រដ្ឋមន្រ្តីការបរទេស ប្រាប់និស្សិតដែលទៅរៀននៅបរទេសថា ត្រូវដើរតួដូចជាឯកអគ្គរាជទូត
- 2019-12-03 04:42:01
- ចំនួនមតិ 0 | ចំនួនចែករំលែក 0
រដ្ឋមន្រ្តីការបរទេស ប្រាប់និស្សិតដែលទៅរៀននៅបរទេសថា ត្រូវដើរតួដូចជាឯកអគ្គរាជទូត
ចន្លោះមិនឃើញ
លោកឧបនាយករដ្ឋមន្រ្តី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានជួបនិស្សិតអាហារូបករណ៍ចំនួន៣៧នាក់ ដែលក្នុងនោះមាននិស្សិតអាហារូបករណ៍អូស្រ្តាលី ចំនួន២១ នាក់ និងនិស្សិតអាហារូបករណ៍ណូវែលហ្សេឡង់ ចំនួន១៦នាក់ នៅព្រឹកថ្ងៃទី៣ ខែធ្នូ ឆ្នាំ២០១៩ នៅទីស្តីការក្រសួង។
លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងប្រាប់ក្រុមអ្នកកាសែតថា នៅក្នុងការសំណេះសំណាលនេះ លោកឧបនាយករដ្ឋមន្រ្តី ប្រាក់ សុខុន បានសម្តែងការអបអរសាទរដល់និស្សិតកម្ពុជា ដែលបានប្រឡងនិងមានសមត្ថភាពគ្រប់គ្រាន់ ដើម្បីទទួលអាហារូបករណ៍ទៅសិក្សានៅប្រទេសអូស្រ្តាលី និងណូវែលហ្សេឡង់។
លោកឧបនាយករដ្ឋមន្ត្រីក៏បានផ្តាំផ្ញើដល់ក្រុមនិស្សិតកម្ពុជាដែលទៅសិក្សានៅក្រៅប្រទេស គឺ៖
ទី១. អំពីការត្រៀមលក្ខណៈមុននិងទៅសិក្សានៅប្រទេសអូស្រ្តាលី និងណូវែលហ្សេឡង់ ចេះស្វែងយល់ពីអាកាសធាតុ របៀបរបបរស់នៅ និងប្រពៃណីទំនៀមទម្លាប់របស់ប្រទេសគេ ក៏ដូចជាភាសា។
ទី២. ពេលទៅដល់ធ្វើយ៉ាងណាត្រូវខិតខំសិក្សារៀនសូត្រ ទទួលទាំងចំណេះដឹង និងចំណេះធ្វើ ក៏ដូចជាបទពិសោធន៍ល្អៗ ដែលប្រទេសគេមាន ដើម្បីនាំយកមកបម្រើប្រទេសជាតិយើងវិញ និងចេះគ្រប់គ្រងខ្លួនឯងឲ្យបានល្អ។
ទី៣. និស្សិតដែលទៅរៀននៅបរទេសត្រូវតាំងចិត្តខ្លួនឯងថាជាខ្មែរ ការប្រតិបត្តិខ្លួនឯងនៅក្រៅប្រទេស គឺដើរតួដូចជាឯកអគ្គរាជទូត ធ្វើយ៉ាងណារក្សាកិត្តិយសនិងកេរ្តិ៍ឈ្មោះជាតិខ្មែរ ផ្សព្វផ្សាយភាពរុងរឿងរបស់ខ្មែរ ទាំងវិស័យសេដ្ឋកិច្ច សង្គមកិច្ច ក៏ដូចជាវិស័យវប្បធម៌ និងវិស័យទេសចរណ៍ ជាពិសេសប្រាង្គប្រាសាទនានា៕