សល់មិនដល់១ឆ្នាំទៀតទេ ព្រលានយន្តហោះនៅកោះកុង នឹងបញ្ចប់ការសាងសង់
- 2019-06-15 01:11:00
- ចំនួនមតិ 0 | ចំនួនចែករំលែក 0
សល់មិនដល់១ឆ្នាំទៀតទេ ព្រលានយន្តហោះនៅកោះកុង នឹងបញ្ចប់ការសាងសង់
ចន្លោះមិនឃើញ
អាកាសយានដ្ឋាននៅតំបន់អភិវឌ្ឍតារាសាគរ ខេត្តកោះកុង ដែលសាងសង់ក្នុងទំហំទឹកប្រាក់ ២,២ពាន់លានដុល្លារ នឹងបញ្ចប់ការសាងសង់នៅខែឧសភា ឆ្នាំ២០២០។ ការហោះហើរសាកល្បង នឹងធ្វើឡើងនៅខែតុលា រីឯការហោះហើរផ្លូវការ នឹងចាប់ផ្ដើមនៅខែធ្នូ ឆ្នាំ២០២០។
លោក WANG CHAO អនុប្រធានក្រុមហ៊ុន Union Development Group (UDG) បានមានប្រសាសន៍ថា “យើងគ្រោងសាងសង់ព្រលានយន្តហោះនេះឱ្យហើយស្ថាពរនៅខែឧសភា ឆ្នាំ២០២០ ហើយនៅខែតុលាយើងនឹងធ្វើការហោះហើរសាកល្បងជាពិសេសនៅខែធ្នូចុង ឆ្នាំ២០២០ យើងនឹងហោះហើរជាផ្លូវការតែម្ដង”។
លោក WANG CHAO បានឱ្យដឹងបន្ថែមថា នៅពេលព្រលានយន្តហោះដំណើរការក្រុមហ៊ុនរបស់លោក នឹងធ្វើការបណ្ដុះបណ្ដាល ជំនាញវិជ្ជាជីវៈដល់ប្រជាពលរដ្ឋខ្មែរ ដើម្បីប្រើប្រាស់កម្លាំងពលកម្ម ក្នុងស្រុកឱ្យបានកាន់តែច្រើនបន្ថែមទៀត។ ខណៈបច្ចុប្បន្ននេះចំណេះដឹង របស់ប្រជាពលរដ្ឋខ្មែរ នៅជុំវិញតំបន់នោះមានកម្រិត ដូច្នេះទើបអាចត្រឹមតែ ធ្វើការងារស្រាលៗតែប៉ុណ្ណោះ។
អនុប្រធានក្រុមហ៊ុន UDG ឱ្យដឹងបន្តថា អាកាសយានដ្ឋានដែលនៅជាប់សមុទ្រ និងភ្នំនេះ នឹងមានជើងយន្តហោះហើរត្រង់ទៅកាន់ទីក្រុងប៉ារីស ប្រទេសបារាំង ដែលអាចនឹងនាំភ្ញៀវទេសចរបរទេស កាន់តែច្រើនបន្ថែមទៀតមកឱ្យប្រទេសកម្ពុជា។អាកាសយានដ្ឋានអន្តរជាតិនេះអាចទទួលភ្ញៀវ ៥លាននាក់ ក្នុង១ឆ្នាំ។
អាកាសយានដ្ឋានប្រភេទ F4 នេះ មានពីសសម្រាប់ឡើង និងចុះចតប្រវែង ៣២០០ម៉ែត្រ នឹងអាចផ្ទុកយន្តហោះប្រមាណ៤០០គ្រឿង។ ក្នុងនោះយន្តហោះធុនធំប្រភេទ 777 ក៏អាចចុះចតបានដែរ។ លោក WANGCHAO បានបញ្ជាក់ថា មិនមានយន្តហោះចម្បាំង ឬប្រភេទប្រដេញទេ គឺមានតែយន្តហោះពាណិជ្ជកម្មប៉ុណ្ណោះ។
សូមជម្រាបថាកាលពីពេលថ្មីៗនេះ សមាគមអ្នកសារព័ត៌មាន កម្ពុជា ចិន បានមកបំពេញទស្សនកិច្ចស្វែងយល់តំបន់អភិវឌ្ឍន៍តារាសាគរ របស់ក្រុមហ៊ុន Union Development Group (UDG) ដែលទទួលបានសិទ្ធវិនិយោគ ពីរាជរដ្ឋាភិបាលរយ:ពេល ៩០ឆ្នាំ ក្នុងទំហំវិនិយោគទុន ជាង ៣ពាន់លានដុល្លារសហរដ្ឋអាមេរិក៕