ថ្ងៃនេះវៀតណាម ដាក់លក់ឡានតម្លៃជាង ១ ម៉ឺនដុល្លារ ជាផ្លូវការ

2019-06-17 07:57:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នៅថ្ងៃទី ១៧ ខែមិថុនានេះ ក្រុមហ៊ុនផលិតរថយន្តវៀតណាម Vinfast បានដាក់លក់រថយន្តជាលើកដំបូងនៅក្នុងស្រុក ដោយចាប់ផ្ដើមជាមួយម៉ូដែល Fadil ដែលជាប្រភេទរថយន្ត Hatchback មានតម្លៃប្រមាណ ១៦ ៨០០ ដុល្លារ។

ម៉ូដែល Fadil បានផលិតចេញឡើង ដោយផ្អែកលើរូបរាងរថយន្តអាល្លឺម៉ង់ Opel ម៉ូដែល Karl Rocks ដែលមានការផ្លាស់ប្ដូរបន្តិចបន្តួច។ Fadil មានបំពាក់ម៉ាស៊ីនសាំង ៤ ស៊ីឡាំង ចំណុះ ១,៤ លីត្រ ដោយមានប្រវែង ៣៦៧៦ ម.ម ទទឹង ១៦៣២ ម.ម កម្ពស់ ១៤៩៥ ម.ម និងមានប្រវែងកង់មុខទៅកង់ក្រោយ ២៣៨៥ ម.ម។

រថយន្តនេះមានបំពាក់ពោងសុវត្ថិភាពចំនួន ៦, មុខងារហ្វ្រាំងអេឡិចត្រូនិក, ប្រព័ន្ធទប់លំនឹងរថយន្ត, ប្រព័ន្ធបន្ថយការក្រឡាប់ និង ប្រព័ន្ធជំនួយពេលឡើងចុះចំណោតផងដែរ។ ដំណាក់កាលលក់ដំបូង Vinfast បានកំណត់តម្លៃ Fadil ចាប់ពីប្រមាណ ១៦ ៨០០ ដុល្លារ បន្ទាប់មកតម្លៃនឹងត្រូវឡើងដល់ប្រមាណ ១៩ ៨០០ ដុល្លារវិញ។

ក្រៅពីម៉ូដែល Fadil នេះ Vinfast ក៏នៅមានរថយន្តពីរម៉ូដែលទៀតតម្លៃថ្លៃជាងនេះ និងមានប្រណីតភាពខ្ពស់ជាងនេះបន្តិច មួយជាប្រភេទ Sedan ម៉ូដែល Lux A2.0 និង មួយទៀតជាប្រភេទ SUV ម៉ូដែល Lux SA2.0 រំពឹងថានឹងចេញលក់នៅចុងឆ្នាំ ២០១៩ នេះ។

ការចេញលក់រថយន្តដំបូងនេះ បន្ទាប់ពីរោងចក្រផលិតរថយន្ត Vinfast បានសម្ពោធជាផ្លូវការកាលពីថ្ងៃទី ១៤ ខែមិថុនាកន្លងទៅ ដែលមានសមត្ថភាពផលិតបាន ២៥០ ០០០ គ្រឿងក្នុងមួយឆ្នាំនៅដំណាក់កាលដំបូង ហើយត្រឹមឆ្នាំ ២០២៥ នឹងបង្កើនចំនួនផលិតដល់ ៥០០ ០០០ គ្រឿង៕

ចុចអាន៖

ប្រភព៖ Caradvice ប្រែសម្រួល៖ សុខហេង