"ទឹកគឺជាជីវិត" ក្លាយជាប្រធានបទរួមរបស់សិល្បករខ្មែរ១១នាក់ដើម្បីជួយសហគមន៍របស់ខ្លួន
- 2019-07-04 09:40:00
- ចំនួនមតិ 0 | ចំនួនចែករំលែក 0
"ទឹកគឺជាជីវិត" ក្លាយជាប្រធានបទរួមរបស់សិល្បករខ្មែរ១១នាក់ដើម្បីជួយសហគមន៍របស់ខ្លួន
ចន្លោះមិនឃើញ
សុភាសិតខ្មែរមួយឃ្លា “ទឹកគឺជាជីវិត" បានក្លាយជាប្រធានបទធំរួមមួយរបស់សិល្បករផ្នែកថតរូប១២នាក់យកទៅផលិតរូបដើម្បីបង្ហាញពីស្ថានភាពជាក់ស្តែង និងបញ្ហាប្រឈមទាក់ទងនឹងទឹកនិងជីវិត ដែលកើតមាននៅសហគមន៍ដាច់ស្រយាលរបស់កម្ពុជា ។
ស្នាដៃរូបថតសិល្បៈចំនួន១១៥ផ្ទាំងថតដោយសិល្បករផ្នែកថតរូបល្បីឈ្មោះលោក ម៉ក់ រ៉េមីស្សា និងក្រុមយុវជន១១នាក់មកពីខេត្ត៥ត្រូវបានសម្ពោធបើកឲ្យសាធារណៈចូលមើលសេរីកាលពីល្ងាចថ្ងៃទី៣ កក្កដាឆ្នាំ២០១៩នៅមជ្ឈមណ្ឌលបុប្ផាណាម្សិលមិញ។
នៅក្នុងថ្ងៃសម្ពោធបើកលោក ម៉ក់ រ៉េមីស្សា ដែលជាសិល្បករថតរូបល្បីឈ្មោះបានលើកឡើងថាពិពរណ៍រូបថត "ទឹកគឺជាជីវិត" គឺជាវិធីសាស្ត្រមួយដ៏ល្អក្នុងការបង្ហាញពីបញ្ហាប្រឈមក្នុងវិស័យទឹកស្អាត និងធ្វើឲ្យគេដឹងលឺពីបញ្ហាទាំងនេះបានតាមរយះរូបថត។ រូបថតវាជាឩបករណ៍ដ៏មានឥទ្ធិពលមួយសម្រាប់ផ្ញើសាររបស់អ្នកផលិតដើម្បីធ្វើឲ្យមានការផ្លាស់ប្តូរមានភាពវិជ្ជមាន។
លោក រ៉េមីស្សា បន្តថា ពិពរណ៍រូបថតរូបថតនេះបង្ហាញពីទស្សនៈខុសគ្នារបស់ក្រុមយុវជនចំនួន១១នាក់អំពីប្រធានបទ "ទឹកគឺជាជីវិត-គ្មាននរណាម្នាក់ត្រូវបានទុកចោលឡើយ" អ្នកខ្លះផលិតរូបឆ្លុះបញ្ចាំងពី ទំនាក់ទនងទឹក និងកសិកម្ម របៀបដាំទឹកបែបបុរាណ ទឹក និងសត្វព្រៃ ការផ្គត់ផ្គង់ទឹក និងទឹកសម្រាប់ការប្រើប្រាស់ប្រចាំថ្ងៃ។
ឯកអគ្គរដ្ឋទូតអូស្ត្រាលីប្រចាំនៅកម្ពុជាលោកស្រី Angela Corcoran មានប្រសាសន៍ថា" នេះគឺជារឿងជាក់ស្តែងណាស់ ការធ្វើការជាមួយអ្នកថតរូបវ័យក្មេងទាំងនេះបានជួយបង្ហាញពីឩបសគ្គមួយចំនួនរបស់សហគមន៍ដែលងាយរងគ្រោះក្នុងការទទួលបានទឹកស្អាតប្រើប្រាស់ ក៏ដូចជាបង្ហាញពីដំណោះស្រាយដែលមានសក្តានុពល។"
រដ្ឋលេខាធិការក្រសួងអភិវឌ្ឍន៍ជនបទ លោក ទ្រីមេង បានលើកឡើងថា ពិពរណ៍នេះបង្ហាញពីផ្លូវ និងគាំទ្រដល់ចក្ខុវិស័យនៃផែកការយុទ្ធសាស្ត្រស្តីពីការផ្គត់ផ្គង់ទឹកស្អាត និងការលើកម្ពស់អនាម័យនៅជន់បទរបស់រាជរដ្ឋាភិបាលកម្ពុជា ២០១៤-២០២៥ ដែលគ្រោងថាប្រជាជនកម្ពុជាទាំងអស់នឹងមានទឹកស្អាត និងអនាម័យប្រើប្រាស់បាន១០០ភាគរយត្រឹមឆ្នាំ២០២៥។
បើតាមសេចក្តីប្រកាសព័ត៌មានរបស់អង្គការ WaterAid ដែលជាអ្នកគាំទ្រឲ្យមានពិពរណ៍នេះបានបញ្ជាក់ថា កម្រោងនេះធ្វើឡើងក្នុងគោលបំណងផ្តល់ភាពអង់អាចក្លាហានដល់យុវជនក្នុងការរៀបរាប់ពីរឿងរ៉ាវដែលខ្លួន និងសហគមន៍ខ្លួនបានជួបបង្ហាញទៅមនុស្សទាំងអស់ រាជរដ្ឋាភិបាល អង្គការដៃគូអភិវឌ្ឍន៍នានាឲ្យបានដឹងអាចពិចារណាទទួលយកដើម្បីចូលរួមដោះស្រាយ។
ពិពរណ៍រូបថតនេះដាក់តាំងបង្ហាញនៅមជ្ឈមណ្ឌលបុប្ផាណា រាជធានីភ្នំពេញឲ្យសាធារណៈជនចូលទស្សនាដោយសេរីចាប់ពីថ្ងៃទី៣ ដល់ថ្ងៃ៣១ ខែកក្កដាឆ្នាំ២០១៩។ សម្រាប់រៀងរាល់ថ្ងៃសុក្រនៅទីនោះនឹងមានបទបង្ហាញខ្លីៗពីការថតរូបពីសំណាក់សិល្បករលោក ម៉ក់ រ៉េមីស្សា និងសិល្បករដែលជាម្ចាស់ស្នាដៃទាំង១១នាក់ផងដែរ៕