ពីអតីតកាលរុងរឿង បច្ចុប្បន្នថៅកែផលិតកម្ម KH Promotion លក់ទឹកសុទ្ធតាមចិញ្ចើមផ្លូវ

2019-09-20 09:13:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក គឹម ហេង ដែលស្គាល់ថាថៅកែផលិតកម្ម KH Promotion ដ៏ល្បីកាលជំនាន់ជិត២០ឆ្នាំមុន បានបាត់មុខឈឹងពីក្នុងសិល្បៈ ឥឡូវនេះស្រាប់តែត្រូវបានគេប្រទះឃើញទៅអង្គុយលក់ទឹកសុទ្ធ និងភេសជ្ជៈផ្សេងៗទៀតយ៉ាងសាមញ្ញនៅតំបន់ច្បារអំពៅ។

រូបថតចំនួន២សន្លឹក បង្ហាញថាលោក គឹម ហេង ស្លៀកខោខ្លីត្រឹមជង្គង់ ពាក់អាវយឺតមានក និងពាក់មួកអង្គុយលក់គ្រឿងភេសជ្ជៈ និងរបស់ប្រើប្រាស់ផ្សេងទៀតដូចជាម៉ាស់ជាដើម នៅតាមផ្លូវជាតិលេខ១ ហួសបុរីប៉េងហួតបន្តិច ។ ជាមួយគ្នាលោកបានសរសេរប្រាប់មិត្តភ័ក្ដិលើបណ្ដាញសង្គមរបស់លោកថា នេះគឺជាអាជីវកម្មថ្មីរបស់លោក ដោយទើបនឹងចាប់ផ្ដើមលក់ប៉ុណ្ណោះ ក្នុងនោះលោកបានចំណាយដើមទុនអស់ ៥០០ដុល្លារលើអាជីវកម្មនេះ និងបានជួលដីចំណែកមុខផ្ទះគេដើម្បីដំណើរការអាជីវកម្ម ១ខែ ១០០ដុល្លារ។

“មិនដឹងម៉េចម៉ាទេលោកអើយ សូមបងប្អូនធ្វើដំណើរតាមផ្លូវជាតិលេខ១ ហួសបុរីប៉េងហួតបន្តិច សូមជួយទិញខ្ញុំផង មានលក់ភេសជ្ជៈគ្រប់មុខ លក់តែរាយទេ អាវភ្លៀង ម៉ាសមុខ ជាពិសេសបងៗប្អូនៗសិល្បករ ក្រុមបច្ចេកទេសភាពយន្តដែលស្គាល់ខ្ញុំ ជិះកាត់កុំភ្លេចឈប់ ជួយទិញខ្ញុំផង"។ លោក គឹម ហេង ថ្លែង។

លោក គឹម ហេង គឺជាអតីតថៅកែផលិតកម្ម KH Promotion ជាផលិតកម្មវ័យចំណាស់មួយ និងបានបណ្ដុះបណ្ដាលធនធានសិល្បៈចម្រៀងជាច្រើន ក្នុងនោះដូចជា សុខ ស្រីនាង សុខ ពិសី ហ្សូណូ ជាដើម សុទ្ធតែមានការចាប់ផ្ដើមជាមួយផលិតកម្មចម្រៀងមួយនេះ។ យ៉ាងណាក្រោយមក ផលិតកម្មនេះក៏បានបិទទ្វារ ដោយមិនដឹងមូលហេតុច្បាស់លាស់កាលពីជាង១០ឆ្នាំមុន ហើយលោក គឹម ហេង ក៏បានបន្សាត់ខ្លួនចេញពីការងារសិល្បៈតាំងពីពេលនោះរហូតមក។

ក្រោយមកប៉ុន្មានឆ្នាំ ទើបគេដឹងថា លោកបានវិលត្រឡប់ទៅរស់នៅខេត្តបន្ទាយមានជ័យស្រុកកំណើតវិញ ដោយប្រកបរបរធ្វើចម្ការលើដីជាច្រើនហិកតាររបស់លោក ក្នុងជីវភាពជាកសិករយ៉ាងសាមញ្ញ ឈប់រវីរវល់នឹងរឿងនៅទីក្រុងបន្តទៀត។ ចម្ការរបស់លោកមានដំណាំជាច្រើនដូចជា ទ្រាប់ពុតញង ម្ទេស ល្ពៅ និងល្ហុង ជាដើម ដែលទាំងនេះ បានចាប់ផ្ដើមឲ្យផលហូរហែមកហើយ ក្រោយលោកបានតស៊ូមិនខ្លាចនឿយហត់ជាច្រើនឆ្នាំ។

ក្នុងរយៈពេលធ្វើចម្ការនៅបន្ទាយមានជ័យ លោក គឹម ហេង និងភរិយា ត្រូវបានគេដឹងថា រស់នៅបែកគ្នា ដោយម្នាក់នៅខេត្ត និងម្នាក់នៅរាជធានី។ យូរៗម្ដង ទើបគេឃើញលោក គឹម ហេង ឡើងមកលេងភរិយានៅភ្នំពេញ។ យ៉ាងណា ប្រមាណកន្លះឆ្នាំចុងក្រោយនេះ គេឃើញលោកឡើងចុះភ្នំពេញញឹកញាប់ ដែលតាមការសាកសួរ គឺលោកមានរឿងត្រូវដោះស្រាយ ក្រោយពេលលោក និងភរិយាបានបែកគ្នាហើយ។

អតីតថៅកែផលិតកម្មរូបនេះ ប្រាប់ថា លោកត្រូវភរិយាសុំលែងលះ ទាំងលោកមិនដឹងមូលហេតុច្បាស់ មិនដឹងថាភរិយាខឹង ឬអន់ចិត្តនឹងលោករឿងអី ហើយអ្វីៗបានកើតឡើងលឿនហួសពីការគិត។ "បងរកមូលហេតុមិនឃើញទេ បងសោកស្ដាយណាស់ មិនដឹងកំហុស...ឈឺចាប់ណាស់!"។ លោកថា ពិបាកទទួលយក ប៉ុន្តែលោកក៏គ្មានជម្រើសដែរ ហើយអ្វីៗក៏បានទៅហួសអស់ហើយ។ លោកសុំមិននិយាយវែងឆ្ងាយទៀតពីបញ្ហាក្នុងគ្រួសារ តែលោកថា ឥឡូវជាពេលដែលលោកត្រូវចាប់ផ្ដើមសារជាថ្មីទៀត តាមរយៈមុខរបរខាងលើ ដោយឡែកចម្ការនៅបន្ទាយមានជ័យ គឺផ្ញើឲ្យអ្នកជិតខាងឲ្យជួយមើលថែជំនួស។

បើទោះខ្សែជីវិតក្រឡាប់ចាក់ ១៨០ដឺក្រេ ធ្លាប់តែមានលុយរាប់ម៉ឺនដុល្លារក្នុងដៃ មានមុខមាត់ មានកិត្តិយសខ្ពង់ខ្ពស់ឥឡូវសល់តែសម្បកខ្លួន លុយកាក់ មាសប្រាក់ដុំកំភួនក៏គ្មាន ភរិយាក៏សុំបែក លោក គឹម ហេង នៅតែបង្ហាញជំហររឹងមាំ ក្នុងនោះលោកប្រាប់ថា លោកនៅមានបងប្អូន និងមិត្តភ័ក្ដិជាច្រើនទៀតដែលនៅយល់ចិត្ត ជាកម្លាំងឲ្យលោកបន្តដំណើរទៅមុខទៀត។ ដូច្នេះហើយ ជារឿយៗ គេឃើញលោកបង្ហោះរូបភាពញញឹមជានិច្ច ជាមួយសារលើកទឹកចិត្តខ្លួនឯងដូចជា "មានជីវិតត្រូវមានសង្ឃឹម" "ជីវិតមានន័យ" ជាដើម។

លោក គឹម ហេង លើកឡើងថា ពេលនេះ លោកពេញចិត្តនឹងអ្វីដែលលោកកំពុងតែមាន និងបន្តប្រឹងប្រែងបន្តទៀតសម្រាប់ជីវិតមួយនេះ មិនចុះចាញ់ឡើយ៕