វិទ្យាល័យមួយនៅបាត់ដំបងបានជយលាភីលេខ១ ខាងផ្ដល់ភាពជាគំរូលើការអប់រំ

2019-08-10 01:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

វិទ្យាល័យពេជ្រចិន្តា ដែលមានទីតាំងស្ថិតនៅស្ថិតនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ទទួលបានជយលាភីលេខ១ ជាអង្គភាពផ្ដល់សេវាសាធារណៈគំរូ ក្នុងវិស័យអប់រំ ទូទាំងប្រទេស ឆ្នាំសិក្សា២០១៨-២០១៩។ ពិធីនេះនេះប្រព្រឹត្តិទៅ ក្រោមវត្តមាន ឯកឧត្ដម អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំយុវជន និងកីឡា នាព្រឹកថ្ងៃពុធ ខែសីហា ឆ្នាំ២០១៩ នៅវិទ្យាស្ថានជាតិអប់រំ។

កម្មវិធីនេះមានគោលបំណងរួមចំណែកដ៏សំខាន់ ក្នុងការលើកកម្ពស់វិស័យស្នូលពីរនៅកម្ពុជា គឺវិស័យអប់រំ និងវិស័យសុខាភិបាល។ ក្នុងពិធីប្រកាសកាលពីម្សិលមិញមាន អង្គភាពក្នុងវិស័យអប់រំ ចំនួន១០ និងវិស័យសុខាភិបាលចំនួន៣០ ត្រូវបានប្រកាសទទួលស្គាល់ជាជ័យលាភី។

លោក ប៉ិច ឈឿត នាយកវិទ្យាល័យ ពេជ្រចិន្តា ក្នុងនាមមាតាបិតាសិស្ស បានសម្តែងនូវការពេញចិត្តចំពោះគ្រប់គ្នា ដែលបានខិតខំរួមចំណែកអភិវឌ្ឍសាលាមួយនេះតាំងតែពីដើមរហូតដល់ពេលនេះ និងថាហេតុផល ដែលនាំឱ្យទទួលបានជយលាភីលេខ១ ដោយសារ វិទ្យាល័យពេជ្រចិន្តា តែងទទួលបានការឧបត្ថម្ភគាំទ្រយ៉ាងសកម្មពីសហគមន៍មាតាបិតាសិស្ស បរិស្ថានសាលា សេវាសាធារណៈ និងការអប់រំមានវិន័យល្អ។ “យើងមិនគិតថា គេវាយតម្លៃលើចំណុច ៨ ឬ៩ ហ្នឹងទេ ប៉ុន្តែយើងបានធ្វើរួចមុនគេរួចហើយ ដោយយើងមិនបានដឹង ។ លុះដាក់ពាក្យទៅ ហើយតាមសូចនាករគេវាយតម្លៃមកត្រូវ ហើយធ្វើឱ្យយើងហ្នឹងភ្ញាក់ខ្លួនថា យើងធ្វើកន្លងមកហ្នឹងជោគជ័យតាមរយៈការជួយសិស្សរៀនយឺត សិស្សក្រីក្រយើងបង្រៀនអត់យកលុយអញ្ចឹងទៅវាត្រូវទិសដៅគេ”។

វិទ្យាល័យពេជ្រចិន្តា នឹងមានផែនការ និងយុទ្ធសាស្ត្របន្ថែមទៀត ដើម្បីអនុវត្តកាន់តែល្អប្រសើរឡើងបន្ថែមទៀត។ នេះបើតាមលោក លោក ប៉ិច ឈឿត ។ វិទ្យាល័យនេះមាន ២២បន្ទប់ និងមានសិស្ស ១០១២ នាក់ ចាប់ពីថ្នាក់ទី៧ រហូតដល់ថ្នាក់ទី១២។ ក្រៅពីទទួលបានពាន និងវិញ្ញាបនបត្រ គណៈគ្រប់គ្រងក៏ទទួលបាននូវថវិកាចំនួន ២០០លានរៀលផងដែរ។

នៅថ្ងៃទី០៨ ខែសីហា នេះផងដែរ នៅមុខបរិវេណអគារចាស់សាលាខេត្ត ក៏បានរៀបចំពិធីអបអរសាទរការទទួលជយលាភីអង្គភាពផ្ដល់សេវាគំរូ ក្នុងវិស័យអប់រំ និងវិស័យសុខាភិបាល ក្រោមអធិបតីភាព ឯកឧត្តម អ៊ុយ រី ប្រធានក្រុមប្រឹក្សាខេត្ត និងឯកឧត្តម ងួន រតនៈ អភិបាលនៃគណៈអភិបាលខេត្ត ។

លោក យី សុងគី ប្រធានមន្ទីរអប់រំយុវជន និងកីឡាខេត្តបាន ថ្លែងអំណរគុណដល់ថ្នាក់ដឹកនាំសាលា ថ្នាក់ដឹកនាំខេត្តគ្រប់លំដាប់ថ្នាក់ ជាពិសេសរដ្ឋាភិបាលកម្ពុជា ដែលតែងតែយកចិត្តទុកដាក់ខ្ពស់លើវិស័យអប់រំ និងវិស័យសុខាភិបាល ដែលជាវិស័យអាទិភាពនៃគោលនយោបាយយុទ្ធសាស្ត្រអភិវឌ្ឍរបស់រាជរដ្ឋាភិបាលកម្ពុជា។

លោក ងួន រតនៈ អភិបាល ខេត្តបានអបអរសាទរចំពោះការទទួលបានពានរង្វាន់ នៃវិស័យអប់រំ និងវិស័យសុខាភិបាល ដែលទទួលបានពានរង្វាន់ អង្គភាពផ្ដល់សេវាសាធារណៈគំរូ និងបានផ្ដាំផ្ញើទៅអង្គភាពទទួលជយលាភី ខិតខំបន្តទៀតដើម្បីការពារពានរង្វាន់របស់ខ្លួន និងអង្គភាពផ្សេងៗទៀតដែលមិនទាន់បានទទួលជយលាភីក៏ត្រូវខិតខំប្រលងប្រណាំងយកជយលាភីឲ្យបានដូចគេ៕