ត្រឹមឆ្នាំ ២០២០ ចំនួនអ្នកស្លាប់ដោយគ្រោះថ្នាក់ចរាចរណ៍មានចំនួនក្រោម ២ពាន់នាក់
- 2019-11-25 03:05:50
- ចំនួនមតិ 0 | ចំនួនចែករំលែក 0
ត្រឹមឆ្នាំ ២០២០ ចំនួនអ្នកស្លាប់ដោយគ្រោះថ្នាក់ចរាចរណ៍មានចំនួនក្រោម ២ពាន់នាក់
ចន្លោះមិនឃើញ
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជា ប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានបញ្ជាក់ថា ជាក់ស្ដែងក្នុងអនុវត្តផែនការសកម្មភាពជាតិ សុវត្ថិភាពចរាចរណ៍ផ្លូវគោករយៈពេល១០ឆ្នាំ (២០១០-២០២០) គ.ស.ច.គ បានខិតខំធ្វើការទប់ស្កាត់ចំនួនអ្នកស្លាប់នៅត្រឹមក្រោម ២ ០០០នាក់ មិនឱ្យកើនអ្នកស្លាប់ដូចដែលអ្នកជំនាញសុវត្ថិភាពចរាចរណ៍បានព្យាករណ៍ទុក ៣ ២០០នាក់ នៅឆ្នាំ២០២០។ ការបញ្ជាក់នេះ នៅក្នុងទិវារំលឹកជនរងគ្រោះ ដោយគ្រោះថ្នាក់ចរាចរណ៍ផ្លូវគោក លើកទី១៤ នៅព្រឹកថ្ងៃទី២៤ ខែវិច្ឆិកា ឆ្នាំ២០១៩ នៅកោះពេជ្រ។
នេះជាលទ្ធផលប្រកបដោយផ្លែផ្កា ក្នុងការសង្គ្រោះជីវិតប្រជាពលរដ្ឋ និងជាការរួមចំណែកយ៉ាងសំខាន់ដល់ការអនុវត្តផែនការទស្សវត្ស របស់អង្គការសហប្រជាជាតិស្តីពីសវត្ថិភាពចរាចរណ៍។
សម្តេចក្រឡាហោមបឆនបន្តថា ក្នុងរយៈពេល ៩ ខែនៃឆ្នាំ២០១៩ គ្រោះថ្នាក់ចរាចរណ៍បានកើតឡើងចំនួន ៣ ១៥៩លើក បណ្តាលឱ្យបាត់បង់ជីវិតចំនួន ១ ៥២១នាក់ និងរបួស ៤ ៧២១ នាក់ គិតជាមធ្យមគឺស្លាប់ជាង ៥នាក់ និងរបួស១៧ នាក់ក្នុងមួយថ្ងៃ។ មូលហេតុចម្បងដែល បង្កឱ្យមានគ្រោះថ្នាក់ចរាចរណ៍ ភាគច្រើនលើសលប់ដោយអ្នកបើកបរ យានយន្តមិនគោរពច្បាប់ បង្កគ្រោះថ្នាក់ដោយការបើកបរលើសល្បឿនកំណត់ ៣៧% មិនគោរពសិទ្ធិ២៤% មិនប្រកាន់ស្ដាំ ១២% វ៉ាជែង៩% បត់៨% ស្រវឹង៦% កត្តាយានយន្ត៣% និងងងុយ១% ។
ភាគច្រើន នៃជន រងគ្រោះដែលស្លាប់ គឺជាអ្នកប្រើប្រាស់ម៉ូតូមានរហូតដល់ទៅ ៧៦% ក្នុងនោះមិនពាក់មួកសុវត្ថិភាព ៧៦%។ គ្រោះថ្នាក់ទាំងនេះ បានកើតឡើងនៅពេលយប់ចំនួន ៥៤% និងពេលថ្ងៃចំនួន ៤៦% ហើយបានបង្កឡើងដោយអ្នកបើកបរម៉ូតូចំនួន ៥០% អ្នកបើកបររថយន្តធុនស្រាលចំនួន ៣០% និងអ្នកបើកបររថយន្តធុនធ្ងន់ ចំនួន២០%។
ដោយឡែក នៅរាជធានីភ្នំពេញគ្រោះថ្នាក់កើតឡើង នៅពេលយប់មានអត្រាខ្ពស់ដល់ទៅ ៧២% បណ្តាលឱ្យមានជនរងគ្រោះជាច្រើនជាងខេត្តនានា និងបង្កឱ្យខូចខាតទ្រព្យសម្បត្តិសាធារណៈ ដូចជា របាំងចែកទ្រូងផ្លូវ បង្គោលភ្លើង ផ្លាកសញ្ញាចរាចរណ៍ បង្កាន់ដៃស្ពាន សួនច្បារ របង។
តាមការប៉ាន់ប្រមាណគ្រោះថ្នាក់ចរាចរណ៍បានធ្វើឱ្យប្រទេសកម្ពុជាយើងខាតបង់ថវិកា ក្នុងមួយឆ្នាំៗ ជាច្រើនលានដុល្លារ ដោយមិនគិតផលលំបាកសង្គមដូចជាការបន្សល់ទុកជនពិការកុមារកំព្រា ស្ត្រីមេម៉ាយ និងធ្វើឱ្យគ្រួសារមួយចំនួនធ្លាក់ទៅក្នុងភាពក្រីក្រ ដែលបណ្តាលឱ្យប៉ះពាល់ដល់ការខិតខំប្រឹងប្រែង របស់រាជរដ្ឋាភិបាល ក្នុងការកាត់បន្ថយភាពក្រីក្ររបស់ប្រជាពលរដ្ឋ។
សម្តេចក្រឡាហោម សូមយកឱកាសនៃការប្រារព្ធពិធីទិវារំលឹកដល់ជនរងគ្រោះ ដោយគ្រោះថ្នាក់ ចរាចរណ៍ផ្លូវគោកលើកទី១៤ នេះ បញ្ជាក់ជូនថា គ.ស.ច.គ បានប្តេជ្ញាចិត្តជំរុញការរក្សាសុវត្ថិភាព ចរាចរណ៍ផ្លូវគោក ឱ្យទទួលបានជោគជ័យ ដើម្បីសង្គ្រោះជីវិតមនុស្សធានាមិនឱ្យប្រជាពលរដ្ឋធ្លាក់ ទៅក្នុងភាពក្រីក្រ និងធានាឱ្យសង្គមជាតិ មានសុន្តិសុខ សន្តិភាពសណ្តាប់ធ្នាប់ និងការអភិវឌ្ឍ ប្រកបដោយចរិភាព៕