អូស្ត្រាលី បន្តគាំទ្រដល់ការអភិវឌ្ឍនៅកម្ពុជា ក្នុងគោលដៅជំរុញ៣ចំណុច
- 2019-09-26 06:10:24
- ចំនួនមតិ 0 | ចំនួនចែករំលែក 0
អូស្ត្រាលី បន្តគាំទ្រដល់ការអភិវឌ្ឍនៅកម្ពុជា ក្នុងគោលដៅជំរុញ៣ចំណុច
ចន្លោះមិនឃើញ
កិច្ចប្រជុំពិគ្រោះយោបល់ថ្នាក់ឧត្តមមន្ត្រីលើកទី១ រវាងក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងក្រសួងការបរទេស និងពាណិជ្ជកម្មអូស្ត្រាលី ត្រូវបានរៀបចំឡើងនៅថ្ងៃទី១៦-១៧ ខែកញ្ញា ឆ្នាំ២០១៩ នៅទីក្រុងកង់បេរ៉ា ប្រទេសអូស្ត្រាលី។ លោកស្រី អ៊ាត សោភា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងលោក រីឆាត ម៉ូដ (Richard Maude) អនុរដ្ឋលេខាធិការ (Deputy Secretary) ក្រសួងការបរទេស និងពាណិជ្ជកម្មអូស្ត្រាលី បានធ្វើជាសហប្រធាននៃកិច្ចប្រជុំនេះ។
ភាគីអូស្ដ្រាលី បានបញ្ជាក់អំពីការបន្តគាំទ្របន្ថែមទៀតដល់ការអភិវឌ្ឍនៅកម្ពុជា តាមរយៈផែនការវិនិយោគលើជំនួយសម្រាប់ឆ្នាំ២០២០-២០២៤ ដែលមានគោលដៅជំរុញ (១) សេវាសាធារណៈប្រកបដោយនិរន្ដរភាព និងបរិយាប័ន្ន (២) កំណើនសេដ្ឋកិច្ចប្រកបដោយភាពរឹងមាំ និងបរិយាប័ន្ន និង (៣) ដំណើរការរៀបចំគោលនយោបាយសាធារណៈប្រកបដោយប្រសិទ្ធភាព និងតម្លាភាព។
ភាគីកម្ពុជា បានសម្ដែងនូវអំណរគុណយ៉ាងជ្រាលជ្រៅចំពោះអូស្ដ្រាលីដែលបានគាំទ្រដំណើរការសន្ដិភាពនៅកម្ពុជា និងការបន្ដផ្ដល់ជំនួយលើវិស័យសំខាន់ៗ រួមមាន ការអប់រំ ហេដ្ឋារចនាសម្ព័ន្ធ កសិកម្ម សុខាភិបាល ការបោសសម្អាតមីន យេនឌ័រ និងពិការភាព ការគ្រប់គ្រងហិរញ្ញវត្ថុសាធារណៈ ការគ្រប់គ្រងធនធានទឹក និងថាមពល។
ចំពោះទំនាក់ទំនងសេដ្ឋកិច្ច ភាគីទាំងពីរមានមតិស្របគ្នាថា នៅមានសក្ដានុពលច្រើន ដើម្បីជំរុញការផ្លាស់ប្ដូរពាណិជ្ជកម្ម វិនិយោគ និងទេសចរណ៍រវាងកម្ពុជា និងអូស្ដ្រាលី និងបានព្រមព្រៀងធ្វើការរួមគ្នាយ៉ាងជិតស្និទ្ធ រិះរកវិធី និងមធ្យោបាយនានាដើម្បីជំរុញវិស័យទាំងនេះឱ្យបានរីកចម្រើនបន្ថែមទៀត។ ភាគីទាំងពីរមានយោបល់ដូចគ្នាថា ការប្រាស្រ័យទាក់ទងគ្នារវាងប្រជាជន និងប្រជាជន នឹងលើកកម្ពស់ការយោគយល់គ្នា និងកិច្ចសហប្រតិបត្តិការដែលផ្តល់ផលប្រយោជន៍ទៅវិញទៅមកក្នុងវិស័យសេដ្ឋកិច្ចរវាងប្រទេសទាំងពីរ។
ចំពោះកិច្ចសហប្រតិបត្តិការក្នុងវិស័យសន្តិសុខ និងការពារជាតិ ភាគីទាំងពីរបានកត់សម្គាល់ពីកិច្ចសហប្រតិបត្តិការដ៏ល្អរវាងអូស្ត្រាលី និងកម្ពុជា ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន ដូចជាការជួញដូរមនុស្ស ការលាងលុយកខ្វក់ និងភេរវកម្ម អន្តោប្រវេសន៍ខុសច្បាប់ និងការគ្រប់គ្រងព្រំដែន ព្រមទាំងបានឯកភាពគ្នាពង្រឹងកិច្ចសហប្រតិបត្តិការក្នុងវិស័យទាំងនេះបន្ថែមទៀត។
ភាគីទាំងពីរក៏បានឯកភាពលើកកម្ពស់កិច្ចសហប្រតិបត្តិការ និងកិច្ចសន្ទនាជាទៀងទាត់ រវាងស្ថាប័នការពារជាតិរបស់ប្រទេសទាំងពីរ តាមរយៈយន្តការដែលមានស្រាប់។
កិច្ចប្រជុំក៏បានធ្វើការផ្លាស់ប្តូរយោបល់អំពីស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា និងលើការលើកកម្ពស់កិច្ចសហប្រតិបត្តិការ និងកិច្ចសន្ទនារវាងកម្ពុជា និងអូស្ដ្រាលី លើវិស័យសិទ្ធិមនុស្ស និងដំណើរការប្រជាធិបតេយ្យ។
ក្រៅពីទំនាក់ទំនងទ្វេភាគី កិច្ចប្រជុំបានផ្លាស់ប្តូរយោបល់គ្នាលើបញ្ហាតំបន់ និងអន្តរជាតិដែលរួមមាន កិច្ចសហប្រតិបត្តិការក្រោមក្របខ័ណ្ឌអនុតំបន់មេគង្គ និងអាស៊ាន ការត្រៀមរៀបចំកិច្ចប្រជុំកំពូលអាស៊ី-អឺរ៉ុបលើកទី១៣ ការចរចាលើកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP) ដែលភាគីទាំងពីរមានជំហរដូចគ្នាថាគួរតែសម្រេចឱ្យបានឆាប់បំផុត បញ្ហាសមុទ្រចិនខាងត្បូង គំនិតផ្តួចផ្តើមឥណ្ឌូ-ប៉ាស៊ីហ្វិក បញ្ហាកូរ៉េខាងជើង និងសង្គ្រាមពាណិជ្ជកម្មរវាងអាមេរិក-ចិន។
គណៈប្រតិភូកម្ពុជាក៏បានចូលរួមកិច្ចសន្ទនាតុមូលស្តីពី “ស្ត្រីក្នុងភាពជាអ្នកដឹកនាំ” ដែលរៀបចំដោយ លោកជំទាវ ភេនី វីលាម (Penny Williams) អនុរដ្ឋលេខាធិការនៃក្រសួងការបរទេស និងពាណិជ្ជកម្មអូស្ត្រាលី។ ភាគីកម្ពុជាបានថ្លែងអំណរគុណភាគីអូស្ត្រាលី ដែលបានផ្តល់បដិសណ្ឋារកិច្ចដ៏កក់ក្ដៅ ក្នុងអំឡុងពេលគណៈប្រតិភូស្នាក់នៅទីក្រុងកង់បេរ៉ា និងបានព្រមព្រៀងជាមួយភាគីអូស្ត្រាលីថានឹងរៀបចំកិច្ចប្រជុំពិគ្រោះយោបល់ថ្នាក់ឧត្តមមន្ត្រីលើកក្រោយ ក្នុងឆ្នាំ២០២០៕