ភោជនីយដ្ឋានម្ហូបខ្មែរមួយនៅសៀមរាបល្បីលំដាប់អាស៊ីតែជនជាតិខ្មែរស្គាល់តិច

2019-07-01 04:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ស្ថិតនៅបណ្ដោយលើផ្លូវ ៧មករា ភូមិវត្តដំរី ក្រុងសៀមរាប ខេត្តសៀមរាប ផ្ទះរចនាបទខ្មែរសង់ពីឈើបែបបុរាណមានដើមឈើ និងរុក្ខជាតិដុះជុំជិត ពេលយប់មានភ្លើងបំភ្លឺពណ៌លឿងស្រទន់គយគន់មិនស្កប់ អមជាមួយអាហារខ្មែរបែបទំនើប ប្លែកភ្នែក មានឱជារស់ជាតិឆ្ងាញ់នោះគឺជា ភោជនីយដ្ឋាន ខូស៊ីន វត្តដំណាក់ (Cusine Wat Domnak)។

ភោជនីយដ្ឋានម្ហូបខ្មែរមួយដែលជនជាតិខ្មែរភាគច្រើនមិនបានស្គាល់ ឬធ្លាប់ឃើញតែមិនបានបានអារម្មណ៍ និងគិតថាគ្រាន់ជាភោជនីយដ្ឋានមួយដូចភោជនីយដ្ឋានដទៃផ្សេងទៀតដែលមាននៅខេត្តទេសចរណ៍ប្រវត្តិសាស្ត្រសៀមរាប។

ខូស៊ីន វត្តដំណាក់ ត្រូវបានវេបសាយវាយតម្លៃផ្នែកភោជនីយដ្ឋាន និងអាហារល្បីឈ្មោះរបស់ចក្រភពអង់គ្លេស theworlds50best.com បានវាយតម្លៃ និងដាក់ពិន្ទុឲ្យជាប់ជាភោជនីយដ្ឋានល្អមួយក្នុងចំណោមភោជនីយដ្ឋានល្អទាំង៥០ ក្នុងតំបន់អាស៊ី Asia's 50 Best Restaurants រយៈពេល២ឆ្នាំជាប់គ្នាគឺឆ្នាំ២០១៥ និង២០១៦។

សហស្ថានិក ខូស៊ីន វត្តដំណាក់ លោក ងួន វេងឆាយបញ្ជាក់ថា ហាងនេះបើកដំណើរការនៅក្នុងឆ្នាំ២០១១ ហើយបង្កើតឡើងគឺចង់ឲ្យហាងមួយនេះមានអ្វីដែលប្លែកពីហាងដទៃត្រង់យើងប្រើផលិតផលក្នុងស្រុកដែលយើងមាន និងច្នៃប្រឌិតយ៉ាងណាឲ្យអាហាររបស់យើងមានភាពទាក់ទាញ ស្រស់ស្អាត និងឆ្ងាញ់ ទៅតាមផលិតផលក្នុងស្រុកដែលយើងមាន។ ចាប់តាំងពីបើករហូតមកដល់ពេលនេះភ្ញៀវដែលមកពិសាអាហារភាគច្រើនគឺជាជនជាតិបរទេស ហើយភ្ញៀវខ្មែរមានតិចតួចបំផុតហើយជាភ្ញៀវមកពីរាជធានីភ្នំពេញទៀត។

តើដើម្បីជាប់ជាភោជនីយដ្ឋានល្អមួយក្នុងតំបន់អាស៊ី តើគេពិនិត្យលើចំណុចអ្វីខ្លះ?

លោក ងួន វេងឆាយ បានឆ្លើយប្រាប់ថា មុនទទួលបានចំណាត់ថ្នាក់នេះគឺមានគណៈកម្មការវាយតម្លៃចុះមកមើលនឹងភ្លក់អាហារនៅហាងរបស់យើងផ្ទាល់ហើយទើបគេឲ្យពិន្ទុ និងវាយតម្លៃ។ សម្រាប់សំណួរសួរថាតើយើងទាក់ចិត្តពួកគេដោយរបៀបណា? យើងក៏មិនដឹងដែរ តែគ្រាន់តែយើងដឹងថា អ្វីដែលសំខាន់បំផុត គឺអាហារត្រូវតែល្អហើយឆ្ងាញ់។ អ្វីដែលសំខាន់មួយទៀតគឺយើងបើកហាងចំពេលវេលាដែលត្រូវនឹងប្រភេទអាហាររបស់យើង។ ភាគច្រើនពួកគេមិនសូវជឿជាក់លើម្ហូបរបស់ខ្មែរនោះទេ តែយ៉ាងណាពួកយើងនៅតែបន្ត និងប្ដេជ្ញា តាមគោលបំណងចម្បងរបស់ហាងយើង គឺប្រើតែផលិតផលក្នុងស្រុកមានគុណភាពដែលមានក្នុងឈុតមុខម្ហូបដែលយើងបានរៀបចំ។

លោក វេងឆាយ បានបញ្ជាក់ថា ម្ហូបអាហារទាំងអស់នៅ ខូស៊ីន វត្តដំណាក់ ជាអាហារមានរសជាតិខ្មែរតែបច្ចេកទេសធ្វើម្ហូបប្រទេសបារាំង រាល់មុខម្ហូបបង្កើតដោយមេចុងភៅជនជាតិបារាំង និងជាសហស្ថានិកលោក Joanne Rivière ដោយផ្ទាល់។ គ្រឿងផ្សំម្ហូបស្ទើរតែទាំងស្រុងគឺទិញពីកសិដ្ឋាន និងព្រៃក្នុងតំបន់អង្គរជុំវិញខេត្តសៀមរាប លើកលែងតែផលិតផលមួយចំនួនដែលយើងប្រើផលិតផលនាំចូលមានដូចជា ទឹកដោះគោ សូកូឡា ខ្ទឹមស ផ្សិតខ្មៅស្ងួត និងប្រេងចម្អិនអាហារ។