EU ផ្តល់ជំនួយឥតសំណង និងកម្ចី ជាង១ពាន់លានដុល្លារ ដើម្បីអនុវត្តយុទ្ធសាស្រ្តអភិវឌ្ឍន៍កម្ពុជាឆ្នាំ២០១៤-២០១៩

2019-06-13 09:26:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងអំឡុងពេលនៃការអនុវត្តយុទ្ធសាស្រ្តរួមរបស់អឺរ៉ុបស្តីពីកិច្ចសហប្រតិបត្តិការអភិវឌ្ឍន៍សម្រាប់កម្ពុជា ឆ្នាំ២០១៤-២០១៩ ដៃគូអឺរ៉ុប បានបើកផ្តល់ហិរញ្ញប្បទានសរុបប្រមាណ ១១៣០លានដុល្លារ (១,១៣ពាន់លានដុល្លារ)។ ក្នុងនោះហិរញ្ញប្បទានឥតសំណងប្រមាណ ៨១៨លានដុល្លារ និងឥណទានសម្បទានប្រមាណ ៣១១លានដុល្លារ។ នេះបើតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១២ ខែមិថុនា ឆ្នាំ២០១៩ ស្តីពីជំនួបរវាងលោក ឈៀង យ៉ាណារ៉ា រដ្ឋមន្រ្តីប្រតិភូអមនាយករដ្ឋមន្រ្តី អគ្គលេខាធិការគណៈកម្មាធិការនីតិសម្បទា និងអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា និងលោក George Edgar ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា។

រូបថត៖ ក្រុមប្រឹក្សាអភិវឌ្ឍន៍កម្ពុជា

យុទ្ធសាស្រ្តនេះ ត្រូវបានដាក់ឱ្យអនុវត្តជាផ្លូវការកាលពីខែវិច្ឆិកា ឆ្នាំ២០១៤ ដោយផ្តោតលើអាទិភាពចំនួន៥ គឺ ១. វិស័យអភិបាលកិច្ច, ២. ការជំរុញកំណើនសេដ្ឋកិច្ចប្រកបដោយសមធម៌, ៣. ការអភិវឌ្ឍហេដ្ឋារចនាសម្ព័ន្ធរូបវ័ន្ត, ៤. ការបណ្តុះបណ្តាលវិជ្ជាជីវៈ និងបង្កើតការងារ និង៥. ការអភិវឌ្ឍធនធានមនុស្ស។

សូមជម្រាបថា ជំនួបខាងលើនេះ គឺធ្វើឡើងដើម្បីពិភាក្សាអំពីការត្រៀមរៀបចំយុទ្ធសាស្រ្តរួមថ្មីរបស់សហភាពអឺរ៉ុបស្តីពីកិច្ចសហប្រតិបត្តិការអភិវឌ្ឍន៍សម្រាប់កម្ពុជា ក៏ដូចជាពិភាក្សា និងផ្លាស់ប្តូរយោបល់លើបញ្ហាប្រឈម និងវិស័យអាទិភាពរបស់កម្ពុជា សម្រាប់រយៈពេលមធ្យម ៧ ទៅ ១០ឆ្នាំ ពិសេសក្នុងបរិបទនៃការអនុវត្តគោលដៅអភិវឌ្ឍន៍ប្រកបដោយចីរភាពកម្ពុជា និងការចាកចេញពីក្រុមប្រទេសមានការអភិវឌ្ឍតិចតួច។

បើតាមសេចក្តីប្រកាសដដែលឱ្យដឹងថា យុទ្ធសាស្រ្តរួមថ្មីរបស់អឺរ៉ុប ស្តីពីកិច្ចសហប្រតិបត្តិការអភិវឌ្ឍន៍សម្រាប់កម្ពុជា នឹងបន្តអនុវត្ត និងពង្រឹងបន្ថែមទៅលើភាពជោគជ័យដែលសម្រេចបានដោយយុទ្ធសាស្រ្តអឺរ៉ុបឆ្នាំ២០១៤-២០១៩។ យុទ្ធសាស្រ្តនេះ នឹងត្រូវរៀបចំឡើងដោយមានសង្គតិភាពជាមួយនឹងផែនការ និងយុទ្ធសាស្រ្តអភិវឌ្ឍន៍ជាតិរបស់រាជរដ្ឋាភិបាលកម្ពុជា រួមមាន៖ យុទ្ធសាស្រ្តចតុកោណដំណាក់កាលទី៤ ផែនការយុទ្ធសាស្រ្តអភិវឌ្ឍន៍ជាតិឆ្នាំ២០១៩-២០២៣, ក្របខណ្ឌគោលដៅអភិវឌ្ឍន៍ ប្រកបដោយចីរភាពកម្ពុជា ឆ្នាំ២០១៦-២០៣០ និងយុទ្ធសាស្រ្តតាមវិស័យដទៃទៀត។

ជាមួយគ្នានេះ យុទ្ធសាស្រ្តថ្មីនេះ នឹងចូលរួមចំណែកក្នុងការអនុវត្តយុទ្ធសាស្រ្តស្តីពីកិច្ចសហប្រតិបត្តិការអភិវឌ្ឍន៍ និងភាពជាដៃគូឆ្នាំ២០១៩-២០២៣ ដែលផ្តោតសំខាន់លើការពង្រឹងភាពជាម្ចាស់របស់រាជរដ្ឋាភិបាល និងការជំរុញភាពជាដៃគូប្រកបដោយបរិយាប័ន្ន និងលទ្ធផល ក្នុងកិច្ចអភិវឌ្ឍន៍នៅកម្ពុជា។ «ការសម្រេចរៀបចំយុទ្ធសាស្រ្តថ្មីរបស់អឺរ៉ុបនេះ គឺជាសក្ខីភាពនៃការប្តេជ្ញាបន្តគាំទ្ររបស់ដៃគូអឺរ៉ុប សម្រាប់គាំទ្រដំណើរការនៃកិច្ចអភិវឌ្ឍន៍ប្រកបដោយចីរភាពនៅកម្ពុជា»៕

អត្ថបទ៖ សំភី