សហរដ្ឋអាមេរិកប្រកាសដាក់ពង្រាយទ័ពទៅដើម្បីប្រឆាំងការគំរាមគំហែងពីអ៊ីរ៉ង

2019-10-12 09:44:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សហរដ្ឋអាមេរិកកាលពីថ្ងៃសុក្រទី១១ ខែតុលា បានប្រកាសដាក់ពង្រាយទ័ពបន្ថែមនៅប្រទេសអារ៉ាប៊ីសាអ៊ូឌីតដើម្បីជួយការពារប្រទេសនេះក្រោយពីការពីការវាយប្រហារលើហេដ្ឋារចនាសម្ព័ន្ធផលិតប្រេងពីរកន្លែងកាលពីខែកញ្ញា ដែលប្រទេសទាំងពីរចោទអ៊ីរ៉ង់ថា នៅពីក្រោយនៃការវាយប្រហារនេះ។

ទាហានអាមេរិកចុះយន្តហោះនៅដែនដីអារ៉ាប៊ីសាអ៊ូឌីត

មន្ទីបញ្ចកោណបាននិយាយថា ការដាក់ពង្រាយនឹងរួមមានការបញ្ជូនយន្តហោះសង្គ្រាម និងកងកម្លាំងការពារដែនអាកាស។ កាលពីខែមុនអាមេរិចបានបញ្ជូនទ័ពទៅចំនួន ២០០ នាក់ ហើយសរុបជាមួយការដាក់ពង្រាយលើកនេះទាំងអស់មានទាហានអាមេរិកចំនួន ៣០០០ នាក់ នៅក្នុងប្រទេសអារ៉ាប៊ីសាអ៊ូឌីត។

អាមេរិកក៏នឹងមានដាក់បន្ថែមប្រព័ន្ធការពារដែនអាកាស Patriot ចំនួនពីរ ហើយនឹងដាក់ដំណើរការប្រព័ន្ធ Terminal High Altitude Area Defense (THAAD) ជាលើកដំបូងក្នុងប្រទេសអារ៉ាប៊ីសាអ៊ូឌីតផងដែរ៕

ទាហានអាមេរិកស្តុកគ្រាប់មីស៊ីលថ្មីសម្រាប់ប្រព័ន្ធការពារដែនអាកាស Patroit

រដ្ឋមន្ត្រីការពារជាតិអាមេរិកលោក Mike Esper បាននិយាយថាអាមេរិកបញ្ជូនទ័ពទៅអារ៉ាប៊ីសាអ៊ូឌីតគឺដើម្បីកុំឲ្យអ៊ីរ៉ង់ហ៊ានវាយប្រហារគេទៀត។ លោក Esperបានប្រាប់៖ «អ្នកយើងគិតថាវាចាំបាច់ក្នុងការបន្តពង្រាយកម្លាំងដើម្បីរារាំងនិងការពារនិងបញ្ជូនសារទៅអ៊ីរ៉ង់ថា៖ កុំវាយប្រហាររដ្ឋអធិបតេយ្យផ្សេងទៀត កុំគំរាមផលប្រយោជន៍របស់អាមេរិក កងកម្លាំងអាមេរិក ឬយើងនឹងឆ្លើយតប។

អ៊ីរ៉ង់បានបង្ហាញភាពភ័យក្លាចថានឹងមានអ្វីអាក្រក់មួយអាចនឹងកើតឡើង ក្រោយពីការដាក់ពង្រាយទ័ពអាមេរិកកាលពីមុនៗ។ អ៊ីរ៉ង់បានច្រានចោលការចោតប្រកាន់ថាខ្លួនជាអ្នកវាយប្រហាររោងចក្រប្រេងហើយក៏ច្រានចោលការចោតប្រកាន់ការវាយប្រហារនាវាដឹកប្រេងកាលពីដើមឆ្នាំនេះ។

ភាពតានតឹងរវាងអ៊ីរ៉ង់នឹងអាមេរិកបានកើនឡើងតាំងពីប្រធានាធិបតីសហរដ្ឋអាមេរិក លោក ដូណាល់ ត្រាំបានដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ និងព្រមទាំងដាក់បន្ថែមទណ្ឌកម្មសេដ្ឋកិច្ចទៀត។

ប្រភព៖ Reuters ប្រែសម្រួល៖ សុខ វេងឈាង