អគ្គស្នងការ៖ វិធានការទប់ស្កាត់ការហូរចូលគ្រឿងញៀននៅកម្ពុជា ពុំទាន់ឆ្លើយតបនឹងសភាពការណ៍ឡើយ

2019-06-20 04:46:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានលើកឡើងថា អាស្រ័យដោយនិន្នាការនៃការផលិត ការចរាចរណ៍ ការជួញដូរ និងតម្រូវការគ្រឿងញៀននៅក្នុងតំបន់ និងលើពិភពលោក នៅតែមានកំណើន គួបផ្សំនឹងល្បិចកលក្នុងការរៀបចំចាត់តាំងខ្សែរយៈបណ្ដាញជាប្រព័ន្ធរបស់ក្រុមគ្រប់ជនគ្រឿងញៀន ជាហេតុធ្វើឱ្យការចាត់វិធានការបង្ការ ទប់ស្កាត់ការលួចនាំចូលនូវសារធាតុញៀនមកក្នុងប្រទេសកម្ពុជា ពុំទាន់ឆ្លើយតបទៅនឹងសភាពការណ៍គ្រឿងញៀនប្រកបដោយប្រសិទ្ធភាពខ្ពស់ឡើយ ហើយក៏ជាកត្តាធ្វើឱ្យកម្ពុជា នៅតែបន្តទទួលរងឥទ្ធិពលពីសកម្មភាពឧក្រិដ្ឋកម្មទាំងនេះ។

ការថ្លែងខាងលើនេះ ធ្វើឡើងក្នុងកិច្ចប្រជុំដកពិសោធន៍ និងពង្រឹងកិច្ចសហប្រតិបត្តិការបង្ក្រាប ការជួញដូរ និងប្រើប្រាស់គ្រឿងញៀន នៅតាមក្លឹបកំសាន្ត និងកន្លែងសប្បាយ នាព្រឹកថ្ងៃទី២០ ខែមិថុនា ឆ្នាំ២០១៩ នៅទីស្តីការក្រសួងមហាផ្ទៃ ដោយមានការចូលរួមពីមន្ត្រីជំនាញពាក់ព័ន្ធ និងស្នងការនគរបាលរាជធានី-ខេត្តផងដែរ។

នាយឧត្តមសេនីយ៍សន្តិបណ្ឌិត បានថ្លែងថា កម្ពុជានៅតែជាប្រទេសបន្តរងគ្រោះដោយសារការដឹកជញ្ជូនគ្រឿងញៀនខុសច្បាប់ ដែលមានប្រភពពីតំបន់ត្រីកោណមាស តំបន់អាហ្វ្រិក អាមេរិកខាងត្បូង និងអឺរ៉ុប ឆ្លងកាត់ព្រំដែនតាមរបៀងព្រំដែនគោក ទឹក នៃភាគឦសានប្រទេស តាមផ្លូវអាកាស និងតាមកញ្ចប់បញ្ញើប្រៃសណីយ៍ចូលមកផ្ទៃក្នុងប្រទេស ក្នុងគោលដៅបន្តនាំចេញទៅប្រទេសទី៣ និងសម្រាប់ការជួញដូរបម្រើឱ្យទីផ្សារប្រើប្រាស់ក្នុងស្រុកផងដែរ។

លោក នេត សាវឿន បញ្ជាក់ថា តាមរយៈការកត់សម្គាល់ចំពោះស្ថានភាពនៃការជួញដូរប្រើប្រាស់គ្រឿងញៀននៅក្នុងប្រទេសនាចុងឆ្នាំ២០១៨ និងដើមឆ្នាំ២០១៩ កន្លងមកនេះ បានបង្ហាញថា មានសកម្មភាពចាត់តាំងឲ្យមានការជួញដូរ និងប្រើប្រាស់គ្រឿងញៀន បានរីកសាយភាយនៅតាមរង្គសាល ក្លឹបកំសាន្ត ខារ៉ាអូខេ ក្លឹបរាត្រី(បារបារាំង) ...។

រយៈពេល០៥ខែ ដើមឆ្នាំ២០១៩នេះ កងកម្លាំងអនុវត្តច្បាប់ បានបង្ក្រាបបទល្មើសគ្រឿងញៀនសរុបចំនួន ៣៣៣៥ករណី ឃាត់ខ្លួន ៧០៩៧នាក់ ចាប់យកសារធាតុញៀនគ្រប់ប្រភេទសរុប ៣១០,៩៨គីឡូក្រាម កញ្ឆាស្រស់ ៤៧ ១០៣ដើម រួមនឹងមធ្យោបាយសម្ភារវត្ថុតាងមួយចំនួនទៀត។ ក្នុងនោះករណីជួញដូរ ២០៣៩ករណី ឃាត់ខ្លួន ៣៨៧៣នាក់។ សកម្មភាពបង្ក្រាបករណីធំៗដែលមានសារធាតុញៀនចាប់ពីមួយគីឡូក្រាមឡើង មានចំនួន ២០ករណី ចាប់យកសារធាតុញៀនសរុប ២៨៨,៣៨គីឡូក្រាម និងចាប់មេក្លោងចំនួន ១២នាក់ ខ្សែរយៈបណ្ដាញចំនួន ៥២នាក់។

ផ្អែកតាមរបាយការណ៍ដែលទទួលបានពីលេខាធិការដ្ឋាននៃគណៈបញ្ជាការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនលើកទី៤ រាជធានី-ខេត្ត បានឱ្យដឹងថា ក្នុងចំណោមគោលដៅអាជីវកម្ម ក្លឹបកំសាន្ត ទីតាំងសប្បាយដ្ឋានចំនួន ៧១១៣ទីតាំង ត្រូវបានសមត្ថកិច្ចចម្រុះផ្សព្វផ្សាយអប់រំ ធ្វើកិច្ចសន្យា ដើម្បីស្នើសុំកិច្ចសហការក្នុងការបង្ការ ទប់ស្កាត់ការជួញដូរ និងការប្រើប្រាស់គ្រឿងញៀនបានចំនួន ៧៧៤១កន្លែង៕

អត្ថបទ៖ សោភា