រដ្ឋមន្រ្តីសេដ្ឋកិច្ច ប្រាប់ធនាគារពិភពលោកថា កម្ពុជានៅតែសម្រេចបានកំណើនសេដ្ឋកិច្ចខ្ពស់ឆ្នាំនេះ

2019-09-17 01:26:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា សេដ្ឋកិច្ចកម្ពុជា ត្រូវបានវាយតម្លៃថាអាចសម្រេចបានកំណើនខ្ពស់រហូតដល់ ៧,៥% ក្នុងឆ្នាំ២០១៨ និងតាមការព្យាករកំណើនសេដ្ឋកិច្ចនេះ នឹងអាចនៅតែសម្រេចបានប្រមាណ ៧% ក្នុងឆ្នាំ២០១៩។ លោកថ្លែងដូច្នេះទៅកាន់លោកស្រី វិចតូរៀ ខ្វាខ្វា អនុប្រធានធនាគារពិភពលោក ទទួលបន្ទុកតំបន់អាស៊ីខាងកើត និងប៉ាស៊ីហ្វិក ក្នុងជំនួបគ្នាមួយ កាលពីថ្ងៃទី១៦ ខែកញ្ញា ឆ្នាំ២០១៩។

លោកឧបនាយករដ្ឋមន្រ្តីលើកឡើងថា កម្ពុជាកំពុងបន្តដំណើរយ៉ាងស្វាហាប់តម្រង់ទិសឆ្ពោះទៅរកចក្ខុវិស័យឆ្នាំ២០៥០ ដើម្បីប្រែក្លាយខ្លួនទៅជាប្រទេសអភិវឌ្ឍន៍ ដោយបានកំណត់យកឆ្នាំ២០៣០ ជាឆ្នាំគោល ដែលត្រូវសម្រេចឱ្យបាននូវលទ្ធផលជាសារវ័ន្ត នៃកំណែទម្រង់សំខាន់ៗ និងការប្រែក្លាយខ្លួនជាប្រទេសចំណូលមធ្យមកម្រិតខ្ពស់។

ជាការឆ្លើយតប លោកស្រីអនុប្រធានលើកឡើងថា ធនាគារពិភពលោកតែងប្រកាន់ជំហរច្បាស់លាស់ ក្នុងការធ្វើកិច្ចសហប្រតិបត្តិការល្អ និងពេញលេញជាមួយរាជរដ្ឋាភិបាល ដើម្បីចូលរួមចំណែកបន្តជំរុញកិច្ចអភិវឌ្ឍនៅកម្ពុជា។ ជាក់ស្តែងកាលពីថ្ងៃទី៣០ ខែឧសភា ឆ្នាំ២០១៩ ធនាគារពិភពលោកបានអនុម័ត «ក្របខណ្ឌនៃភាពជាដៃគូរវាងរាជរដ្ឋាភិបាល ជាមួយ WB ឆ្នាំ២០១៩-២០២៣» ដែលគ្រោងទឹកប្រាក់សរុបចំនួនប្រមាណ ១ពាន់លានដុល្លារ ដែលឯកសារនេះ គឺជាក្របខណ្ឌកិច្ចសហប្រតិបត្តិការពេញលេញរយៈពេលមធ្យមរវាងរាជរដ្ឋាភិបាលកម្ពុជា ជាមួយធនាគារពិភពលោក៕

អត្ថបទ និងរូបថត៖ ក្រសួងសេដ្ឋកិច្ច និងហិរញ្ញវត្ថុ