ប៉ូលិសកម្ពុជា ចាប់ខ្លួនអតីតនាយកសាលាហ្សាម៉ាន់ជាប់ពាក់ព័ន្ធនឹងការផ្តួលរំលំរដ្ឋាភិបាលតួកគី

2019-10-22 01:33:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អតីតនាយកសាលាហ្សាម៉ាន់ លោក អូស្មាន់ ការាខា (ជនជាតិតួកគី) បានរងការចាប់ខ្លួននៅក្នុងប្រទេសកម្ពុជា ពាក់ព័ន្ធនឹងអំពើភេរវកម្មដែលប៉ុនប៉ងផ្តួលរំលំរដ្ឋាភិបាលប្រទេសតួកគី ក្នុងរដ្ឋប្រហារមិនបានសម្រេចមួយកាលពីឆ្នាំ ២០១៦។ បន្ទាប់ពីការចាប់ខ្លួន ជនសង្ស័យរូបនេះត្រូវបានបញ្ជូនខ្លួនទៅកាន់ប្រទេសតួកគីដើម្បីទទួលទោស។

លោក អូស្មាន់ ការាខា (ជនជាតិតួកគី) ជាអតីតនាយកសាលាហ្សាម៉ាន់

អតីតនាយកសាលាហ្សាម៉ាន់ លោក អូស្មាន់ ការាខា ត្រូវបានរងការចាប់ខ្លួនកាលពីថ្ងៃទី១៤ ខែតុលា ឆ្នាំ២០១៩ សង្ស័យជាប់ពាក់ព័ន្ធនឹងអំពើភេរវកម្មនៅតួកគី កាលពីឆ្នាំ២០១៦ ដែលបង្កឡើងដោយក្រុមចលនា របស់ លោកហ្វេធូឡា ហ្គូឡិន ដែលជាក្រុមរដ្ឋាភិបាលតួកគី បានចោទថា ជាក្រុមភេរវកម្ម ដែលប៉ុនប៉ងផ្ដួលរំលំរដ្ឋាភិបាលក្រុងអង់ការ៉ា ក្នុងរដ្ឋប្រហារមិនបានសម្រេចមួយកាលពីឆ្នាំ២០១៦។

ទូរទស្សន៍ Aljazeera បានចុះផ្សាយកាលពីថ្ងៃទី២០ ខែតុលា បានបញ្ជាក់ថា លោក អូស្មាន់ ការាខា ត្រូវបាននាំទៅឃុំខ្លួននៅប្រទេសតួកគី ក្រោមបទចោទ បង្កើតនិងរៀបចំផែនការរដ្ឋប្រហារ ជាមួយបណ្ដាញភេរវកម្មមួយ ដឹកនាំដោយលោកហ្វេធូឡា ហ្គូឡិន ដែលកំពុងនិរទេសខ្លួននៅសហរដ្ឋអាមេរិក។

ទាក់ទងករណីនេះ នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានខ្លីៗកាលពីព្រលប់ថ្ងៃទី២១ ខែតុលា ថា “តួកគីបានបង្ហាញភស្តុតាងអំពីការចូលរួមរបស់លោកលោក អូស្មាន់ ការាខា ដូច្នេះត្រូវតែឲ្យគាត់ទៅទទួលទោសនៅស្រុកគាត់ ដោយខាងកម្ពុជាបានចាប់ខ្លួន ហើយបានប្រគល់ឲ្យតួកគី។ ជាគោលការណ៍យើងចាប់ខ្លួនគាត់តាមសំណើរបស់តួកគី ដែលគេបានបង្ហាញភស្តុតាងថា គាត់មានការពាក់ព័ន្ធប្រព្រឹត្តបទល្មើសនៅស្រុកគាត់មែន”។

នាយឧត្តមសេនី ខៀវ សុភ័គ អ្នកនាំពាក្យក្រសួងមហាផ្ទៃ

ចំណែកលោកឧត្តមសេនីយ៍ឯក ឆាយ គឹមខឿន អគ្គស្នងការរងនគរបាលជាតិ និងជាអ្នកនាំពាក្យបានបញ្ជាក់ប្រាប់ខ្លីៗ កាលពីព្រលប់ថ្ងៃទី២១ ខែតុលា ថា លោក អូស្មាន់ ការាខា ត្រូវបានចាប់តាមសំណើរបស់តួកគី កាលពីថ្ងៃទី១៤ ខែតុលា ឆ្នាំ២០១៩ ពីបទពាក់ព័ន្ធភេរវកម្ម។ ហើយបានបញ្ជូនទៅតួកគីកាលពីថ្ងៃទី១៨ ខែតុលា ឆ្នាំ២០១៩។

គួររំលឹកថា ក្រសួងមហាផ្ទៃនៃប្រទេសកម្ពុជា និងក្រសួងមហាផ្ទៃ នៃប្រទេសតួកគី កាលពីចុងខែកក្កដា ឆ្នាំ២០១៩ បានចុះកិច្ចព្រមព្រៀងរវាងគ្នាស្តីពីកិច្ចសហប្រតិបត្តិការលើវិស័យសន្តិសុខរវាងប្រទេសទាំង២។ កិច្ចព្រមព្រៀង ទាំងនោះត្រូវគេពណ៌នាថា បានដើរតួនាទីជាមូលដ្ឋានយ៉ាងសំខាន់ក្នុងការបង្កើតនូវក្របខណ្ឌរួមសម្រាប់ ពង្រឹង កិច្ចសហប្រតិបត្តិការសន្តិសុខរវាងប្រទេសទាំង២ ដោយផ្តោតទៅលើឧក្រិដ្ឋកម្មឆ្លងដែននិងឧក្រិដ្ឋកម្មមានអង្គ ការចាត់តាំង ជាពិសេសការប្រយុទ្ធប្រឆាំងអំពើភេរវកម្ម៕

អត្ថបទ៖ ម៉េងងី