អាវុធទំនើបៗមួយចំនួន នឹងដាក់បង្ហាញនៅពិធីគម្រប់ខួបនៃការបង្កើតចិនកុម្មុយនិស្ត
- 2019-08-30 07:12:51
- ចំនួនមតិ 0 | ចំនួនចែករំលែក 0
អាវុធទំនើបៗមួយចំនួន នឹងដាក់បង្ហាញនៅពិធីគម្រប់ខួបនៃការបង្កើតចិនកុម្មុយនិស្ត
ចន្លោះមិនឃើញ
រដ្ឋាភិបាលចិន នឹងបង្ហាញឧបករណ៍យោធាទំនើបៗផលិតក្នុងស្រុកមួយចំនួន នៅក្បួនព្យុហយាត្រាដែលនឹងប្រព្រឹត្តិនៅពេលខាងមុខ។ នេះបើតាមការប្រកាសមួយកាលពីថ្ងៃទី ២៩ ខែសីហា ឆ្នាំ២០១៩។
ក្បួនដង្ហែនេះគឺនឹងប្រព្រឹត្តិទៅនៅថ្ងៃទី ០១ ខែតុលា ឆ្នាំ២០១៩នៅរដ្ឋធានី ប៉េកាំង ក្នុងឱកាសគម្រប់ខួបទី ៧០ នៃការបង្កើតសាធារណរដ្ឋប្រជាមានិតចិន ក្រោយពីជ័យជំនះរបស់បក្សកុម្មុយនិស្តកាលពីឆ្នាំ ១៩៤៩។
បើតាមភ្នាក់ងារព័ត៌មានរដ្ឋចិន Xinhua ក្បួនព្យុហយាត្រានេះនឹងមានទំហំធំជាងក្បួនកាលពីខួបទី ៦០ និងខួបទី ៥០ ហើយក៏ធំជាងក្បួនព្យុហយាត្រាកាលពីខួបទី ៧០ នៃជ័យជំនះលើជប៉ុនក្នុសអំឡុងសង្គ្រាមលោកលើកទី ២។
ក្នុងសន្និសីទសារព័ត៌មាន លោកឧត្ដមសេនីយ៍ Cai Zhujin ជាសមាជិកកងទ័ពចិន បាននិយាយថាកងទ័ពខ្លួន នឹងធ្វើការបង្ហាញអាវុធទំនើបជាច្រើនដែលមិនធ្លាប់បានឃើញ នៅក្បួនដង្ហែនេះ។ លោកមិនបានបញ្ជាក់ថាអាវុធណាទេដែលនឹងត្រូវបានដាក់បង្ហាញ។
បើតាមកាសែត South China Morning Post ចិននឹងបង្ហាញមីស៊ីលបាញ់ឆ្លងទ្វីប DF-41 និងJL-2។ មីស៊ីលទាំងពីរនេះគឺបំពាក់គ្រាប់បែកនុយក្លេអ៊ែរ ដោយ DF-41 អាចភ្ផាប់គ្រាប់បែកនុយក្លេអ៊ែរចង្កោម(មីស៊ីលមួយទម្លាក់គ្រាប់ច្រើន)។ DF-41 គឺបាញ់នៅលើគោកនៅលើរថយន្តបចល័ត រីឯ JL-2 វិញ គឺបាញ់ដោយនាវាមុជទឹកប្រភេទ Jin។
ក្រៅពីមីស៊ីលពីរនេះ គេគិតថាក៏មានបង្ហាញយន្តហោះទម្លាក់គ្រាប់បែក H-6N ដែលជាអ្នកស្នងដំណែងយន្តហោះ H-6K។ យន្តហោះបំបាំងកាយ Chengdu J-20 ដែលនឹងចូលប្រើប្រាស់ក្នុងឆ្នាំនេះ អាចនឹងបង្ហាញមុខនៅពិធីនេះផងដែរ៕