ជប៉ុនផ្តល់ជំនួយជាង ៣លានដុល្លារសំរាប់កម្មវិធីផ្តល់ស្បៀងអាហារនៅតាមសាលារៀន
- 2019-10-18 03:01:29
- ចំនួនមតិ 0 | ចំនួនចែករំលែក 0
ជប៉ុនផ្តល់ជំនួយជាង ៣លានដុល្លារសំរាប់កម្មវិធីផ្តល់ស្បៀងអាហារនៅតាមសាលារៀន
ចន្លោះមិនឃើញ
រដ្ឋាភិបាលជប៉ុនបានផ្តល់ជំនួយឥតសំណងចំនួន ៣៥០លានយ៉េនជប៉ុន (ស្មើនឹង ៣,១៨លានដុល្លារ) ជូនដល់រាជរដ្ឋាភិបាលកម្ពុជា តាមរយៈកម្មវិធីស្បៀងអាហារពិភពលោក ក្នុងគោលបំណងរួមចំណែកដល់ការអនុវត្តកម្មវិធីផ្ដល់ស្បៀងអាហារនៅតាមសាលារៀនសម្រាប់កុមារនៅក្នុងសហគមន៍ដែលងាយរងគ្រោះ។ កម្មវិធីស្បៀងអាហារពិភពលោកនិងប្រើប្រាស់ថវិកាជំនួយនេះ ទិញត្រីខកំប៉ុងដែលផលិតនៅប្រទេសជប៉ុនមានបរិមាណ សរុបចំនួន ៤១៥តោន សម្រាប់កម្មវិធីផ្ដល់ស្បៀងអាហារនៅតាមសាលារៀន។
ពិធីចុះហត្ថលេខានេះ ធ្វើឡើងក្រោមអធិបតីភាពដោយលោកបណ្ឌិតសភាចារ្យ ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា លោក Mikami Masahiro ឯកអគ្គរាជទូតជប៉ុនប្រចាំកម្ពុជា និងលោកស្រី Francesca Erdelmann នាយិកាកម្មវិធីស្បៀងអាហារពិភពលោកប្រចាំប្រទេសកម្ពុជា។ កាលពីថ្ងៃទី១៧ ខែតុលា នៅក្រសួងអប់រំ យុវជន និងកីឡា។
លោកស្រី Francesca Erdelmann បានថ្លែងថា កម្មវិធីផ្តល់អាហារសម្រាប់កុមារនេះ បានរួមចំណែកយ៉ាងច្រើនដល់ការកែលម្អឲ្យកាន់តែ ប្រសើរលើការចុះឈ្មោះចូលរៀន ការចូលរៀនទៀងទាត់ និងការបន្តសិក្សារយៈពេលវែងរបស់សិស្ស ជាពិសេសកុមារដែលមកពីគ្រួសារក្រីក្របំផុត។ លោកស្រីបន្តថា ត្រីខកំប៉ុងដែលផ្តល់ដោយជប៉ុននេះ ក៏ជាការបន្ថែមនូវគុណប្រយោជន៍ខ្ពស់ក្នុងកញ្ចប់អាហារពេលព្រឹករបស់សិស្ស និងទទួលបានការកោតសរសើរពីកុមារ ដោយមានការបន្ថែមនូវប្រូតេអ៊ីននិងមីក្រូសារជាតិសំខាន់ៗក្នុងអាហារ ដូច្នេះវាអាចជួយដល់សុខមាលភាពរបស់កុមារ និងការរីកលូតលាស់សារពាង្គកាយជាបន្តបន្ទាប់របស់ពួកគេផងដែរ។
ចំណែកលោកបណ្ឌិតសភាចារ្យ ហង់ ជួនណារ៉ុន បានថ្លែងថា តាមរយៈជំនួយឥតសំណងនេះ នឹងត្រូវប្រើប្រាស់សម្រាប់ទិញត្រីខកំប៉ុង អំបិលអីយ៉ូត និងបន្លែជាដើម សម្រាប់រៀបចំជាអាហារពេលព្រឹកដល់សិស្សសាលាបឋមសិក្សាប្រមាណ ២១៧,៩០០នាក់ ក្នុងខេត្តគោលដៅចំនួន៥ រួមមាន ខេត្តកំពង់ធំ សៀមរាប កំពង់ឆ្នាំង ពោធិ៍សាត់ និងឧត្តរមានជ័យ ខណៈដែលរាជរដ្ឋាភិបាលកម្ពុជា ក៏បានផ្ដល់អង្ករបន្ថែមចំនួន២ពាន់តោនក្នុងមួយឆ្នាំក្នុងកម្មវិធីស្បៀងអាហារសម្រាប់សិស្ស៕