អាស៊ាន៤ប្រទេស បានចូលរួមកិច្ចប្រជុំ G-20 នៅជប៉ុន តែក្នុងឋានៈផ្សេងគ្នា
- 2019-06-27 09:44:46
- ចំនួនមតិ 0 | ចំនួនចែករំលែក 0
អាស៊ាន៤ប្រទេស បានចូលរួមកិច្ចប្រជុំ G-20 នៅជប៉ុន តែក្នុងឋានៈផ្សេងគ្នា
ចន្លោះមិនឃើញ
ក្នុងចំណោមប្រទេសអាស៊ានទាំង១០ គឺមានតែប្រទេសឥណ្ឌូណេស៊ីមួយប៉ុណ្ណោះដែលជាសមាជិកប្រទេសសេដ្ឋកិច្ចធំៗទាំង២០ (G-20) ដែលលោក ចូកូ វីដូដូ ប្រធានាធិបតីឥណ្ឌូណេស៊ី នឹងចូលរួមក្នុងកិច្ចប្រជុំ G-20 នៅក្រុងអូសាកា ប្រទេសជប៉ុន ពីថ្ងៃទី២៨ ដល់ ២៩ ខែមិថុនា ឆ្នាំ២០១៩។ ប៉ុន្តែប្រទេសអាស៊ាន៣ទៀតដែលពុំមែនជាសមាជិក G-20 រួមមាន សិង្ហបុរី ថៃ និងវៀតណាម ក៏ត្រូវបាននាយករដ្ឋមន្រ្តីជប៉ុន លោក ស៊ីនហ្សូ អាបេ អញ្ជើញឱ្យចូលរួមក្នុងនាមជាភ្ញៀវកិត្តិយសក្នុងកិច្ចប្រជុំកំពូលនេះផងដែរ។
លោក លី ស៊ានឡុង នាយករដ្ឋមន្ត្រីសិង្ហបុរី ត្រូវបានអញ្ជើញឱ្យចូលរួមក្នុងកិច្ចប្រជុំកំពូល G-20 ឆ្នាំ២០១៩នេះ។ ប៉ុន្តែនេះមិនមែនជារឿងថ្មីទេ ព្រោះសិង្ហបុរី ធ្លាប់ត្រូវបានអញ្ជើញឱ្យចូលរួមជាច្រើនលើករួចមកហើយ ដោយសារតែប្រទេសនេះ ជាមជ្ឈមណ្ឌលហិរញ្ញវត្ថុ និងវិនិយោគដ៏សំខាន់មួយនៅអាស៊ី។ លោក លី ស៊ានឡុង នឹងចូលរួមពិភាក្សាក្នុងកិច្ចប្រជុំកំពូលនេះ ហើយព្រមទាំងមានជំនួបទ្វេភាគីជាមួយមេដឹកនាំបណ្តាប្រទេសមួយចំនួនទៀតផងដែរ។
-ថៃ
លោក ប្រាយុទ្ធ ចាន់អូចា នាយករដ្ឋមន្រ្តីថៃ ត្រូវបានអញ្ជើញឱ្យចូលរួម ក្នុងនាមជាប្រធានអាស៊ានឆ្នាំ២០១៩នេះ។ លោកនឹងលើកយកលទ្ធផលពីកិច្ចប្រជុំកំពូលអាស៊ានលើកទី៣៤កន្លងទៅថ្មីៗនេះ ទៅបង្ហាញក្នុងកិច្ចប្រជុំ G-20 នៅជប៉ុន។
-វៀតណាម
លោក ង្វៀន សួនហ៊្វុក នាយករដ្ឋមន្ត្រីវៀតណាម ត្រូវបានអញ្ជើញឱ្យចូលរួម ដោយសារតែវៀតណាម បានធ្វើជាម្ចាស់ផ្ទះកិច្ចប្រជុំ APEC (កិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក) កាលពីខែវិច្ឆិកា ឆ្នាំ២០១៧។ វៀតណាមធ្លាប់ចូលរួមកិច្ចប្រជុំ G-20 ជាលើកដំបូង កាលពីឆ្នាំ២០១០ ដែលពេលនោះក្នុងនាមជាប្រធានអាស៊ាន។ លោក ង្វៀន សួនហ៊្វុក នឹងលើកយកគោលនយោបាយការបរទេសវៀតណាមនៃការចូលរួមយ៉ាងសកម្មក្នុងយន្តការចម្រុះភាគី ទៅបង្ហាញក្នុងកិច្ចប្រជុំនេះ ដើម្បីលើកកម្ពស់ប្រទេសខ្លួន ឱ្យក្លាយដៃគូដ៏គួរឱ្យជឿជាក់ និងទំនួលខុសត្រូវ ក្នុងសហគមន៍អន្តរជាតិ។
សូមជម្រាបថា ប្រទេសដែលជាសមាជិក G-20 រួមមាន៖ អាហ្សង់ទីន, អូស្ត្រាលី, ប្រេស៊ីល, កាណាដា, ចិន, បារាំង, អាល្លឺម៉ង់, ឥណ្ឌា, ឥណ្ឌូណេស៊ី, អ៊ីតាលី, ជប៉ុន (ម្ចាស់ផ្ទះឆ្នាំ២០១៩), ម៉ិចស៊ីកូ, រុស្ស៊ី, អារ៉ាប៊ីសាអ៊ូឌីត, អាហ្វ្រិកខាងត្បូង, កូរ៉េខាងត្បូង, តួកគី, អង់គ្លេស, សហរដ្ឋអាមេរិក និងសហភាពអឺរ៉ុប។
ក្រៅពីសិង្ហបុរី ថៃ និងវៀតណាម ប្រទេសចំនួន៥ទៀតដែលត្រូវបានអញ្ជើញឱ្យចូលរួមជាភ្ញៀវកិត្តិយសរួមមាន៖ ឈីលី (ប្រធាន APEC ឆ្នាំ២០១៩), អេហ្ស៊ីប (ប្រធានសហភាពអាហ្វ្រិក ២០១៩), ហូរឡង់, សេណេហ្គាល់ (ប្រធាន NEPAD ឆ្នាំ២០១៩) និងអេស្បាញ (ភ្ញៀវកិត្តិយសអាចិន្រ្តៃយ៍)៕