្រមទាំងយករថយន្តទៅឆៀកឱ្យបានត្រឹមត្រូវផងដែរ៕

អត្ថបទ៖ សំភី