រដ្ឋមន្ត្រីមហាផ្ទៃ ជំរុញឱ្យពន្លឿនផ្តល់លិខិតអនុញ្ញាតសាងសង់ជូនដល់ម្ចាស់សំណង់ឱ្យបានឆាប់
- 2019-07-16 02:14:18
- ចំនួនមតិ 0 | ចំនួនចែករំលែក 0
រដ្ឋមន្ត្រីមហាផ្ទៃ ជំរុញឱ្យពន្លឿនផ្តល់លិខិតអនុញ្ញាតសាងសង់ជូនដល់ម្ចាស់សំណង់ឱ្យបានឆាប់
ចន្លោះមិនឃើញ
ដើម្បីរួមចំណែកជំរុញ និងពង្រឹងប្រសិទ្ធភាពក្នុងការគ្រប់គ្រងសំណង់ សម្ដេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញឱ្យអភិបាលរាជធានីខេត្ត ពន្លឿននីតិវិធីក្នុងការផ្តល់លិខិតអនុញ្ញាតសាងសង់ជូនដល់ម្ចាស់សំណង់ ឱ្យបានឆាប់ស្របតាមគោលការណ៍បែបបទ និងនីតិវិធីកំណត់ជាធរមាន។ នេះបើយោងតាមលិខិតចុះថ្ងៃទី១៥ ខែកក្កដា ឆ្នាំ២០១៩ របស់សម្តេចក្រឡាហោម ស ខេង ជម្រាបជូនទៅឲ្យអភិបាលនៃគណៈអភិបាលរាជធានី ខេត្ត។
ជាមួយគ្នានេះ សម្តេច ស ខេង ក៏បានធ្វើការណែនាំនូវចំណុច៣ទៀតដូចខាងក្រោម៖
-ត្រូវណែនាំដល់មន្ទីរអង្គភាពជំនាញពាក់ព័ន្ធនឹងរដ្ឋបាលក្រុង ស្រុក ខណ្ឌ ឃុំ សង្កាត់ ឲ្យទទួលខុសត្រូវពង្រឹងការគ្រប់គ្រង និងត្រួតពិនិត្យសំណង់ព្រមទាំងធានាថា មិនមានការសាងសង់សំណង់ដោយគ្មានលិខិតអនុញ្ញាត ឬខុសពីលិខិតអនុញ្ញាតក្នុងដែនសមត្ថកិច្ចរបស់ខ្លួន ។
-ត្រូវបន្តលើកកម្ពស់ការផ្តល់សេវាលើវិស័យសំណង់នៅតាមរដ្ឋបាលរាជធានីខេត្តក្រុងស្រុកខណ្ឌដែលមានយន្តការច្រកចេញចូលតែមួយ។
-ត្រូវអប់រំផ្សព្វផ្សាយដល់ម្ចាស់សំណង់ឲ្យយល់ដឹង និងគោរពច្បាប់ និងលិខិតបទដ្ឋានគតិយុត្តពាក់ព័ន្ធនឹងវិស័យសំណង់ សុវត្ថិភាពក្នុងការសាងសង់សំណង់ និងផលវិបាកនៃការសាងសង់ដែលមិនគោរពតាមច្បាប់ និងបទដ្ឋានបច្ចេកទេសសំណង់។
រដ្ឋមន្រ្តីមហាផ្ទៃបានលើកឡើងក្នុងលិខិតនេះថា ក្នុងរយៈពេលប៉ុន្មានឆ្នាំចុងក្រោយនេះ ទន្ទឹមនឹងការអភិវឌ្ឍរីកចម្រើនរបស់ប្រទេសជាតិ វិស័យសំណង់ក៏មានការរីកលូតលាស់យ៉ាងឆាប់រហ័សគួរឲ្យកត់សម្គាល់ ជាពិសេសនៅតាមទីក្រុង និងទីប្រជុំជន។ ក្នុងនោះក្រសួងមហាផ្ទៃ ក៏បានកត់សម្គាល់ឃើញថា ការសាងសង់សំណង់មួយចំនួនមានលិខិតអនុញ្ញាតពីក្រសួងស្ថាប័នមានសមត្ថកិច្ច ឬពីរដ្ឋបាលរាជធានី ខេត្ត ក្រុង ស្រុក ខណ្ឌ ព្រមទាំងគោរពត្រឹមត្រូវតាមបទដ្ឋានបច្ចេកទេសសំណង់។ ប៉ុន្តែទន្ទឹមនេះ ក៏មានសំណង់មួយចំនួនទៀតត្រូវបានដំណើរការសាងសង់ ជួសជុល និងកែប្រែទ្រង់ទ្រាយសំណង់ដោយគ្មានលិខិតអនុញ្ញាត ឬខុសពីលិខិតអនុញ្ញាត និងពុំមានការត្រួតពិនិត្យលក្ខណៈបច្ចេកទេសសំណង់ឲ្យបានត្រឹមត្រូវ ដែលករណីទាំងនេះ អាចបណ្ដាលឲ្យប៉ះពាល់ដល់សោភ័ណភាព ស្ថាបត្យកម្ម គុណភាព សុវត្ថិភាពសំណង់ សណ្ដាប់ធ្នាប់ និងរបៀបរៀបរយសាធារណៈ រហូតបង្កឲ្យមានគ្រោះមហន្តរាយ និងហានិភ័យផ្សេងៗ៕