ដូណាល់ ត្រាំ បង្ហោះរូបកាត់តជាមួយឆ្កែ១ក្បាល ហើយសរសេរថា "វីរបុរសអាមេរិក"

2019-11-01 04:12:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីអាមេរិក បានបង្ហោះរូបថតមួយសន្លឹកនៅលើបណ្ដាញសង្គម Twitter កាលពីថ្ងៃទី៣១តុលាម្សិលមិញ ដែលនោះគឺជារូបភាពកាត់តអំពីសកម្មភាពរបស់លោកកំពុងជូនមេដាយកិត្តិយសឲ្យទៅសត្វសុនខមួយក្បាល។ បើយោងតាមសារព័ត៌មាន Daily Mail សុនខនោះមានឈ្មោះថា Conan ជាសត្វចិញ្ចឹមយោធាដែលបានចូលរួមនៅក្នុងបេសកកម្មកម្ចាត់មេដឹកនាំក្រុមឧទ្ទាមជ្រុលនិយម ISIS លោក Abu Bakr al-Baghdadi កាលពីពេលថ្មីៗកន្លងទៅ។ បន្ថែមពីនេះ លោក ដូណាល់ ត្រាំ ក៏បានបង្ហោះសារនៅពីលើរូបថតនោះថា "វីរបុរសអាមេរិក"។

រូបថតកាត់តដែលលោក ត្រាំ បានបង្ហោះនៅលើ Twitter

សារព័ត៌មាន Daily Mail បានបញ្ជាក់ថា រូបថតកាត់តខាងលើជារូបដែលកែច្នៃពីរូបដើម ដែលលោក ដូណាល់ ត្រាំ បានប្រគល់មេដាយជូនយោធាជើងចាស់មួយរូបឈ្មោះ McCloughan កាលពីឆ្នាំ២០១៧។ ពាក់ព័ន្ធនឹងការយករូបទៅកាត់តជំនួសដោយសុនខមួយក្បាលវិញ លោក McCloughan បានឆ្លើយតបថា លោកមិនបានបណ្ដុះកូនចិត្តប្រកាន់ខឹងឡើយ ផ្ទុយទៅវិញលោកបែរជាយល់ឃើញថា វាជាការគោរពយ៉ាងសមហេតុសមផលចំពោះសុនខ Conan នៅក្នុងប្រតិបត្តិការបង្ក្រាបក្រុមឧទ្ទាម។ លោក McCloughan បានថ្លែងបា្រប់សារព័ត៌មាន New York Times ថា៖ "នេះគឺជាការទទួលស្គាល់ថាសុនខនេះគឺជាផ្នែកមួយនៃក្រុមវីរបុរសក្លាហាន"។

រូបថតដើមរបស់លោក McCloughan (ស្ដាំ)/ ប្រភពរូប៖ ABC

នៅក្នុងសារបង្ហោះបន្ទាប់លើ Twitter របស់លោកប្រធានាធិបតី ដូណាល់ ត្រាំ បានបង្ហើបថា សុនខយោធា Conan នឹងមកធ្វើទស្សនកិច្ចយ៉ាងពិតប្រាកដមួយនៅសេតវិមាន នាអំឡុងសប្ដាហ៍ក្រោយនេះ។ យ៉ាងណាមិញ លោកមិនបានបង្ហើបថានឹងមានការប្រគល់ជូនមេដាយកិត្តិយស ឬយ៉ាងណានោះទេ៕

ប្រភព៖ Dailymail ប្រែសម្រួល៖ ឈាង.