លោក គួច ចំរើន ជំរុញឱ្យជួសជុលកែលម្អផ្លូវខូច និងពង្រីកបន្ថែមផ្លូវសំខាន់ៗក្នុងក្រុងព្រះសីហនុ
- 2019-07-08 04:09:41
- ចំនួនមតិ 0 | ចំនួនចែករំលែក 0
លោក គួច ចំរើន ជំរុញឱ្យជួសជុលកែលម្អផ្លូវខូច និងពង្រីកបន្ថែមផ្លូវសំខាន់ៗក្នុងក្រុងព្រះសីហនុ
ចន្លោះមិនឃើញ
លោក គួច ចំរើន អភិបាលខេត្តព្រះសីហនុ បានមានប្រសាសន៍ថា ដើម្បីរៀបចំហេដ្ឋារចនាសម្ព័ន្ធ សណ្ដាប់ធ្នាប់ និងបញ្ចៀសការកកស្ទះចរាចរណ៍ក្នុងក្រុងព្រះសីហនុ រដ្ឋបាលខេត្ដត្រូវតែបន្ដជួសជុលកែលម្អផ្លូវខូចៗ និងពង្រីកបន្ថែមផ្លូវសំខាន់ៗ ក្នុងក្រុងដើម្បីឆ្លើយតបទៅនឹងកំណើនចរាចរណ៍យានយន្ដ និងការរីកចម្រើនកើនឡើងយ៉ាងគំហុករបស់ខេត្ដ។
ការថ្លែងខាងលើនេះ ក្នុងពេលដែលលោក គួច ចំរើន ចុះត្រួតពិនិត្យស្ថានភាពផ្លូវ ដែលគ្រោងជូសជុលកែលម្អ ឬពង្រីកបន្ថែម សម្រាប់ជួយសម្រួលចរាចរណ៍ជូនប្រជាពលរដ្ឋ និងភ្ញៀវទេសចរ ធ្វើដំណើរនៅក្នុងក្រុងព្រះសីហនុ ចាប់ពីផ្លូវ៣០០ រង្វង់មូលតោ២ រហូតដល់តំបន់ឆ្នេរអូត្រេះ ដែលស្ថិតក្នុងភូមិសាស្ត្រសង្កាត់លេខ៤ ក្រុងព្រះសីហនុ កាលពីថ្ងៃទី៦ ខែកក្កដា ឆ្នាំ២០១៩។
លោកអភិបាលខេត្តបញ្ជាក់ថា ករណីនេះ រដ្ឋបាលខេត្ដ ត្រូវតែរៀបចំផែនការផ្តួចផ្តើមគំនិត ដើម្បីពិភាក្សាលើលក្ខណៈបច្ចេកទេសជាមួយមន្ត្រីជំនាញរបស់ខេត្ដ និងថ្នាក់ជាតិ ដើម្បីពន្លឿនកិច្ចការងារខាងលើនេះឲ្យបានជោគជ័យ សម្រាប់ទាក់ទាញភ្ញៀវទេសចរជាតិ និងអន្ដរជាតិមកលេង ស្នាក់នៅលម្ហែកម្សាន្ដនៅខេត្ដឲ្យបានច្រើន។
លោក ណុប ហេង ប្រធានមន្ទីរសាធារណការ និងដឹកជញ្ជួនខេត្ដព្រះសីហនុ បានឲ្យដឹងថា ផ្លូវនៅក្នុងខេត្ដព្រះសីហនុ ជាពិសេសក្នុងក្រុង គឺត្រូវរងការខូចខាតស្ទើរទាំងស្រុង ដោយសារតែផ្លូវមួយចំនួនធំដល់អាយុកាលត្រូវអ៊ុតថ្មីឡើងវិញ, កត្ដាអាកាសធាតុ និងការវិនិយោគកើនយ៉ាងគំហុកផងដែរ។ បញ្ហាកញ្ចប់ថវិកា នៅមានកម្រិត និងមានភាពយឺតយ៉ាវក្នុងការទម្លាក់មក សម្រាប់គម្រោងផែនការជួសជុលនេះ គឺជាចំណុចប្រឈមមួយ នាំឱ្យជះឥទ្ធិពលដល់ដំណើរការជួសជុលកែលម្អនេះដែរ។
ទោះជាយ៉ាងណា លោកបន្ថែមថា ផ្លូវសំខាន់ៗមួយចំនួនក្នុងក្រុង កំពុងត្រូវបានរៀបចំជួសជុល និងអ៊ុតកៅស៊ូឡើងវិញជាបន្ដបន្ទាប់ហើយ។ ខេត្ដបានទទួលកញ្ចប់ពិសេសពីរាជរដ្ឋាភិបាលកម្ពុជា ក្នុងការកសាង និងជួសជុលផ្លូវចំនួន ២២ខ្សែ ដើម្បីកែលម្អហេដ្ឋារចនាសម្ព័ន្ធរបស់ខេត្ដព្រះសីហនុឡើងវិញ។
សូមបញ្ជាក់ថា ក្រោយប្រកាសចូលកាន់តំណែង លោក គួច ចំរើន បានឱ្យមន្ត្រីចុះពិនិត្យស្ថានភាពជាក់ស្តែងនៃចំណុចប្រឈមចំពោះមុខ ដូចជាប្រពន្ធ័អូរប្រឡាយ សំណង់គ្រោងដែក សណ្តាប់ធ្នាប់ចរាចរណ៍ និងផ្លូវថ្នល់ជាដើម ដើម្បីមានវិធានការដោះស្រាយបន្ទាន់។ តាមលោកអភិបាលខេត្ត ស្ថានភាពនេះនឹងបានប្រសើរឡើងវិញនៅពេលខាងមុខនេះ៕
អត្ថបទ និងរូបថត៖ រដ្ឋបាលខេត្តព្រះសីហនុ