អាជ្ញាធរខេត្តមណ្ឌលគិរី ចុះដកបង្គោលរាប់រយដែលរំលោភយកដីគម្រោងសង់ព្រលានយន្តហោះ
- 2019-07-28 05:53:46
- ចំនួនមតិ 0 | ចំនួនចែករំលែក 0
អាជ្ញាធរខេត្តមណ្ឌលគិរី ចុះដកបង្គោលរាប់រយដែលរំលោភយកដីគម្រោងសង់ព្រលានយន្តហោះ
ចន្លោះមិនឃើញ
លោក ស្វាយ សំអ៊ាង អភិបាលខេត្តមណ្ឌលគិរី ដឹកនាំកងកម្លាំងចម្រុះ ចុះដកបង្គោលរបងថ្មអនាធិបតេយ្យរាប់រយបង្គោល ដែលជនខិលខូចបោះព័ទ្ធរំលោភយកដីគម្រោងសាងសង់ព្រលានយន្តហោះ ដែលមានទីតាំងនៅភូមិពូហ្សាម ឃុំសែនមនោរម្យ ស្រុកអូររាំង។ ប្រតិបត្តិការនេះបានធ្វើឡើងតាំងពីព្រឹកថ្ងៃទី២៦ ខែកក្កដា ឆ្នាំ២០១៩ រហូតបង្គោលទាំងនោះត្រូវដកចេញអស់។
លោកអភិបាលខេត្តបានឲ្យដឹងថា សកម្មភាពដែលអាជ្ញាធរបានចុះធ្វើនេះ គឺដើម្បីការពារដីបម្រុងទុករបស់រដ្ឋសម្រាប់ធ្វើការសាងសង់ព្រលានយន្តហោះនាពេលខាងមុខ។
លោកបន្តថា ដោយមើលឃើញមានសកម្មភាពបោះបង្គោលកំណត់ព្រំដីយកជាកម្មសិទ្ធផ្ទាល់ខ្លួន លើដីព្រលាន ទើបលោកសម្រេចដឹកនាំមន្ត្រីជំនាញបរិស្ថាន នគរបាល និងអាវុធហត្ថ ចុះដកបង្គោលរបងថ្មទាំងនោះ យកទៅរក្សាទុកបណ្តោះអាសន្ននៅអធិការដ្ឋាននគរបាលស្រុកអូររាំង ដើម្បីស្រាវជ្រាវបន្តទៅតាមនិតីវិធី។
លោក ស្វាយ សំអ៊ាង បានបញ្ជាក់ថា មិនត្រឹមតែដីទីតាំងព្រលានហោះនេះទេ ដែលអាជ្ញាធរចុះអនុវត្តការពារដីទុកជាសម្បត្តិសាធារណៈ សូម្បីដីចំការស្រល់ ដែលកំពុងរងការទន្ទ្រានពីជនមួយក្តាប់តូច ក៏លោកដាក់បញ្ជាឲ្យមន្ត្រីជំនាញ នឹងពាក់ព័ន្ធទាំងអស់ចុះត្រួតពិនិត្យ និងរឹបអូសទុកជាសម្បិត្តរដ្ឋវិញ។
គម្រោងសាងសង់ព្រលានយន្តហោះនេះ គឺអាកាសចរណ៍ស៊ីវិលសហការជាមួយអាជ្ញាធរខេត្ត ដើម្បីរៀបចំទីតាំងដីទុកសម្រាប់កសាងព្រលានយន្តហោះ ដែលមានផ្ទៃដីទំហំប្រមាណជា៩០០ហិចតា ស្ថិតនៅភូមិពូហ្សាម ឃុំសែនមនោរម្យ ស្រុកអូររាំង៕
អត្ថបទ និងរូបថត៖ រដ្ឋបាលខេត្តមណ្ឌលគិរី