ប្រទេសអាស៊ានណាខ្លះហើយដែលមិនទទួលយកសំរាម?

2019-07-17 02:39:03
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសចំនួន៣ ក្នុងតំបន់អាស៊ាន រួមមាន ហ្វីលីពីន ម៉ាឡេស៊ី និងឥណ្ឌូណេស៊ី សុទ្ធតែប្រកាសរួចមកហើយថា មិនទទួលយកសំរាមដែលនាំយកមកពីប្រទេសធំៗដូចជា អាមេរិក កាណាដា អូស្ត្រាលី បារាំង និងអង់គ្លេសជាដើម។

រូបថត៖ AP

កាលពីខែឧសភាកន្លងទៅ លោកប្រធានាធិបតីហ្វីលីពីន Rodrigo Duterte បានបញ្ជាឱ្យរដ្ឋបាលរបស់លោក ជួលកប៉ាល់របស់ក្រុមហ៊ុនឯកជន ដឹកជញ្ជូនសំរាមចំនួន ៦៩កុងតឺន័រ ត្រឡប់ទៅប្រទេសកាណាដាវិញ ហើយបើកាណាដាមិនទទួលយកទេ ត្រូវបោះចោលនៅលើដីកាណាដាតែម្ដង។

ចំណែកម៉ាឡេស៊ី កាលពីខែឧសភា ក៏បានប្រកាសបញ្ជូនកាកសំណល់ប្លាស្ទិកទម្ងន់៤៥០តោន ត្រឡប់ទៅកាន់ប្រទេសដែលជាប្រភពដើមវិញ រួមមាន អូស្រ្តាលី បង់ក្លាដែស កាណាដា ចិន ជប៉ុន អារ៉ាប៊ីសាអូឌីត និងសហរដ្ឋអាមេរិក។ រដ្ឋមន្រ្តីបរិស្ថានម៉ាឡេស៊ី អះអាងថា ម៉ាឡេស៊ី និងប្រទេសកំពុងអភិវឌ្ឍន៍ជាច្រើនទៀត បានក្លាយជាគោលដៅថ្មីបន្ទាប់ពីចិន បានហាមឃាត់ការនាំចូលសំរាមផ្លាស្ទីក កាលពីឆ្នាំ២០១៨។

ឥណ្ឌូណេស៊ីកាលពីពេលថ្មីៗនេះ បានប្រកាសគម្រោងបញ្ជូនសំរាម២១០តោនទៅអូស្ត្រាលីវិញ និងសំរាម ៤៩កុងទឺន័រ ត្រឡប់ទៅបារាំងវិញផងដែរ។ កាលពីខែមិថុនា ឥណ្ឌូណេស៊ី បានបញ្ជូនកុងតឺនឺចំនួន៥គ្រឿង ផ្ទុកដោយសំរាមត្រឡប់ទៅកាន់អាមេរិកវិញ ហើយបានបញ្ជាក់ថា ប្រទេសរបស់ខ្លួនមិនមែនជាទីកន្លែងសម្រាប់ចោលសំរាមនោះទេ៕

អត្ថបទទាក់ទង៖ មេគយកម្ពុជា លើកឡើងពីសំរាម ៨៣កុងទឺន័រដែលដឹកមកទម្លាក់ចោលនៅខេត្តព្រះសីហនុ

អត្ថបទ៖ សំរិទ្ធ កុម្ភៈ