ឡានពាសដែក២គ្រឿងរបស់លោក គីម ជុងអ៊ុន ត្រូវបានដឹកតាមផ្លូវនេះសោះ!

2019-07-17 08:34:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មជ្ឈមណ្ឌលសម្រាប់ការសិក្សាបច្ចេកវិទ្យាការពារជាតិ ដែលជាក្រុមស្រាវជ្រាវមួយមានមូលដ្ឋាននៅក្រុងវ៉ាស៊ីងតោន សហរដ្ឋអាមេរិក បានបញ្ចេញរបាយការណ៍មួយកាលពីថ្ងៃទី១៦ ខែកក្កដា ឆ្នាំ២០១៩ ដោយលាតត្រដាងពីផ្លូវដឹកជញ្ជូនឡានពាសដែក Mercedes ២គ្រឿង របស់លោក គីម ជុងអ៊ុន ក្នុងខណៈដែលអង្គការសហប្រជាជាតិ បានដាក់ទណ្ឌកម្មហាមមិនឱ្យមានការដឹកជញ្ជូនទំនិញប្រណីតទៅកាន់ប្រទេសកូរ៉េខាងជើងក៏ដោយ។

ក្នុងរបាយការណ៍នេះ បានបង្ហាញនូវផែនទីដែលជាផ្លូវដឹកជញ្ជូនរថយន្តខាងលើនេះ ដោយក្នុងនោះគឺដឹកចេញពីកំពង់ផែ Rotterdam ប្រទេសហូរឡង់ កាលពីខែមិថុនាឆ្នាំមុន ចុះមកក្រោមរហូតដល់មហាសមុទ្រឥណ្ឌា សមុទ្រចិនខាងត្បូង ប្រទេសចិន ជប៉ុន កូរ៉េខាងត្បូង និងចុងក្រោយបំផុតរុស្ស៊ីនៅខែតុលា ទើបចូលទៅកូរ៉េខាងជើង។

ក្រុមស្រាវជ្រាវនេះ ក៏បានរកឃើញដែរថា មានប្រទេសដល់៩០ ដែលពាក់ព័ន្ធនឹងបណ្តាញនៃការធ្វើនីតិវិធីលើការដឹកជញ្ជូនទំនិញប្រណីតៗទៅកូរ៉េខាងជើង ក្នុងនោះក៏រួមមានទាំងរថយន្ត Mercedes-Maybach S600 Guard ខាងលើផងដែរ។ រថយន្តនេះមានតម្លៃជាង ៥០ម៉ឺនដុល្លារអាមេរិក។

គួររំលឹកថា កាលពីប៉ុន្មានខែមុន ក្រុមហ៊ុន Daimler ដែលជាក្រុមហ៊ុនមេរបស់ Mercedes-Benz បានបដិសេធថា កូរ៉េខាងជើងមិនមែនជាអតិថិជនរបស់ខ្លួននោះទេ។

អ្នកនាំពាក្យរបស់ Daimler បាននិយាយថា ក្រុមហ៊ុនរបស់ខ្លួនគ្មានយោបល់ឡើយ ថារថយន្ត Mercedes របស់ខ្លួនត្រូវបានដឹកទៅដល់កូរ៉េខាងជើងតាមវិធីណា។ អ្នកនាំពាក្យរូបនេះសង្កត់ធ្ងន់ថា ក្រុមហ៊ុនរបស់ខ្លួនមានគោលការណ៍គោរពច្បាប់ត្រឹមត្រូវ ក្នុងការលក់ផលិតផលរបស់ខ្លួន៕

ប្រភព៖ Yonhapnews ប្រែសម្រួល៖ សំភី