អនុរដ្ឋមន្រ្តីការពារជាតិជប៉ុន នឹងជួបសម្តេច ទៀ បាញ់ ក្នុងអំឡុងមកទស្សនកិច្ចនៅថ្ងៃទី២២កក្កដា
- 2019-07-21 03:20:03
- ចំនួនមតិ 0 | ចំនួនចែករំលែក 0
អនុរដ្ឋមន្រ្តីការពារជាតិជប៉ុន នឹងជួបសម្តេច ទៀ បាញ់ ក្នុងអំឡុងមកទស្សនកិច្ចនៅថ្ងៃទី២២កក្កដា
ចន្លោះមិនឃើញ
អនុរដ្ឋមន្ត្រីក្រសួងការពារជាតិជប៉ុន លោក នីហ្សីដា យ៉ាសានណូរី នឹងអញ្ជើញមកបំពេញទស្សនកិច្ចនៅកម្ពុជា នាថ្ងៃទី២២ ខែកក្កដា ឆ្នាំ២០១៩ ក្នុងគោលបំណងដើម្បីពង្រឹងទំនាក់ទំនង និងកិច្ចសហប្រតិបត្តិការរវាងកងទ័ព នៃប្រទេសទាំងពីរកម្ពុជា-ជប៉ុន។
តាមកម្មវិធីនៅក្នុងដំណើរទស្សនកិច្ចនៅកម្ពុជា អនុរដ្ឋមន្ត្រីក្រសួងការពារជាតិជប៉ុន នឹងជួបសម្តែងការគួរសម និងពិភាក្សាការងារជាមួយសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៃព្ររាជាណាចក្រកម្ពុជា នាព្រឹកថ្ងៃទី២២ ខែកក្កដា ឆ្នាំ២០១៩។
បន្ទាប់ពីជំនួបចប់ សម្តេចពិជ័យសេនា ទៀ បាញ់ និងអនុរដ្ឋមន្ត្រីក្រសួងការពារជាតិជប៉ុន ក៏នឹងអញ្ជើញចូលរួមក្នុងពិធីបទវគ្គហ្វឹកហ្វឺនគ្រូបង្គោលវាស់ស្ទង់សម្រាប់ប្រតិបត្តិការសន្តិភាពអង្គការសហប្រជាជាតិ។ វគ្គហ្វឹកហ្វឺននេះ គឺដើម្បីបង្កើនសមត្ថភាព និងសិក្សាស្រាវជ្រាវជំនាញ “TOPO” នៅទីស្តីការគណៈរដ្ឋមន្ត្រី។
លោកនាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ បានថ្លែងប្រាប់ [ខ្លីៗ] យ៉ាងដូច្នេះថា៖ «អនុរដ្ឋមន្ត្រីក្រសួងការពារជាតិជប៉ុន ជួបសម្តែងការគួរសមជាមួយសម្តេចពិជ័យសេនា ទៀ បាញ់ ដើម្បីពង្រឹងនូវទំនាក់ទំនងសហប្រតិបត្តិការល្អរវាងកងទ័ព នៃប្រទេសទាំងពីរ និងដើម្បីចូលរួមថែរក្សាសុខសន្តិភាព លើកម្ពស់សមត្ថភាពកងកម្លាំងវិស្វកម្ម ដើម្បីធ្វើបេសកកម្មក្រោមឆ័ត្រអង្គការសហប្រជាជាតិឲ្យកាន់តែល្អប្រសើរឡើងថែមទៀត និងទទួលបច្ចេកវិទ្យាថ្មីៗ ពីជប៉ុន»៕