រដ្ឋមន្រ្តីមហាផ្ទៃកម្ពុជា-តួកគី ចុះកិច្ចព្រមព្រៀងស្តីពីសហប្រតិបត្តិការសន្តិសុខជាលើកដំបូង
- 2019-07-31 02:29:26
- ចំនួនមតិ 0 | ចំនួនចែករំលែក 0
រដ្ឋមន្រ្តីមហាផ្ទៃកម្ពុជា-តួកគី ចុះកិច្ចព្រមព្រៀងស្តីពីសហប្រតិបត្តិការសន្តិសុខជាលើកដំបូង
ចន្លោះមិនឃើញ
សម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃកម្ពុជា បានចុះហត្ថលេខាជាមួយលោក Suleyman Soylu រដ្ឋមន្រ្តីក្រសួងមហាផ្ទៃតួកគី លើកិច្ចព្រមព្រៀងស្តីពីសហប្រតិបត្តិការសន្តិសុខរវាងប្រទេសទាំង២។ ការចុះហត្ថលេខានេះ ធ្វើឡើងកាលពីថ្ងៃទី៣០ ខែកក្កដា ឆ្នាំ២០១៩ ក្នុងអំឡុងពេលទស្សនកិច្ចរបស់សម្តេច ស ខេង នៅប្រទេសតួកគី។
លោក Suleyman Soylu បានថ្លែងក្រោយពិធីចុះកិច្ចព្រមព្រៀងនេះថា ភាគីទាំងពីរបានពិភាក្សាគ្នាអំពីការងារប្រយុទ្ធប្រឆាំងភេវរកម្ម រួមទាំងកិច្ចសហប្រតិបត្តិការសន្តិសុខ ដោយបានឯកភាពគ្នាប្ដេជ្ញាពង្រឹងកិច្ចសហប្រតិបត្តិការវិស័យទាំងពីរនេះ ឲ្យកាន់តែមានភាពរឹងមាំ និងទទួលបានលទ្ធផលល្អប្រសើរ។
ពាក់ព័ន្ធនឹងដំណើរទស្សនកិច្ចរបស់សម្ដេចក្រឡាហោម ស ខេង ព្រមទាំងគណៈប្រតិភូក្រសួងមហាផ្ទៃកម្ពុជានាឱកាសនេះ លោកបានបញ្ជាក់ថាគឺចំពេលនៃការប្រារព្ធខូបលើកទី៦០នៃទំនាក់ទំនងការទូតរវាងប្រទេសទាំងពីរ ហើយក៏ជាលើកទី១ដែរនៃទស្សនកិច្ចរបស់ក្រសួងមហាផ្ទៃកម្ពុជា និងការចុះកិច្ចព្រមព្រៀងសហប្រតិបត្តិការសន្តិសុខរវាងប្រទេសទាំងពីរ ។
ក្រៅតែពីការចុះកិច្ចព្រមព្រៀងក្នុងវិស័យសន្តិសុខ រដ្ឋមន្រ្តីមហាផ្ទៃតួកគីបានបន្ថែមថា ភាគីទាំងពីរក៏បានឯកភាពគ្នាប្ដេជ្ញាលើការពង្រឹងកិច្ចសហការផ្លាស់ប្ដូរបទពិសោធន៍ក្នុងការងាររក្សាសណ្ដាប់ធ្នាប់សាធារណៈ សុវត្ថិភាព និងការគ្រប់គ្រងចរាចរណ៍ និងការផ្លាស់ប្ដូរបទពិសោធន៍លើការងារពង្រឹងភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល។
លោកក៏បានឲ្យដឹងទៀតថា ភាគីទាំងពីរក៏បានប្ដេជ្ញាចិត្តជំរុញកិច្ចសហប្រតិបត្តិការលើការងារបណ្ដុះបណ្ដាលនគរបាល មន្រ្តីសន្តិសុខ ឆ្មាំសមុទ្រ រួមទាំងកងរាជអាវុធហត្ថ ហើយថាតាមរយៈស្មារតីនៃកិច្ចព្រមព្រៀងស្ដីពីកិច្ចសហប្រតិបត្តិការសន្តិសុខ នាពេលខាងមុខនេះ ភាគីទាំងពីរនឹងជំរុញឲ្យមានការបណ្ដុះបណ្ដាលនគរបាលនៃប្រទេសទាំងពីរ។
ចំណែកសម្តេចក្រឡាហោម បានថ្លែងថា ក្រៅពីរាជរដ្ឋាភិបាល ទំនាក់ទំនងរវាងប្រជាជន និងប្រជាជននៃប្រទេសទាំងពីរ នឹងកាន់តែមានការរីកចម្រើន ជាក់ស្ដែងនៅតួកគីសព្វថ្ងៃ មាននិស្សិតខ្មែរទៅសិក្សាប្រមាណ៧០នាក់ ក្នុងនោះក៏មាននិស្សិតខ្មែរឥស្លាមដែរ ហើយសម្ដេចសង្ឃឹមថាចំនួននិស្សិតមកសិក្សានឹងមានការកើនឡើង។
ជាចុងបញ្ចប់សម្ដេចក្រឡាហោម ស ខេង បានសម្ដែងការគាំទ្រចំពោះការលើកឡើងទាំងស្រុងរបស់រដ្ឋមន្រ្តីក្រសួងមហាផ្ទៃតួកគី ពាក់ព័ន្ធនឹងកិច្ចពិភាក្សា និងកិច្ចព្រមព្រៀងស្ដីពីកិច្ចសហប្រតិបត្តិការសន្តិសុខ និងបានគូសបញ្ជាក់ថាអ្វីៗ គឺភាគីទាំងពីរបានបង្ហាញឆន្ទៈអនុវត្តហើយ នៅឡើយតែការអនុវត្តជាក់ស្ដែងដើម្បីផ្ដល់ផលប្រយោជន៍ឲ្យគ្នាទៅវិញទៅមក៕
អត្ថបទ និងរូបថត៖ ហ្វេសប៊ុកសម្តេច ស ខេង