ក្រសួងមហាផ្ទៃដាក់ផែនការបង្ក្រាបគ្រឿងញៀនតាមបណ្ដោយព្រំដែនកម្ពុជា-វៀតណាម

2019-07-22 07:21:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងមហាផ្ទៃ បានដាក់ចេញនូវផែនការស្ដីពីយុទ្ធនាការបង្ក្រាបទប់ស្កាត់ និងបង្ក្រាបបទល្មើសគ្រឿងញៀនតាមបណ្ដោយព្រំដែនកម្ពុជាវៀតណាម។ ការដាក់ចេញនូវផែនការនេះ បានធ្វើឡើងនៅក្នុងពិធីផ្សព្វផ្សាយផែនការស្ដីពីយុទ្ធនាការបង្ការទប់ស្កាត់ និងបង្ក្រាបបទល្មើសគ្រឿងញៀនតាមបណ្ដោយព្រំដែនកម្ពុជាវៀតណាមនៅព្រឹកថ្ងៃទី២២ ខែកក្កដា ឆ្នាំ២០១៩ នៅទីស្ដីការក្រសួងមហាផ្ទៃក្រោមអធិបតីភាពនាយឧត្តមសេនីយ៍សន្តិបណ្ឌិតនេត សាវឿន អគ្គស្នងការនគរបាលជាតិ។

រូបថត៖ ផ្តល់ឱ្យ

ផែនការស្ដីពីយុទ្ធនាការបង្ការទប់ស្កាត់ និងបង្ក្រាបបទល្មើសគ្រឿងញៀនរួមមានដូចតទៅ៖

-ដាក់ចេញទិសដៅ និងវិធានការជាក់ស្ដែងសំដៅដោះស្រាយ និងបង្ក្រាបបទល្មើសគ្រឿងញៀនតាមខ្សែបន្ទាត់ព្រំដែនកម្ពុជា-វៀតណាម ជាពិសេសសកម្មភាពនៃការដឹកជញ្ជូនគ្រឿងញៀនទៅវិញទៅមកឆ្លងកាត់ព្រំដែនប្រទេសទាំងពីរ។

-លើកកម្ពស់ស្ថានភាពសន្តិសុខសណ្ដាប់ធ្នាប់សាធារណៈនៅតាមតំបន់ព្រំដែនកាន់តែប្រសើរឡើងដែលរួមសហការជាមួយភាគីវៀតណាមបញ្ជាបាននូវឥទ្ធិពលអវិជ្ជមាននានាបណ្ដាលមកពីគ្រឿងញៀន។

-កងកម្លាំងអនុវត្តច្បាប់ ក៏ដូចជាអាជ្ញាធរដែនដី និងសមត្ថកិច្ចពាក់ព័ន្ធតាមព្រំដែន និងច្រកព្រំដែនកម្ពុជា-វៀតណាម ទប់ស្កាត់នូវឥទ្ធិពលអវិជ្ជមាននានាបណ្ដាលមកពីគ្រឿងញៀន។

ក្រសួងមហាផ្ទៃ ក៏បានសំណូមពរកងកម្លាំងអនុវត្តច្បាប់ក៏ដូចជាអាជ្ញាធរដែនដី និងសមត្ថកិច្ចពាក់ព័ន្ធតាមព្រំដែន និងច្រកទ្វារព្រំដែនកម្ពុជាវៀតណាម ត្រូវបន្តពង្រឹងកិច្ចសហប្រតិបត្តិការជាមួយសមភាគីវៀតណាមឲ្យបានកាន់តែជិតស្និទ្ធ និងខ្លាំងក្លាបន្ថែមទៀតដើម្បីធ្វើសកម្មភាពព្រមគ្នា ក្នុងការស្រាវជ្រាវស៊ើបអង្កេតបង្ការទប់ស្កាត់ និងបង្ក្រាបបទល្មើសគ្រឿងញៀនឲ្យសម្រេចបានលទ្ធផលល្អ និងបង្កើនយុទ្ធនាការឃោសនាប្រមូលផ្ដុំកម្លាំងពីមហាជន និងប្រជាពលរដ្ឋនៅតាមតំបន់ព្រំដែន ឱ្យចូលរួមក្នុងចលនាប្រយុទ្ធប្រឆាំងគ្រឿងញៀនកាន់តែសកម្ម៕

អត្ថបទ៖ សោភា