អាជ្ញាធររាជធានីភ្នំពេញ គ្រោងសង់ផ្លូវក្រោមដី២កន្លែងទៀត

2019-10-18 06:24:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធររាជធានីភ្នំពេញ ចាប់ផ្តើមសិក្សាគម្រោងស្ថាបនាផ្លូវក្រោមដីថ្មីចំនួន២ខ្សែបន្ថែមទៀត នៅក្នុងភូមិសាស្រ្តរាជធានីភ្នំពេញ ដើម្បីសម្រួលដល់ការធ្វើដំណើររបស់ប្រជាពលរដ្ឋ។ នេះបើតាមការចុះផ្សាយរបស់ក្រសួងព័ត៌មាន។

ថ្លែងក្នុងកិច្ចប្រជុំកាលពីថ្ងៃទី១៧ ខែតុលា ឆ្នាំ២០១៩ លោក ឃួង ស្រេង អភិបាលរាជធានីភ្នំពេញ បានបញ្ជាក់ថា គម្រោងស្ថាបនាផ្លូវក្រោមដីថ្មីទាំង២ខ្សែនេះ គឺស្ថិតក្រោមផ្លូវសហព័ន្ធរុស្ស៊ី គឺម្តុំមុខវិទ្យាស្ថានភាសាបរទេស (IFL) និងម្តុំក្តាន់២ ខណៈដែលតំបន់ទាំង២នេះ កំពុងតែប្រឈមនឹងការកកស្ទះចរាចរណ៍ជាប្រចាំស្ទើជារៀងរាល់ថ្ងៃ។

រូបថត៖ រដ្ឋបាលរាជធានីភ្នំពេញ

បើតាមលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ឱ្យដឹងថា ចំពោះគម្រោងស្ថាបនាផ្លូវក្រោមដីត្រង់មុខសាលា IFL គឺរត់ពីក្រោមផ្លូវសហព័ន្ធរុស្ស៊ី ដោយតភ្ជាប់ពីផ្លូវលេខ២៦១ ឆ្ពោះចូលទៅក្នុងសាលានេះតែម្តង ដែលបង្កលក្ខណៈងាយស្រួលដល់និស្សិត បានចេញចូលមិនប្រឈមនឹងការកកស្ទះ ឬគ្រោះថ្នាក់ចរាចរណ៍ជាដើម។ ចំណែកនៅម្តុំក្តាន់២វិញ ផ្លូវក្រោមដីនេះ ក៏ត្រូវរត់ពីក្រោមផ្លូវសហព័ន្ធរុស្ស៊ីផងដែរ ដោយភ្ជាប់ពីផ្លូវ ១៦៩ ឆ្ពោះទៅផ្លូវបឹងកក៕

ប្រភព៖ ក្រសួងព័ត៌មាន