ចាប់ខ្លួនមេក្លោង ទន្រ្ទានយកដីរដ្ឋទៅពុះឡូតិ៍លក់នៅបាត់ដំបង

2019-09-19 01:56:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ជនសង្ស័យឈ្មោះ ឡុង វុទ្ធី ដែលជាមេក្លោង ឈូសឆាយកាប់រានយកដីរដ្ឋ (តំបន់ការពាររបស់បរិស្ថាន) ទៅពុះឡូតិ៍លក់ ដែលមានទីតាំងនៅក្នុងភូមិភ្នំដំបង ឃុំសន្តិភាព ស្រុកសំឡូត ខេត្តបាត់ដំបង ត្រូវបានចាប់ខ្លួនហើយកាលពីថ្ងៃទី១៧ ខែកញ្ញា ឆ្នាំ២០១៩។

ការចាប់ខ្លួននេះ ដោយកម្លាំងបញ្ជាការឯកភាពខេត្តបាត់ដំបង និងក្រុមការងាររបស់គណៈកម្មការជាតិដើម្បីទប់ស្កាត់ និងបង្រ្កាបបទល្មើសធនធានធម្មជាតិ ។

ក្រសួងបរិស្ថាន បានឲ្យដឹងថា កន្លងមក មានការប្រកាសផ្សព្វផ្សាយការរៀបចំដីឡូតិ៍តំបន់អភិវឌ្ឍន៍ ឡុង វុទ្ធី ដែលមានទំហំផ្ទៃដី ៤៩ ៦០០ ម៉ែត្រការ៉េ មានទីតាំងនៅក្នុងភូមិភ្នំដំបង ឃុំសន្តិភាព ស្រុកសំឡូត ខេត្តបាត់ដំបង ជាតំបន់ស្ថិតនៅក្នុងតំបន់ការពារធម្មជាតិ (តំបន់ប្រើប្រាស់ច្រើនយ៉ាងសំឡូត) ដែលបានកំណត់ដោយព្រះរាជក្រឹត្យ ចុះថ្ងៃទី០១ ខែវិច្ឆិកា ឆ្នាំ១៩៩៣។

យោងតាមច្បាប់ស្ដីពីតំបន់ការពារធម្មជាតិ ដីតំបន់ការពារធម្មជាតិ គឺជាដីសាធារណៈរបស់រដ្ឋ ដែលមិនអនុញ្ញាតឱ្យកាប់រាន ទន្ទ្រានកាន់កាប់ លក់ដូរបានឡើយ និងមិនអាចស្ថិតនៅក្រោមការកាន់កាប់ដោយលទ្ធកម្មពិសេសនៃភោគៈឡើយ។ ការចាត់ចែងលក់ដូរដី សាធារណៈ របស់រដ្ឋនៃតំបន់ការពារធម្មជាតិ គឺជាបទល្មើសព្រហ្មទណ្ឌ ដោយអ្នកប្រព្រឹត្ត និងអ្នកជាប់ពាក់ព័ន្ធត្រូវផ្ដន្ទាទោសជាប់ពន្ធនាគារ និងត្រូវបានចាត់ចូលជាឧក្រិដ្ឋកម្ម ដូចមានចែងក្នុងច្បាប់ស្តីពីការប្រឆាំងសម្អាតប្រាក់ និងហិរញ្ញប្បទានភេរវកម្ម៕

អត្ថបទ៖ កុសល