សម្តេច ហ៊ុន សែន ថា៥សីហា ជាថ្ងៃខួបកំណើតពិត និងពន្យល់ពីការដាក់ថ្ងៃកំណើតក្លែងក្លាយ ៤មេសា

2019-08-05 03:43:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហ៊ុន សែន បានបញ្ជាក់ថា នៅថ្ងៃនេះ គឺជាថ្ងៃកំណើតពិតប្រាកដរបស់សម្តេច (៥ សីហា ១៩៥២-៥ សីហា ២០១៩) ខណៈថ្ងៃកំណើតមិនពិតដែលប្រើប្រាស់សព្វថ្ងៃ គឺថ្ងៃទី ៤ ខែមេសា ឆ្នាំ១៩៥១ ត្រូវបានសម្តេចអះអាងថា គឺដាក់តាមស្ថានការណ៍។ ការថ្លែងនេះ ក្នុងពិធីប្រគល់សញ្ញាបត្រជូនដល់និស្សិតនាយនគរបាល នៅបណ្ឌិត្យសភានគរបាលកម្ពុជា ក្នុងស្រុកកៀនស្វាយ ខេត្តកណ្តាល នាព្រឹកថ្ងៃទី៥ ខែសីហា ឆ្នាំ២០១៩។

រូបថត៖ Press OCM

សម្តេចនាយករដ្ឋមន្រ្តី បានពន្យល់យ៉ាងដូច្នេះថា៖ «**សំបុត្របញ្ជីជាតិរបស់យើងក៏បាត់ អាស្អីៗបាត់ទាំងអស់ អត់យកទៅតាមខ្លួន។ ចឹងប្រវត្តិរូប ដល់គេធ្វើ ខ្ញុំក៏យកថ្ងៃ៤ ខែមេសា ឆ្នាំ១៩៥២ គឺជាថ្ងៃដែលខ្ញុំចូលព្រៃម៉ាគី (៤ មេសា ១៩៧០) តាមការអំពាវនាវរបស់សម្តេចឪ។ ចឹងខ្ញុំក៏យកថ្ងៃ៤ ខែ៤ វាស្រួលចាំ ធ្វើជាថ្ងៃកំណើត ប៉ុន្តែដាក់ឆ្នាំ១៩៥២។ ហើយចុះឆ្នាំ ១៩៥១ ចេញមកពីណា? អាហ្នឹងគឺនៅថ្ងៃទី៨ ខែមករា ឆ្នាំ១៩៧៩ គឺថ្ងៃបង្កើតរដ្ឋាភិបាលដំបូង ហៅថា ក្រុមប្រឹក្សាប្រជាជនបដិវត្តន៍កម្ពុជា ដែលពេលនោះ តម្រូវឱ្យមនុស្ស ៤នាក់ ត្រូវប្រកាសប្រវត្តិរូប គឺប្រធានក្រុមប្រឹក្សាប្រជាជនដែលដើរតួជាប្រមុខរដ្ឋផង ជានាយករដ្ឋមន្រ្តីផង, រដ្ឋមន្រ្តីការពារជាតិ, រដ្ឋមន្រ្តីការបរទេស (សម្តេច ហ៊ុន សែន) រដ្ឋមន្រ្តីមហាផ្ទៃ**»។

សម្តេចបន្តថា ប្រវត្តិរូបរបស់សម្តេច គឺសរសេរដៃនាពេលនោះ រួចហើយយកទៅឱ្យគេវាយអង្គលីលេខ រួចហើយគេយកទៅផ្សាយនៅវិទ្យុ។ សម្តេចបានស្តាប់លឺគេផ្សាយថា ថ្ងៃកំណើតរបស់សម្តេច គឺនៅថ្ងៃទី ៤ ខែមេសា ឆ្នាំ១៩៥១។ សម្តេចថា ឆ្នាំកំណើតនេះខុសហើយ ប៉ុន្តែក្រោយពេលពិភាក្សាជាមួយសម្តេច ជា ស៊ីម រួច សម្តេច ហ៊ុន សែន សម្រេចថា មិនចាំបាច់កែឡើយ ណាមួយដើម្បីឱ្យឃើញអាយុច្រើនផង (២៧ឆ្នាំ)៕

អត្ថបទ៖ សំរិទ្ធ កុម្ភៈ