ការចរចាដំឡើងប្រាក់ឈ្នួលអប្បបរមាឆ្នាំ២០២០ ចាប់ផ្តើមក្នុងខែនេះហើយ ខណៈឆ្នាំ២០១៩ គឺ១៨២ដុល្លា/ខែ
- 2019-07-17 06:31:55
- ចំនួនមតិ 0 | ចំនួនចែករំលែក 0
ការចរចាដំឡើងប្រាក់ឈ្នួលអប្បបរមាឆ្នាំ២០២០ ចាប់ផ្តើមក្នុងខែនេះហើយ ខណៈឆ្នាំ២០១៩ គឺ១៨២ដុល្លា/ខែ
ចន្លោះមិនឃើញ
ក្រសួងការងារ និងបណ្តុះបណ្តាលវិជ្ជាជីវៈ បានជូនដំណឹងនៅថ្ងៃទី១៧ ខែកក្កដា ឆ្នាំ២០១៩ថា ការពិភាក្សាប្រាក់ឈ្នួលអប្បបរមាសម្រាប់ឆ្នាំ២០២០ ត្រូវអនុវត្តតាមប្រតិទីនដូចតទៅ៖
-ខែកក្កដា ឆ្នាំ២០១៩ ជាការចាប់ផ្តើមពិភាក្សាប្រាក់ឈ្នួលអប្បបរមា ជាលក្ខណៈផ្ទៃក្នុងរបស់ភាគីនីមួយៗ
-ខែសីហា ឆ្នាំ២០១៩ ជាការចាប់ផ្តើមពិភាក្សាប្រាក់ឈ្នួលអប្បបរមា ជាលក្ខណៈទ្វេភាគី
-ខែកញ្ញា ឆ្នាំ២០១៩ ជាការចាប់ផ្តើមពិភាក្សាប្រាក់ឈ្នួលអប្បបរមា ជាលក្ខណៈត្រីភាគី
-ខែតុលា ឆ្នាំ២០១៩ បើកកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមា ដើម្បីសម្រេចប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ២០២០
-កំណត់យកថ្ងៃទី១ ខែមករា ឆ្នាំ២០២០ ជាកាលបរិច្ឆេទចូលជាធរមានប្រាក់ឈ្នួលអប្បបរមា។
ក្នុងសេចក្តីជូនដំណឹងនេះបន្តថា គ្រប់ភាគីទាំងអស់ ត្រូវប្រើលក្ខណៈវិនិច្ឆ័យបែបសង្គម (ស្ថានភាពគ្រួសារ អត្រាអតិផរណា និងការចំណាយក្នុងការរស់នៅ) និងលក្ខណៈវិនិច្ឆ័យបែបសេដ្ឋកិច្ច (ផលិតភាព ភាពប្រកួតប្រជែងរបស់ប្រទេស ស្ថានភាពទីផ្សារការងារ និងកម្រិតចំណេញរបស់វិស័យ) ក៏ដូចជាបន្ទាត់ភាពក្រីក្រ សម្រាប់ធ្វើជាមូលដ្ឋានក្នុងការពិភាក្សាប្រាក់ឈ្នួលអប្បបរមា នៅកម្ពុជា។
ក្រសួងការងារបញ្ជាក់បន្ថែមថា គ្រប់ភាគីទាំងអស់ សូមផ្តោតលើទិន្នន័យ និងការស្រាវជ្រាវបែបវិទ្យាសាស្រ្ត ដោយយោងលើលក្ខណៈវិនិច្ឆ័យទាំង៧ ដូចដែលបានកំណត់ក្នុងមាត្រា៥ នៃច្បាប់ស្តីពីប្រាក់ឈ្នួលអប្បបរមា ដើម្បីធ្វើជាមូលដ្ឋានក្នុងការសម្របសម្រួលផ្ទៃក្នុង និងប្រកាន់គោលជំហររួមមួយ។
សូមជម្រាបថា ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើង សម្រាប់ឆ្នាំ២០១៩ ត្រូវបានកំណត់ជាផ្លូវការចំនួន ១៨២ ដុល្លារអាមេរិកក្នុងមួយខែ៕