លោក ស៊ុន ចាន់ថុល និងលោក គួច ចំរើន ប្រាប់ឱ្យប្រធានមន្ទីរសាធារណការថ្មី ខិតខំសាងស្នាដៃថ្មី
- 2019-07-19 06:27:12
- ចំនួនមតិ 0 | ចំនួនចែករំលែក 0
លោក ស៊ុន ចាន់ថុល និងលោក គួច ចំរើន ប្រាប់ឱ្យប្រធានមន្ទីរសាធារណការថ្មី ខិតខំសាងស្នាដៃថ្មី
ចន្លោះមិនឃើញ
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន លោក ជាម ហ៊ីម ប្រធានក្រុមប្រឹក្សាខេត្ត និងលោក គួច ចំរើន អភិបាលខេត្តព្រះសីហនុ បានអញ្ជើញជាអធិបតីក្នុងពិធីប្រកាសសម្រួលភារកិច្ច និងចូលកាន់តំណែងប្រធានមន្ទីរសាធារណការ និងដឹកជញ្ជូនខេត្តព្រះសីហនុ នៅសាលាខេត្តព្រះសីហនុ នាព្រឹកថ្ងៃទី១៩ ខែកក្កដា ឆ្នាំ២០១៩។
សូមជម្រាបថា រដ្ឋមន្រ្តីក្រសួងសាធារណការ បានសម្រេចផ្ទេរ សម្រួលភារកិច្ចលោក ណុបហេង ពី ប្រធានមន្ទីរសាធារណការ និងដឹកជញ្ជូនខេត្តព្រះសីហនុ ឱ្យមកបម្រើការងារនៅទីស្ដីការក្រសួង ដើម្បីទទួលភារកិច្ចថ្មី ហើយផ្ទេរលោក បូរី វង្សសានិត ពីអនុប្រធាននាយកដ្ឋានហេដ្ឋារចនាសម្ព័ន្ធសាធារណៈ នៃអគ្គនាយកដ្ឋានបច្ចេកទេស មកជាប្រធានមន្ទីរសាធារណការ និងដឹកជញ្ជូនខេត្តព្រះសីហនុជំនួសវិញ។
ថ្លែងក្នុងពិធីនេះ លោក ស៊ុន ចាន់ថុល បានធ្វើការណែនាំដល់ប្រធានមន្ទីរសាធារណការខេត្តថ្មី ត្រូវខិតខំបំពេញការងារ សហការសាមគ្គីភាពផ្ទៃក្នុង ជាមួយមន្ទីរអង្គភាពពាក់ព័ន្ធក្នុងខេត្ត អនុវត្តនូវយុទ្ធសាស្ត្រចតុកោណដំណាក់កាលទី៤ និងគោលនយោបាយកែទម្រង់ស៊ីជម្រៅរបស់រាជរដ្ឋាភិបាលកម្ពុជា លើហេដ្ឋារចនាសម្ព័ន្ធផ្លូវ ថ្នល់ ច្បាប់ និងលិខិតបទដ្ឋាននានា តាមគោលការណ៍ក្រសួង និងតាមគណៈបញ្ជាការឯកភាពខេត្ត ឱ្យមានប្រសិទ្ធភាព គណនេយ្យភាព និងតម្លាភាព ក្នុងការចូលរួមចំណែកអភិវឌ្ឍខេត្តព្រះសីហនុ ឱ្យកាន់តែមានការរីកចម្រើនបន្ថែមទៀត។
ចំណែកលោក គួច ចំរើន ក៏បានប្រាប់ឱ្យលោកប្រធានមន្ទីរថ្មី ប្រកាន់ភ្ជាប់នូវសាមគ្គីជាធ្លុងមួយ សម្រេចបាននូវស្នាដៃធំៗបន្តទៀត និងអនុវត្តនូវអភិក្រមរបស់ប្រមុខរាជរដ្ឋាភិបាល ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ និងបាវចនាពីរបន្ថែមទៀត គឺកែទម្រង់ខាងក្នុង និងបង្កើនមិត្តខាងក្រៅ៕
អត្ថបទ និងរូបថត៖ រដ្ឋបាលខេត្តព្រះសីហនុ