ឧត្តមសេនីយ៍ឯក ហ៊ុន ម៉ាណែត៖ កងទ័ពខ្សោយគេមើលងាយ ហើយកិត្យានុភាពជាតិក៏ខ្សោយដែរ

2019-08-01 23:36:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានថ្លែងបញ្ជាក់ថា៖ «ជាតិត្រូវការកងទ័ព កងទ័ពត្រូវការជាតិ។ កងទ័ពអត់ជាតិក៏អត់មានន័យ កងទ័ពខ្សោយក៏គេមើលងាយ ជាតិត្រូវការកងទ័ពដើម្បីរឹងមាំ។ ដូច្នេះកងទ័ពត្រូវខិតខំពង្រឹងសមត្ថភាពបំពេញភារកិច្ច ដើម្បីបម្រើជាតិមាតុភូមិ ក៏ដូចជាការពង្រឹងស្មារតីសតិអារម្មណ៍ច្បាស់លាស់នៅក្នុងការការពារជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ ជាពិសេសនៅក្នុងដំណាក់កាលនៃការអូសទាញពីមជ្ឈដ្ឋានមួយចំនួន»។

ការថ្លែងខាងលើនេះ នៅក្នុងពិធីប្រកាសបើកវគ្គហ្វឹកហ្វឺនបំប៉នជំនាញបច្ចេកទេសជួសជុលអាវុធគ្រាប់រំសេវគ្រឿងចក្រ គ្រប់ប្រភេទសម្រាប់ឆ្នាំ២០១៩ នៅសាលាពលទាហានទី២ ខេត្តត្បូងឃ្មុំ កាលពីថ្ងៃទី០១ ខែសីហា ឆ្នាំ២០១៩។

លោកបន្តថា កងយោធពលខេមរភូមិន្ទនៅតែចាត់ទុកវិស័យហ្វឹកហ្វឺនគឺជាការងារដ៏មានសារៈសំខាន់ដែលត្រូវដំណើរការជាប់ជាប្រចាំដើម្បីអភិវឌ្ឍសមត្ថភាពវិជ្ជាជីវៈយោធិន និងកសាងជួរកងកម្លាំងបន្តវេន ឆ្លើយតបទៅនឹងការបន្តអនុវត្តផែនការកែទម្រង់កងយុទ្ធពលខេមរភូមិន្ទ។ ការគ្រប់គ្រងកម្លាំងបានម៉ត់ចត់គឺសំខាន់ណាស់ មិនមែនគ្រប់គ្រងតែមនុស្សទេ គឺគ្រប់គ្រងទាំងស្មារតី សតិអារម្មណ៏ ឆន្ទៈឲ្យបានច្បាស់លាស់ និងគ្រប់គ្រងបំពាក់បំប៉ននូវសមត្ថភាពដើម្បី បំពេញភារកិច្ច។

លោកឧត្តមសេនីយ៍ឯក ហ៊ុន ម៉ាណែត បានបញ្ជាក់ថា ការងារហ្វឹកហ្វឺនជាការងារសំខាន់ក្នុងការធានានិរន្តភាព និងសមត្ថភាពកងទ័ព និងសមត្ថភាពឥទ្ធិពលរបស់ប្រទេសជាតិទាំងមូល បើកងទ័ពខ្សោយ នោះកិត្យានុភាពជាតិក៏ខ្សោយដែរ។

«ដូច្នេះកងទ័ពរបស់យើងត្រូវតែខ្លាំងទាំងការបំពាក់សម្ភារៈ ទាំងឆន្ទៈសមត្ថភាព នោះយើងអាចប្រតិបត្តិការបាន។ ដូច្នេះយើងត្រូវកសាងធនធានមនុស្សព្រោះ ការកសាងធនធានមនុស្សគឺសំខាន់ណាស់ដែលការកសាងធនធានមនុស្សគឺផ្អែកលើកត្តា៣ គឺកត្តាសាលា កត្តាកម្មវិធីសិក្សា ឯកសារសម្ភារៈ និងកត្តាយោធាចារ្យ ព្រមទាំងកត្តាលើកទឹកចិត្តផ្សេងៗ។ ការបន្សល់ ទុកនូវកងទ័ពល្អគឺជាមោទនភាពណាស់ចំពោះនាយទាហាន ព្រោះភាគច្រើននៃទាហានបច្ចុប្បន្នគឺនាយទាហានជំនាន់មុន ហើយត្រូវបណ្ដុះបណ្ដាលសម្រាប់នាយទាហានជំនាន់បច្ចុប្បន្ន និងដើម្បីបន្សល់ទុកស្នាដៃ ជាបទដ្ឋាន ជាស្តង់ដានៃការបណ្ដុះបណ្ដាលរបស់ខ្មែរសម្រាប់នាយទាហានជំនាន់ក្រោយៗទៀតអនុវត្តតាម។ ហើយនាយទាហានជំនាន់ក្រោយត្រូវខិតខំសិក្សាឱ្យត្រូវតាមជំនាញ ដើម្បីពង្រឹងសមត្ថភាពពីមួយជំនាន់ទៅមួយជំនាន់ ដើម្បីធានាបានសុខសន្តិភាព ស្ថិរភាពជូនជាតិ និងដើម្បីកិត្យានុភាពជាតិរបស់យើង»។ នេះជាការលើកឡើងបន្ថែមរបស់លោកមេបញ្ជាការកងទ័ពជើងគោក៕