ក្រុមហ៊ុនអន្តរជាតិរៀបចំគម្រោងវិនិយោគ ៤០លានដុល្លារលើវិស័យសុខាភិបាលនៅកម្ពុជា
- 2019-07-05 03:12:32
- ចំនួនមតិ 0 | ចំនួនចែករំលែក 0
ក្រុមហ៊ុនអន្តរជាតិរៀបចំគម្រោងវិនិយោគ ៤០លានដុល្លារលើវិស័យសុខាភិបាលនៅកម្ពុជា
ចន្លោះមិនឃើញ
ក្នុងជំនួបជាមួយសម្តេចនាយករដ្ឋមន្រ្តី ហ៊ុន សែន កាលពីថ្ងៃទី៤ ខែកក្កដា ឆ្នាំ២០១៩ នៅក្រុងហ្សឺណែវ ប្រទេសស្វីស តំណាងក្រុមហ៊ុនវិនិយោគអន្តរជាតិចំនួន៦ បានជម្រាបជូនសម្តេចថា ខ្លួនបានរៀបចំគម្រោងរួចហើយទាក់ទងនឹងវិស័យសុខាភិបាល លើទឹកប្រាក់ប្រមាណ ៤០លានដុល្លារ។
ជាការឆ្លើយតប សម្ដេចតេជោបានមានប្រសាសន៍ថា សម្ដេចគាំទ្ររាល់ការវិនិយោគក្នុងប្រទេសកម្ពុជា ជាពិសេសការកសាងនូវហេដ្ឋារចនាសម្ព័ន្ធថ្មី ដូចជាមន្ទីរពេទ្យជាដើមនេះ ការបណ្ដុះបណ្ដាលធនធានមនុស្ស និងវិស័យថាមពលនេះ។
សម្ដេចនាយកមន្ត្រី ក៏បានអរគុណចំពោះក្រុមហ៊ុនដែលបានចាប់អារម្មណ៍ចង់ទៅបណ្ដាក់ទុននៅក្នុងប្រទេសកម្ពុជាលើវិស័យផ្សេងៗ ជាពិសេសលើវិស័យសុខាភិបាលនេះ ដោយសម្តេចលើកឡើងថា ប្រជាជនកម្ពុជាតែងតែទៅព្យាបាលនៅឯក្រៅប្រទេសដូចជា ប្រទេសវៀតណាម ថៃ និងសិង្ហបុរីជាដើម។
សម្តេច ហ៊ុន សែន បានបញ្ជាក់បន្ថែមថា ប្រសិនបើមានអ្នកវិនិយោគទៅដាក់ទុនលើវិស័យសុខាភិបាលនៅឯប្រទេសកម្ពុជានោះ វាជារឿងល្អដោយសារអាចផ្ដល់សេវាផ្នែកសុខាភិបាលនេះ ដល់ប្រជាពលរដ្ឋខ្មែរ និងអាចមានជំនឿទុកចិត្តពីប្រជាពលរដ្ឋខ្មែរផងដែរ។
បច្ចុប្បន្ននេះ ដោយសារតែកម្ពុជាមានកំណើនភ្ញៀវទេសចរច្រើន ដូច្នេះវិស័យសុខាភិបាលដែលបង្កើតនៅប្រទេសកម្ពុជានោះ មិនត្រឹមតែសម្រាប់ព្យាបាលដល់ប្រជាពលរដ្ឋកម្ពុជាប៉ុណ្ណោះទេ ប៉ុន្តែ ក៏អាចបម្រើសេវាកម្មផ្នែកសុខាភិបាលទៅដល់ភ្ញៀវទេសចរដែលមកទស្សនាប្រទេសកម្ពុជាផងដែរ។ នេះជាការលើកឡើងបន្ថែមរបស់ប្រមុខរាជរដ្ឋាភិបាល៕