ទិដ្ឋភាពនៃការសាងសង់ផ្លូវជាតិលេខ១១ ចាប់ពីអ្នកលឿង ដល់ថ្នល់ទទឹង

2019-07-21 02:53:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

នាព្រឹកថ្ងៃទី២១ ខែកក្កដា ឆ្នាំ២០១៩ ក្រសួងសាធារណការ និងដឹកជញ្ជូន បានបង្ហោះនូវរូបភាព១៥សន្លឹកបង្ហាញពីសកម្មភាពការងារស្ថាបនាឡើងវិញផ្លូវជាតិលេខ១១ ចាប់ពីអ្នកលឿង ដល់ថ្នល់ទទឹង។ ក្នុងនោះសកម្មភាពអ៊ុតកៅស៊ូ នៅចន្លោះ PK: ៣៩+៣០០ ដល់ PK: ៣៨+៣០០ បានប្រវែង ១០០០ម៉ែត្រ នៅថ្ងៃទី២០ ខែកក្កដា។ ប្រវែងសរុបនៃការអ៊ុតកៅស៊ូបានប្រវែង ៥៧០០ម៉ែត្រហើយ គិតចាប់ពី PK: ៤៤+០០០។

សូមរំលឹកថា គម្រោងសាងសង់ឡើងវិញផ្លូវជាតិលេខ១១ និងផ្លូវវាង គឺមានប្រវែងសរុប ៩៦,៤៨គីឡូម៉ែត្រ ចាប់ពីអ្នកលឿងចំណុចប្រសព្វផ្លូវជាតិលេខ១ ស្ថិតនៅភូមិលេខ៤ ឃុំព្រែកខ្សាយ-ខ ស្រុកពាមរក៍ ខេត្តព្រៃវែង ដល់ថ្នល់ទទឹង ចំណុចប្រសព្វផ្លូវជាតិលេខ៧ ស្ថិតក្នុងភូមិស្លាបក្តោង ឃុំជប់ ស្រុកត្បូងឃ្មុំ ខេត្តត្បូងឃ្មុំ។ គម្រោងសាងសង់នេះ ត្រូវបានបើកការដ្ឋាននៅព្រឹកថ្ងៃទី២៣ ខែមីនា ឆ្នាំ២០១៨។

ផ្លូវជាតិនេះជាប្រភេទផ្លូវក្រាលបេតុងកៅស៊ូ AC កម្រាស់ ៥សង់ទីម៉ែត្រ លើកកម្ពស់ និងពង្រីកទទឹងផ្លូវពី ៩ម៉ែត្រ ទៅ ១១ម៉ែត្រ ក្រាលស្រទាប់គ្រឹះទាំងលើ និងទាំងក្រោមកម្រាស់ ៦០សង់ទីម៉ែត្រ មានទិសចរាចរណ៍ចំនួន២គន្លង (១ទៅ ១មក) បំពាក់ដោយផ្លាកសញ្ញាចរាចរណ៍ គូសគំនូសចរាចរណ៍ បង្គោលគីឡូម៉ែត្រ និងបង្គោលសុវត្ថិភាពតាមដងផ្លូវផងដែរ។

គម្រោងផ្លូវនេះគ្រោងចំណាយថវិកាសរុបប្រមាណ ៩៤,១៥ លានដុល្លារ ជាហិរញ្ញប្បទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា សម្រាប់ដោះស្រាយផលប៉ះពាល់ និងបោសសម្អាតអាវុធយុទ្ធភ័ណ្ឌមិនទាន់ផ្ទុះ។ ផ្លូវនេះត្រូវបានសាងសង់ដោយក្រុមហ៊ុនសាជីវកម្មថ្នល់-ស្ពាន ចិន (CRBC) និងត្រួតពិនិត្យបច្ចេកទេសសាងសង់ដោយក្រុម ហ៊ុនទីប្រឹក្សាបច្ចេកទេសសំណង់ ក្វាងចូវវ៉ានអាន។ រយៈពេលសាងសង់គឺមានចំនួន ៤៤ខែ ចាប់ពីខែមីនា ឆ្នាំ២០១៨ ដល់ដើមឆ្នាំ២០២១៕

សូមទស្សនារូបភាពខាងក្រោម៖