ADB សម្រេចផ្តល់កម្ចី ៦០លានដុល្លារដើម្បីបង្កើនជំនាញការងារពីកម្រិតទាបទៅខ្ពស់នៅកម្ពុជា
- 2019-06-27 04:31:50
- ចំនួនមតិ 0 | ចំនួនចែករំលែក 0
ADB សម្រេចផ្តល់កម្ចី ៦០លានដុល្លារដើម្បីបង្កើនជំនាញការងារពីកម្រិតទាបទៅខ្ពស់នៅកម្ពុជា
ចន្លោះមិនឃើញ
ធនាគារអភិវឌ្ឍន៍អាស៊ី (ADB) បានអនុម័តឥណទានសម្បទានចំនួន ៦០លានដុល្លារ ដើម្បីជួយបង្កើនជំនាញ និងការប្រកួតប្រជែងនៃកម្លាំងការងាររបស់កម្ពុជាពីកម្រិតជំនាញទាប និងប្រើប្រាស់កម្លាំងពលកម្មច្រើន ទៅជាកំណើនសេដ្ឋកិច្ចមួយដែលមានការរុញច្រាន ទៅជំនាញខ្ពស់វិញ។
សេចក្តីប្រកាសព័ត៌មានរបស់ធនាគារអភិវឌ្ឍន៍អាស៊ីបានឱ្យដឹងថា គម្រោងអភិវឌ្ឍន៍ ជំនាញសម្រាប់ការប្រកួតប្រជែងនេះ នឹងជួយផលិតបាននូវអ្នកបច្ចេកទេសប្រកបដោយគុណវុឌ្ឍិការងារចំនួន ១៨ ០០០នាក់ រួមមាន ២៨ភាគរយជាស្ត្រី ដែលមានលទ្ធភាពខ្ពស់ ជាងក្នុងការទទួលបានការងារធ្វើ និងជំនាញបច្ចេកទេសនៅក្នុងវិស័យអាទិភាពចំនួន៤ កម្មន្តសាល សំណង់ អគ្គិសនី និងអេឡិចត្រនិក។
ការអភិវឌ្ឍជំនាញនេះនឹងត្រូវបានធ្វើឡើងតាមរយៈ វិទ្យាស្ថានបណ្តុះបណ្តាលបច្ចេកវិទ្យាចំនួន៥ នៅទូទាំងប្រទេសកម្ពុជា រាប់បញ្ចូលទាំងការកែលម្អបរិក្ខារ នៅសាលបណ្តុះបណ្តាលថ្មីចំនួន១៦ ដែលមានការគិតគូរពីបញ្ហាយេនឌ័រ មានបរិយាប័ន្ន និងសន្សំសំចៃថាមពល ដូចជា ជាន់អន្តេវាសិកដ្ឋាន និងបន្ទប់ទឹកដោយឡែកពីគ្នាសម្រាប់ស្ត្រី ការផ្តល់ឧបករណ៍ បណ្តុះបណ្តាលកម្រិតខ្ពស់ និងកម្រិតឧស្សាហកម្មការបណ្តុះបណ្តាលអភិវឌ្ឍន៍សមត្ថភាព សម្រាប់គ្រូបណ្តុះបណ្តាល និងការផ្តល់ប្រាក់ឧបត្ថម្ភជូនសិស្សមួយចំនួនក្រោមមូលដ្ឋានផ្អែកលើគុណសម្បត្តិ។
វិទ្យាស្ថានបណ្តុះបណ្តាលបច្ចេកវិទ្យាទាំង៥ ដែលត្រូវបានជ្រើសរើសសម្រាប់គម្រោងនេះរួមមាន៖ វិទ្យាស្ថានបច្ចេកវិទ្យាបាត់ដំបង វិទ្យាស្ថានបច្ចេកវិទ្យាកម្ពុជា វិទ្យាស្ថានជាតិពហុបច្ចេកទេសអង្គរ វិទ្យាស្ថានជាតិបណ្តុះបណ្តាលបច្ចេកទេស សម្រាប់ឧទ្យាន TVET និង វិទ្យាស្ថានពហុបច្ចេកទេសភូមិភាគតេជោសែនស្វាយរៀង។
លើសពីនេះទៀត គម្រោងនេះនឹងផ្តល់នូវកាលានុវត្តភាពសម្រាប់ការបង្កើនជំនាញ និង ការរម្លឹកជំនាញឡើងវិញ សម្រាប់និយោជិតដែលមានស្រាប់ ដើម្បីដោះស្រាយបញ្ហាចន្លោះប្រហោងជំនាញ និងកង្វះជំនាញ នៅក្នុងវិស័យឧស្សាហកម្ម តាមរយៈកម្មវិធីរៀនសូត្រផ្អែកលើការងារ។ កម្មវិធីផ្តល់ឥណទានសម្បទានដែលមានមូលដ្ឋានផ្អែកលើការងារ ចំនួន១៨ នឹងត្រូវបានអនុវត្តក្រោមភាពជាដៃគូជាមួយតួអង្គនៅក្នុងវិស័យឧស្សាហកម្ម ដែលនឹងជួយកែលម្អសមត្ថភាពរបស់និយោជិតប្រមាណ ៣៦០នាក់។
មូលនិធិសាកល្បងសម្រាប់អភិវឌ្ឍន៍ជំនាញ ដែលជាគំរូប្រកបដោយនវានុវត្តន៍ ដើម្បីបង្កើន និងលើកទឹកចិត្តដល់ការវិនិយោគរបស់ឧស្សាហកម្ម លើការអភិវឌ្ឍជំនាញក្នុងប្រទេសកម្ពុជា ក៏នឹងត្រូវបានពង្រីកផងដែរ។ គម្រោងនេះនឹងផ្តល់ហិរញ្ញប្បទានដល់សំណើបណ្តុះបណ្តាលដែលនឹងទទួលបានកិច្ចគាំទ្រពីមូលនិធិ ដែលនឹងផ្តល់ឱកាសបណ្តុះបណ្តាលជូនដល់មនុស្សយ៉ាងហោចណាស់ ៣៥០០នាក់ ក្នុងនោះយ៉ាងហោចណាស់មាន ២៥ភាគរយ ជាស្ត្រីអភិវឌ្ឍន៍សមត្ថភាពរបស់ទីភ្នាក់ងាររដ្ឋាភិបាលដើម្បីពង្រឹងការគ្រប់គ្រងមូលនិធិ និងផ្តល់កិច្ចគាំទ្រសម្រាប់ការបង្កើតទីភ្នាក់ងារអចិន្ត្រៃយ៍ថ្មីមួយដែលនឹងរួចរាល់ និងមានដំណើរការត្រឹមឆ្នាំ២០២៤។
ADB ប្តេជ្ញាសម្រេចឱ្យបាននូវតំបន់អាស៊ី និងប៉ាស៊ីហ្វិកមួយប្រកបដោយវិបុលភាព បរិយាប័ន្ន មានភាពធន់ និងមាននិរន្តរភាព ហើយស្របពេលជាមួយគ្នានេះក៏ធានាឱ្យបាននូវនិរន្តរភាពនៃកិច្ចខិតខំរបស់ខ្លួន ក្នុងការលុបបំបាត់ភាពទីទ័លក្រផងដែរ។
ក្នុងឆ្នាំ ២០១៨ ADB បានសន្យាផ្តល់ឥណទានសម្បទាន និងហិរញ្ញប្បទានឥតសំណងថ្មី ដែលមាន ចំនួនទឹកប្រាក់ ២១,៦ ពាន់លានដុល្លារ។ បង្កើតឡើងក្នុងឆ្នាំ ១៩៦៦ ADB គឺជាកម្មសិទ្ធិ របស់សមាជិកចំនួន ៦៨ ប្រទេស ក្នុងនោះមានប្រទេសចំនួន ៤៩ នៅក្នុងតំបន់៕