កម្ពុជា អបអរវៀតណាម ដែលជាប់ជាសមាជិកក្រុមប្រឹក្សាសន្តិសុខ UN

2019-07-19 02:28:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានសម្តែងការអបអរសាទរដល់ប្រទេសវៀតណាមដែលជាប់ឆ្នោតជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិឆ្នាំ២០២០-២០២១។ ជាមួយគ្នានេះ កម្ពុជាក៏បានគាំទ្រវៀតណាមធ្វើជាប្រធានអាស៊ាននៅឆ្នាំ២០២០ ខាងមុខនេះផងដែរ។

ការថ្លែងខាងលើនេះ ធ្វើឡើងក្នុងជំនួបពិភាក្សាការងាររវាងលោក ប្រាក់ សុខុន និងលោក វៀង ភុជុង អនុរដ្ឋមន្ត្រីការបរទេសវៀតណាមនៅទីស្តីការក្រសួងការបរទេស កាលពីរសៀលថ្ងៃទី១៨ ខែកក្កដា ឆ្នាំ២០១៩។

រូបថត៖ ផ្តល់ឱ្យ

នៅក្នុងជំនួបនោះ លោកឧបនាយករដ្ឋមន្ត្រី ប្រាក់ សុខុន ក៏បានអបអរសាទរចំពោះលទ្ធផលនៃកិច្ចប្រជុំពិគ្រោះយោបល់ថ្នាក់នយោបាយរវាងក្រសួងការបរទេសកម្ពុជា និងវៀតណាមលើកទី៦ ដែលភាគីទាំងពីរបានពិភាក្សាលើកិច្ចការជាច្រើនក្នុងលក្ខណៈទ្វេភាគី និងពិភាក្សាលើបញ្ហាតំបន់បញ្ហាអន្តរជាតិ ដែលកិច្ចពិភាក្សានេះពង្រឹងនូវទំនាក់ទំនង និងមិត្តភាពយូរ អង្វែងជាប្រពៃណីរវាងប្រទេសទាំងពីរ។ កិច្ចប្រជុំនោះផងដែរគឺជាកិច្ចប្រជុំមួយត្រៀមរៀបចំគណៈកម្មការចម្រុះកម្ពុជា-វៀតណាម ដែលគ្រោងនឹងរៀបចំកិច្ចប្រជុំលើកទី១៧ នៅក្នុងខែសីហា ឆ្នាំ២០១៩។

ក្រៅពីនេះ លោក ប្រាក់ សុខុន ក៏បានពិគ្រោះយោបល់ជាមួយនឹងអនុរដ្ឋមន្ត្រីក្រសួងការបរទេសវៀតណាម លើបញ្ហាសំខាន់ៗចំនួនពីរទៅនឹងទំនាក់ទំនងរវាងប្រទេសនីមួយៗជាមួយនឹងប្រទេសខាងក្រៅដូចជាមហាអំណាចសហរដ្ឋអាមេរិក-សហភាពអឺរ៉ុបផងដែរ។

លោក វៀង ភុជុង បានលើកឡើងក្នុងជំនួបនេះថា វៀតណាមបានតាមដាននូវការវិវឌ្ឍនានារបស់កម្ពុជានិងអាមេរិក ក៏ដូចជាសហភាពអឺរ៉ុប។ ជាពិសេសចុងក្រោយនេះ សភាសហរដ្ឋអាមេរិកបានអនុម័តច្បាប់ប្រជាធិបតេយ្យ ហើយភាគីវៀតណាមបានគាំទ្រចំពោះប្រតិកម្មតបរបស់កម្ពុជា ឆ្លើយតបចំពោះសហរដ្ឋអាមេរិកយ៉ាងសមស្រប៕

អត្ថបទ៖ សោភា