មន្ត្រី​នគរបាល​ចំនួន​៣រូប​នៅ​អគ្គនាយកដ្ឋាន​អត្តសញ្ញាណកម្ម និងនៅ​អគ្គនាយកដ្ឋាន​អន្ដោប្រវេសន៍​នៃក្រសួងមហាផ្ទៃ ត្រូវបាន​ចាប់ខ្លួន​ពាក់ព័ន្ធ​នឹង​ករណី​អន្ដរាគមន៍​ដោះលែង​ជនជាតិ​ចិន ចំនួន​១៨​នាក់ ដែល​ជំរិត​ទារប្រាក់​តាមប្រព័ន្ធ​អ៊ីនធឺណេត។

លោកឧត្តមសេនីយ៍ អ៊ី សុខឃី ប្រធាន​នាយកដ្ឋាន​ប្រឆាំង​ភេរវកម្ម និង​ឧក្រិដ្ឋកម្ម​ឆ្លងដែន នៃ​អគ្គស្នងការដ្ឋាន​នគរបាល​ជាតិ បានថ្លែង​ប្រាប់ [ខ្លីៗ]​ ថា​មន្ដ្រី​នគរបាល​ចំនួន៣​នាក់​ខាងលើ ត្រូវបាន​ចាប់ខ្លួន និង​បញ្ជូន​ទៅ​តុលាការ នៅថ្ងៃទី២១ ខែកក្កដា ឆ្នាំ២០១៩។

មន្ត្រីជាន់ខ្ពស់​នគរបាលជាតិ​បានឲ្យដឹង​ថា នគរបាល​ចំនួន​៣រូប ដែលត្រូវចាប់ខ្លួន​គឺមាន២នាក់​នៅ​អគ្គនាយកដ្ឋាន​អត្តសញ្ញាណកម្ម ក្នុងនោះ​មានម្នាក់​ឧត្តមសេនីយ៍ និង​ម្នាក់​វរសេនីយ៍ត្រី និងម្នាក់ទៀត​នៅការិយាល័យ​ស៊ើបអង្កេត និង​អនុវត្តនីតិវិធី នៃ​អគ្គនាយកដ្ឋាន​អន្ដោប្រវេសន៍។

សូមជម្រាប​ថា ជនជាតិ​ចិនចំនួន​១៨នាក់ ត្រូវបាន​ចាប់ខ្លួន​នៅខេត្ត​កំពង់ស្ពឺ កាលពីថ្ងៃ​ទី១៧​ ខែ​កក្កដា ឆ្នាំ​២០១៩ ពាក់ព័ន្ធ​ករណី​ជំរិត​ទារប្រាក់​តាមប្រព័ន្ធ​អ៊ីនធ័រណេត៕