ផ្លូវហោះហើរថ្មី ភ្នំពេញ-ដាណាំង-វៀងចន្ទន៍ នឹងចាប់ផ្តើមបើកនាពេលខាងមុខ
- 2019-06-14 07:37:30
- ចំនួនមតិ 0 | ចំនួនចែករំលែក 0
ផ្លូវហោះហើរថ្មី ភ្នំពេញ-ដាណាំង-វៀងចន្ទន៍ នឹងចាប់ផ្តើមបើកនាពេលខាងមុខ
ចន្លោះមិនឃើញ
ភាគីកម្ពុជា និងវៀតណាម បានឯកភាពគ្នាគាំទ្រលើសំណើរបស់ក្រុមហ៊ុនអាកាសចរណ៍ជាតិកម្ពុជាអង្គរអ៊ែរ លើការរៀបចំបើកផ្លូវហោះហើរថ្មីត្រង់មួយទៀតរវាងរាជធានីភ្នំពេញ និងទីក្រុងទេសចរណ៍ដាណាំង ហើយតភ្ជាប់ទៅកាន់រដ្ឋធានីវៀងចន្ទន៍ ប្រទេសឡាវ ដែលនឹងចាប់ផ្តើមនៅពេលឆាប់ៗខាងមុខនេះ។
ការឯកភាពគ្នានេះ ធ្វើឡើងក្នុងជំនួបពិភាក្សារវាងលោក ឌិន វៀត ថាំង អគ្គនាយកអាជ្ញាធរអាកាសចរស៊ីវិលវៀតណាម និងលោក ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរស៊ីវិល កាលពីថ្ងៃទី១១ ខែមិថុនា ឆ្នាំ២០១៩ នៅក្រុងហាណូយ ប្រទេសវៀតណាម។ នេះបើតាមសេចក្តីប្រកាសព័ត៌មានរបស់រដ្ឋលេខាធិការដ្ឋានអាកាសចរស៊ីវិល កាលពីថ្ងៃទី១២ ខែមិថុនា ឆ្នាំ២០១៩។
-ជំរុញក្រុមហ៊ុនអាកាសចរណ៍នៃប្រទេសទាំង២ រៀបចំផែនការបើកជើងហោះហើរថ្មីៗជាបន្ថែមទៀត ដើម្បីឆ្លើយតបនឹងកំណើនភ្ញៀវទេសចរ និងទំនាក់ទំនងពាណិជ្ជកម្មរវាងប្រទេសទាំង២។
-សហការពង្រឹងសន្តិសុខ និងសុវត្ថិភាពអាកាសចរ ដើម្បីធានាបាននូវស្ថិរភាពនៃកំណើនអ្នកដំណើរតាមផ្លូវអាកាស រវាងប្រទេសទាំង២។
-សហការលើការបណ្តុះបណ្តាលធនធានមនុស្ស និងដកស្រង់បទពិសោធន៍នៃមន្រ្តីជំនាញអាកាសចរស៊ីវិល នៃប្រទេសទាំង២។
ក្នុងឱកាសនោះ លោក ម៉ៅ ហាវណ្ណាល់ ក៏បានទទួលជួបលោក ផាំ ង៉ុក មីញ ប្រធានក្រុមប្រឹក្សាភិបាលនៃក្រុមហ៊ុនអាកាសចរណ៍ជាតិវៀតណាមផងដែរ។ ក្នុងនោះរដ្ឋមន្រ្តីបានស្នើសុំឱ្យក្រុមហ៊ុនអាកាសចរណ៍ជាតិវៀតណាម សិក្សាលើការបើកផ្លូវហោះហើរថ្មីៗ ជាច្រើនទៀតមកកាន់កម្ពុជា ពីព្រោះប្រទេសទាំង២ មានសក្តានុពលយ៉ាងខ្លាំងលើការហោះហើរដឹកជញ្ជូនអ្នកដំណើរតាមផ្លូវអាកាស ក្នុងការបម្រើសេចក្តីត្រូវការរបស់ភ្ញៀវទេសចរណ៍ និងពាណិជ្ជកម្មផងដែរ។
បើតាមសេចក្តីប្រកាសព័ត៌មានដដែល បង្ហាញថា មកដល់បច្ចុប្បន្ននេះ មាន៤ក្រុមហ៊ុនអាកាសចរណ៍ ដូចជា ក្រុមហ៊ុនកម្ពុជា អង្គរ អ៊ែរ (Cambodia Angkor Air) ក្រុមហ៊ុនអាកាសចរណ៍វៀតណាម (Vietnam Airlines) ក្រុមហ៊ុនអាកាសចរណ៍កាតាអ៊ែវ៉េ (Qatar Airways) និងក្រុមហ៊ុនអាកាសចរណ៍វៀតជេត (VietJet)។ ក្រុមហ៊ុនទំាង៤ កំពុងបម្រើការហោះហើរតាមផ្លូវអាកាស រវាងប្រទេសទាំង២ ជាសរុបមានចំនួន ១១២ជើងក្នុងមួយសប្តាហ៍ ដោយផ្សារភ្ជាប់ចំណុចហោះហើរ រវាងកម្ពុជា មានរាជធានីភ្នំពេញ ខេត្តសៀមរាប និងខេត្តព្រះសីហនុ ហើយចំណែកពីប្រទេសវៀតណាមវិញ មានក្រុងហាណូយ ក្រុងហូជីមិញ និងក្រុងដាណាំង។ ក្នុងឆ្នាំ២០១៨កន្លងទៅ ចំនួនអ្នកធ្វើដំណើរតាមផ្លូវអាកាសរវាងប្រទេសទាំង២ បានកើនដល់ប្រមាណ១,៨លាននាក់៕