សម្តេច ហ៊ុន សែន និយាយរឿង EBA ជាមួយអគ្គនាយក WTO

2019-07-04 04:33:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងជំនួបជាមួយលោក Roberto Azevedo អគ្គនាយកអង្គការពាណិជ្ជកម្មពិភពលោក (WTO) នៅក្រុងហ្សឺណែវ ប្រទេសស្វីស កាលពីថ្ងៃទី៣ ខែកក្កដា ឆ្នាំ២០១៩ សម្ដេច ហ៊ុន សែន បានលើកឡើងអំពីស្តង់ដារ ២ឬស្តង់ដា៣ ក្នុងនោះគឺការត្រៀមដកប្រព័ន្ធអនុគ្រោះពន្ធ EBA ពីកម្ពុជាដោយសភាអឺរ៉ុប។

រូបថត៖ ហ្វេសប៊ុកសម្តេច ហ៊ុន សែន

សម្តេចបានបញ្ជាក់ថា៖ «ទោះបីយើងទទួលបានEBA កម្ពុជាក៏មិនអាចក្លាយជាមានបានដែរ ប៉ុន្តែបើបាត់បង់ EBA ក៏កម្ពុជាមិនស្លាប់នោះដែរ។ ទោះជាយ៉ាងណាសម្ដេចបន្តថាកម្ពុជាត្រូវតែបន្តពង្រឹង ពង្រីកទីផ្សាររបស់ខ្លួន ហើយសម្ដេចក៏បានគូសបញ្ជាក់ថាអង្គការពាណិជ្ជកម្មពិភពលោក នៅតែជាដៃគូល្អជាមួយកម្ពុជាហើយកម្ពុជាក៏នៅតែជាដៃគូល្អជាមួយអង្គការពាណិជ្ជកម្មពិភពលោកផងដែរ»។

ក្នុងឱកាសនេះ សម្ដេច ហ៊ុន សែន ក៏បានលើកឡើងអំពីការធ្វើសមាហរណកម្មរបស់កម្ពុជា ជាពិសេសនៅក្នុងក្របខណ្ឌតំបន់ និងពិភពលោកដោយសម្ដេចបានមានប្រសាសន៍បន្ថែមថាមុននឹងយើងចូលជាសមាជិកអង្គការពាណិជ្ជកម្មពិភពលោកនៅឆ្នាំ២០០៤ គឺកម្ពុជាបានចាប់ផ្ដើមការងារមួយចំនួនរួចហើយ គឺកម្មវិធីជាច្រើន ដែលកម្ពុជាបានត្រៀមក្នុងការធ្វើសមាហរណកម្ម។

ទន្ទឹមនេះសម្ដេចក៏បានមានប្រសាសន៍ផងដែរថា «យើងនឹងព្យាយាមកែលម្អ ដូច្នេះហើយក្នុងការទទួលបានកំណើនសេដ្ឋកិច្ច៧% មិនធម្មតានោះទេជាពិសេសក្នុងរយៈពេលពីរទសវត្សរ៍ចុងក្រោយនេះ សម្ដេចក៏បានគូសបញ្ជាក់អំពីការធ្វើពាណិជ្ជកម្ម ក៏ដូចជា ការកែលម្អពាណិជ្ជកម្មជាពិសេស គឺការបន្តធ្វើជាមួយប្រទេសដទៃទៀត»។

លោក Roberto Azevedo បានអបអរសាទរចំពោះកម្ពុជាដែលទទួលបាននូវកំណើនសេដ្ឋកិច្ច និងការអភិវឌ្ឍ ជាពិសេសកំណើនសេដ្ឋកិច្ចដែលមាន ៧% ជារៀងរាល់ឆ្នាំក្នុងរយៈពេល ២០ឆ្នាំចុងក្រោយនេះ ហើយជាពិសេសទៀតនោះ លោកអគ្គនាយកបានគូសបញ្ជាក់ថា អ្វីដែលពាក់ព័ន្ធនឹងការចូលរួមរបស់កម្ពុជា គឺការចូលរួមក្នុងការធ្វើពាណិជ្ជកម្ម ពហុភាគី ក្នុងកម្រិតអន្តរជាតិ។ កម្ពុជាទទួលបានក្នុងក្របខណ្ឌជំនួយសម្រាប់ពាណិជ្ជកម្ម គឺកម្ពុជាបានទទួលដោយ ជោគជ័យទ្វេដងនៅក្នុងរយៈពេល ១០ឆ្នាំចុងក្រោយនេះ ជាពិសេសក្នុងការធ្វើការជាមួយប្រទេសដៃគូ និងកម្មវិធីផ្សេងៗ នៅក្នុងតំបន់រួមទាំងធនាគារអភិវឌ្ឍន៍អាស៊ីផងដែរ។

លោកបានគូសបញ្ជាក់ផងដែរអំពីការដែលកម្ពុជា បានជួយសម្របសម្រួលដល់ការវិនិយោគ និងការចូលរួមដល់ផ្នែកអេឡិចត្រូនិចពាណិជ្ជកម្ម ហើយពាក់ព័ន្ធដល់ផ្នែកផ្សេងទៀតដូចជាបញ្ហាអង្ករដែលកម្ពុជាមានការបារម្ភនោះ លោកធ្លាប់បានលើកអំពីបញ្ហានេះជាមួយនឹងអង្គការសភាអឺរ៉ុបរួចមកហើយ៕