ក្រសួងការពារជាតិកម្ពុជា-សិង្ហបុរី នឹងបន្តធ្វើការជាមួយគ្នាដើម្បីសន្តិភាព និងស្ថិរភាពក្នុងតំបន់
- 2019-06-14 03:00:01
- ចំនួនមតិ 0 | ចំនួនចែករំលែក 0
ក្រសួងការពារជាតិកម្ពុជា-សិង្ហបុរី នឹងបន្តធ្វើការជាមួយគ្នាដើម្បីសន្តិភាព និងស្ថិរភាពក្នុងតំបន់
ចន្លោះមិនឃើញ
លោកបណ្ឌិត អ៊ឹង អេង ហេន (Ng Eng Hen) រដ្ឋមន្រ្តីក្រសួងការពារជាតិនៃសាធារណរដ្ឋសិង្ហបុរី បានបញ្ជាក់ជាថ្មីម្តងទៀតពីទំនាក់ទំនងយ៉ាងជិតស្និទ្ធរវាងប្រទេសសិង្ហបុរី និងកម្ពុជា ក្នុងវិស័យការពារជាតិ ហើយថាក្រសួងការពារជាតិនៃប្រទេសទាំងពីរ នឹងបន្តធ្វើការជាមួយគ្នាដើម្បីរក្សាសន្តិភាព និងសិ្ថរភាពក្នុងតំបន់។ លោកថ្លែងដូច្នេះ ក្នុងជំនួបជាមួយលោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក កាលពីថ្ងៃទី១២ ខែមិថុនា ឆ្នាំ២០១៩ នៅប្រទេសសិង្ហបុរី។
លោកឧត្តមសេនីយ៍ឯក ហ៊ុន ម៉ាណែត បានលើកឡើងថា សន្តិភាព និងស្ថិរភាព ជាកត្តាជំរុញការអភិវឌ្ឍយ៉ាងឆាប់រហ័សជាក់ស្តែង ដោយសារមានសន្តិភាព និងស្ថិរភាពរយៈពេល ២០ឆ្នាំ ចុងក្រោយនេះ ទើបប្រទេសកម្ពុជា មានការអភិវឌ្ឍយ៉ាងឆាប់រហ័ស។ ដូចនេះក្នុងតំបន់អាស៊ាន សន្តិភាព និងស្ថិរភាព ជាកត្តាជំរុញតំបន់នេះឱ្យបន្តការអភិវឌ្ឍ និងរីកចម្រើន។
លោកឧត្តមសេនីយ៍ឯក មានជំនឿថាដំណើរទស្សនកិច្ច នៅប្រទេសសិង្ហបុរីនេះ ជាការបន្តរឹតចំណងមិត្តភាពនៃប្រទេសទាំងពីរ កងទ័ព និងប្រជាជនទៅថ្ងៃអនាគត។
សូមបញ្ជាក់ថា នៅក្នុងទំព័រហ្វេសប៊ុកផ្លូវការរបស់ឧត្តមសេនីយ៍ឯក ហ៊ុន ម៉ាណែត បានសរសេរថា ក្នុងដំណើរទស្សនកិច្ចផ្លូវការទៅកាន់ប្រទេសសិង្ហបុរីលើកនេះ លោកក៏មានឱកាសជួបជាមួយលោកបណ្ឌិត អឹង អេងហិន (Dr. Ng Eng Hen) ជាលើកទីពីរ ដោយបានពិភាក្សា ផ្លាស់ប្តូរយោបល់គ្នាលើប្រធានបទមួយចំនួនទាក់ទងប្រទេសទាំងពីរ ក៏ដូចជាសភាពការណ៍ក្នុងតំបន់។
លោក ហ៊ុន ម៉ាណែត បានអរគុណលោកបណ្ឌិត អឹង អេងហិន និងថ្នាក់ដឹកនាំសំខាន់ៗរបស់សិង្ហបុរីចំពោះការស្វាគមន៍យ៉ាងកក់ក្តៅ ព្រមទាំងការចែករំលែកនូវទស្សនៈ និងបទពិសោធន៍លើកិច្ចការងារសំខាន់ៗមួយចំនួន។ ឆ្លងតាមកិច្ចសន្ទនាទាំងនេះ បានបញ្ជាក់ ឱ្យឃើញអំពីភាពស្របគ្នានៃឆន្ទៈ និងគោលគំនិតរបស់ប្រទេសកម្ពុជា និងសិង្ហបុរី ក្នុងការពង្រឹង និងពង្រីកទំនាក់ទំនងរវាងប្រទេសទាំងពីរ ទាំងក្នុងពេលបច្ចុប្បន្ន និងទៅអនាគត៕