អាមេរិក ធ្វើតេស្តមីស៊ីលស៊េរីថ្មី ក្រោយដកខ្លួនពីសន្ធិសញ្ញាមួយជាមួយរុស្ស៊ី (មានវីដេអូ)

2019-08-21 01:42:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្ទីបញ្ចកោណបានប្រកាសកាលពីថ្ងៃទី ១៩ ខែសីហា ឆ្នាំ២០១៩ថា សហរដ្ឋអាមេរិកបានតេស្តមីស៊ីលបាញ់ពីដីគោកដោយអាចហោះបានចម្ងាយលើស ៥០០ គីឡូម៉ែត្រ។ មីស៊ីលដែលមានសមត្ថភាពបែបនេះត្រូវបានហាមដោយសន្ធិសញ្ញា Intermediate-range Nuclear Force (INF)។

រដ្ឋបាលលោក ដូណាល់ ត្រាំ បានដកខ្លួនអាមេរិកពីសន្ធិសញ្ញានេះកាលពីថ្ងៃទី ០២ ខែសីហា ឆ្នាំ២០១៩ ដោយបានលើកហេតុផលថា រុស្សីបានប្រព្រឹត្តិខុសពីលក្ខខណ្ឌនៃសន្ធិសញ្ញា។

សន្ធិសញ្ញានេះត្រូវបានចុះកាលពីឆ្នាំ ១៩៨៧មកម្ល៉េះ ដោយប្រធានាធិបតីសហរដ្ឋអាមេរិក លោក Ronald Reagan និងមេដឹកនាំសហភាពសូវៀត លោក Mikhail Gorbachev យល់ព្រមឈប់ផលិតនិងសិក្សា មីស៊ីលមានសមត្ថភាពបាញ់ពីដីគោកហើយអាចហោះបានចម្ងាយពី ៥០០ ដល់ ៥៥០០ គីឡូម៉ែត្រ រួមទាំងតម្រូវឲ្យភាគីទាំងពីរបំផ្លាញមីស៊ីលប្រភេទនេះនៅក្នុងស្ដុក។

កាធ្វើតេស្តនេះបានប្រព្រឹត្តិឡើងនៅថ្ងៃទី១៨ ខែសីហា ឆ្នាំ២០១៩លើកោះ San Nicholas រដ្ឋកាលីហ្វ័រញ៉ា ដោយមន្ទីបញ្ចកោណបានបញ្ជាក់ថា៖ «ទិន្នន័យ និងមេរៀនដែលបានទទួលពីការតេស្ដនេះនឹងជួយដល់ការវិវត្តនៃសមត្ថភាពវាយប្រហារចម្ងាយមធ្យមរបស់សហរដ្ឋអាមេរិក»៕