ធនាគារដែលផ្តល់កម្ចីឱ្យសង់ផ្លូវល្បឿនលឿននៅកម្ពុជា ត្រូវរដ្ឋមន្រ្តីសាធារណការ ស្នើឱ្យជួយរឿង២ទៀត
- 2019-10-25 02:07:04
- ចំនួនមតិ 0 | ចំនួនចែករំលែក 0
ធនាគារដែលផ្តល់កម្ចីឱ្យសង់ផ្លូវល្បឿនលឿននៅកម្ពុជា ត្រូវរដ្ឋមន្រ្តីសាធារណការ ស្នើឱ្យជួយរឿង២ទៀត
ចន្លោះមិនឃើញ
លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានស្នើឱ្យធនាគារអភិវឌ្ឍន៍ចិន (CDB) ពិនិត្យមើលកិច្ចសហប្រតិបត្តិការ បន្ថែមទៀតលើគម្រោងវិនិយោគចិននៅកម្ពុជា ដែលទាក់ទងនឹងហេដ្ឋារចនាសម្ព័ន្ធផ្លូវថ្នល់ ផ្លូវល្បឿនលឿន ការអភិវឌ្ឍកំពង់ផែ ការដឹកជញ្ជូនផ្លូវដែក និងប្រព័ន្ធដឹកជញ្ជូនក្នុងទីក្រុង ជាពិសេសការដឹកជញ្ជូនតាមផ្លូវទឹក។
លោកទេសរដ្ឋមន្រ្តី ក៏បានស្នើឱ្យធនាគារនេះ ពិនិត្យលទ្ធភាពផ្តល់ការគាំទ្រផ្នែកហិរញ្ញវត្ថុ លើយុទ្ធនាការផ្សព្វផ្សាយសាធារណៈអំពីគ្រោះថ្នាក់ចរាចរណ៍ ការផ្សព្វផ្សាយតាមទូរទស្សន៍ពីផលលំបាក និងការខាតបង់ដោយសារគ្រោះថ្នាក់ចរាចរណ៍ យុទ្ធនាការចែកមួកសុវត្ថិភាពចរាចរណ៍ និងយុទ្ធនាការផ្សេងៗថែមទៀត ដើម្បីកាត់បន្ថយគ្រោះថ្នាក់ចរាចរណ៍។
សំណើខាងលើនេះ ក្នុងអំឡុងជំនួបពិភាក្សារវាងលោក ស៊ុន ចាន់ថុល និងគណៈប្រតិភូមកពីធនាគារ CDB ដឹកនាំដោយលោក Mei Shiwen នាយកចាត់ការទូទៅរបស់ CDB សាខាខេត្តក្វាងស៊ី កាលពីថ្ងៃទី២៤ ខែតុលា ឆ្នាំ២០១៩។
សូមជម្រាបថា ធនាគារអភិវឌ្ឍន៍ចិន (CDB) ជាធនាគារឯកជនរបស់រដ្ឋក្រោមការដឹកនាំផ្ទាល់ពី ក្រុមប្រឹក្សារដ្ឋចិន បច្ចុប្បន្នធនាគារCDB បានផ្តល់ហិរញ្ញប្បទានដល់គម្រោងធំៗចំនួនពីរនៅកម្ពុជាគឺ គម្រោងផ្លូវល្បឿនលឿនភ្នំពេញ-ក្រុងព្រះសីហនុ និងគម្រោងព្រលានយន្តហោះសៀមរាបថ្មី។ លើសពីនេះទៀត CDB ចាប់អារម្មណ៍ក្នុងការវិនិយោគលើអាកាសយានដ្ឋានភ្នំពេញថ្មី និងការអភិវឌ្ឍមជ្ឈមណ្ឌលភស្តុភារកម្ម និងកំពង់ផែក្រុងព្រះសីហនុផងដែរ៕
អត្ថបទ និងរូបថត៖ ក្រសួងសាធារណការ និងដឹកជញ្ជូន