រាជរដ្ឋាភិបាលឲ្យក្រសួងពីរ ពិនិត្យមើលរឿងអភិបាលខេត្តកំពង់ឆ្នាំងយកដីរដ្ឋ

2019-09-19 03:31:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រាជរដ្ឋាភិបាល បានឯកភាពប្រគល់ជូនរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងរដ្ឋមន្ត្រីក្រសួងធនធានទឹក និងឧតុនិយម ពិនិត្យដោះស្រាយករណី របស់អភិបាលខេត្តកំពង់ឆ្នាំង ពាក់ព័ន្ធភាពមិនប្រក្រតីមួយចំនួន ក្នុងការយកដីរបស់រដ្ឋចំនួន ៨កន្លែង ធ្វើជាកម្មសិទ្ធិផ្ទាល់ខ្លួន។

លោក ឈួរ ច័ន្ទឌឿន អភិបាលខេត្តកំពង់ឆ្នាំង

យោងតាមលិខិតរបស់ទីស្ដីការគណៈរដ្ឋមន្ត្រី ចុះថ្ងៃទី៤ ខែកញ្ញា ឆ្នាំ២០១៩ ដែលចុះហត្ថលេខា ដោយលោក ហ៊ីង ថូរ៉ាក់ស៊ី រដ្ឋលេខាធិការប្រចាំការនៃទីស្ដីការគណៈរដ្ឋមន្ត្រី បានជម្រាបទៅរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងរដ្ឋមន្ត្រីក្រសួងធនធានទឹក និងឧតុនិយម អំពីករណីរបាយការណ៍សង្ខេប លទ្ធផលស្រាវជ្រាវរបស់ប្រធានប្រតិភូគណបក្សខ្មែរក្រោក រកឃើញភាពមិនប្រក្រតី (តម្រុយនៃអំពើពុករលួយ) ធ្វើឲ្យប៉ះពាល់ធ្ងន់ធ្ងរដល់ប្រសិទ្ធភាពនៃការអនុវត្តអនុក្រឹត្យលេខ 183 អនក្រ បក ចុះថ្ងៃទី២ ខែកញ្ញា ឆ្នាំ២០១៦ និងដោយយោងចំណារដ៏ខ្ពង់ខ្ពស់របស់សម្ដេចនាយករដ្ឋមន្ត្រី ហ៊ុន សែន ចុះថ្ងៃទី២៦ ខែសីហា ឆ្នាំ២០១៩ និងលិខិតចុះថ្ងៃទី១៩ ខែកក្កដា ឆ្នាំ២០១៩ របស់លេខាធិការដ្ឋានឧត្តមក្រុមប្រឹក្សាពិគ្រោះ និងផ្ដល់យោបល់ ។

ទីស្ដីការគណៈរដ្ឋមន្ត្រី ជម្រាបជូនរដ្ឋមន្ត្រីក្រសួងទាំងពីរថា ពាក់ព័ន្ធភាពមិនប្រក្រតីនៃការអនុវត្តអនុក្រឹត្យលេខ 183 អនក្រ.បក ចុះថ្ងៃទី២ ខែកញ្ញា ឆ្នាំ២០១៦ ដែលបានលើកឡើងដោយប្រធានប្រតិភូគណបក្សខ្មែរក្រោក រាជរដ្ឋាភិបាលឯកភាពប្រគល់ជូន រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងរដ្ឋមន្ត្រីក្រសួងធនធានទឹក និងឧតុនិយម ពិនិត្យដោះស្រាយ។

ពាក់ព័ន្ធករណីនេះ អ្នកនាំពាក្យរដ្ឋបាលខេត្តកំពង់ឆ្នាំង បានចេញសេចក្តីប្រកាសព័ត៌មានមួយកាលពីថ្ងៃទី១៧ ខែកញ្ញា ឆ្នាំ២០១៩ បន្ទាប់ពីឃើញព័ត៌មានដែលផ្សព្វផ្សាយតាមគណនីហ្វេសប៊ុក ឈ្មោះ «William Guang» ដែលលើកឡើងថា លោក វីល្លាម ទម្លាយឯកសារដែលលោកអភិបាលខេត្តកំពង់ឆ្នាំង លេបយកដីរដ្ឋ ដីបន្ទាយទាហាន ៨កន្លែង មកធ្វើជាកម្មសិទ្ធិផ្ទាល់ខ្លួន។

អ្នកនាំពាក្យរដ្ឋបាលខេត្តបកស្រាយនូវចំណុចមួយចំនួនដូចខាងក្រោម៖

-ដីរដ្ឋ ដីសាធារណៈរបស់រដ្ឋ ដីឯកជនរបស់រដ្ឋ និងអចលនទ្រព្យរបស់រដ្ឋទូទាំងខេត្តកំពង់ឆ្នាំង ត្រូវបានចុះបញ្ជីគ្រប់គ្រងត្រឹមត្រូវតាមនីតិវិធី និងបែបបទ ដែលកំណត់ដោយរាជរដ្ឋាភិបាល ហើយគ្រប់គ្រងដោយក្រសួងស្ថាប័នថ្នាក់ជាតិ គណៈកម្មាធិការគ្រប់គ្រងទ្រព្យសម្បត្តិរដ្ឋថ្នាក់ខេត្ត និងមន្ទីរ/អង្គភាពសាមី។ ក្នុងមួយឆ្នាំ ត្រូវបានធ្វើអធិការកិច្ចផ្ទៀងផ្ទាត់យ៉ាងតិចមួយដង យ៉ាងទៀងទាត់ដោយមានការចូលរួមពីតំណាងក្រសួង/ស្ថាប័នធ្នាក់ជាតិ គណៈកម្មការគ្រប់គ្រងទ្រព្យសម្បត្តិរដ្ឋថ្នាក់ខេត្ត និងសាមីមន្ទីរ/អង្គភាព គ្រប់គ្រងផ្ទាល់ដោយផ្អែកលើបញ្ជីគ្របគ្រងជាគោល។

-ដោយឡែកដីឯកជនរបស់ប្រជាពលរដ្ឋ មន្រ្តីរាជការ និងសាធារណជនទូទៅ រដ្ឋបាលខេត្តបានជំរុញការចុះបញ្ជី និងផ្តល់កម្មសិទ្ធិតាមកម្មវិធីចុះបញ្ជីដាច់ដោយដុំ និងការចុះបញ្ជីជាលក្ខណៈប្រព័ន្ធ តាមយន្តការគណៈកម្មាធិការសុរិយោដីថ្នាក់ខេត្ត គណៈកម្មាធិការគ្រប់គ្រងដីរដ្ឋថ្នាក់ខេត្ត និងក្រុមការងារ ដោយអនុវត្តតាមនីតិវិធី និងបែបបទ ដែលណែនាំដោយក្រសួងរៀបចំដែនដី នគរូបនីយកម្ម និងសំណង់។ ប្រជាពលរដ្ឋ និងម្ចាស់ដីទាំងអស់ ដែលបានទទួលសិទ្ធិកាន់កាប់ដី មានសិទ្ធិលក់ ឬទិញ ឬដូរ ឬបញ្ចាំស្របតាមច្បាប់ជាធរមាន ដើម្បីចូលរួមអភិវឌ្ឍសេដ្ឋកិច្ចជាតិ និងលើកកម្ពស់ជីវភាពរស់នៅរបស់ខ្លួនម្នាក់ៗ។

បើតាមលោក សុខ សុវណ្ណវឌ្ឍនាសាប៊ុង ប្រធានគណបក្សខ្មែរក្រោក បានឲ្យដឹងថា ក្រោយសមាជិកឧត្តមក្រុមប្រឹក្សាប្រតិភូខ្មែរក្រោក បើកការស៊ើបអង្កេតពីរខែ កន្លងមក បានពិនិត្យឃើញបញ្ហាថ្មីៗបន្ថែមទៀត ក្នុងខេត្តកំពង់ឆ្នាំង បន្ទាប់ពីករណីមុន បានស្រាវជ្រាវរកឃើញ ម្ដងហើយ ចំពោះភាពមិនប្រក្រតីនៃការយកដីអនុក្រឹត្យ របស់រដ្ឋាភិបាលត្រូវប្រទានកម្មដល់ពលរដ្ឋទៅឱ្យក្រុមហ៊ុនឯកជនដោយចេញប្លង់ទាំងខុសនីតិវិធី។ ករណីមុនគឺបន្ទាប់ពីរាយការណ៍ផ្ទាល់ជូនសម្ដេចតេជោ ហ៊ុន សែន រាជរដ្ឋាភិបាលក៏ដាក់វិធានការចេញ សជណ លេខ ១២៩៦ ឱ្យពិនិត្យសាជាថ្មី៕

អត្ថបទ៖ សោភា