លោក ហ៊ុន ម៉ាណែត ប្រាប់បេក្ខជនប្រឡងនាយទាហានកុំចាញ់បោកអ្នករត់ការឲ្យជាប់
- 2019-12-23 02:20:47
- ចំនួនមតិ 0 | ចំនួនចែករំលែក 0
លោក ហ៊ុន ម៉ាណែត ប្រាប់បេក្ខជនប្រឡងនាយទាហានកុំចាញ់បោកអ្នករត់ការឲ្យជាប់
ចន្លោះមិនឃើញ
លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក អញ្ជើញបើកវិញ្ញាសារប្រឡងជ្រើសរើសនាយទាហាន នៃកងយោធពលខេមរភូមិន្ទ កាលពីថ្ងៃទី២២ ខែធ្នូ ឆ្នាំ២០១៩។ សម្រាប់មណ្ឌលប្រឡងនៅរាជធានីភ្នំពេញ គឺនៅវិទ្យាល័យបាក់ទូក។
លោកបានបញ្ជាក់ថា បេក្ខជនដាក់ពាក្យប្រឡងនាយទាហាន នៃកងយោធពលខេមរភូមិន្ទ មានចំនួន ៨០០០នាក់ ជ្រើសរើសយកចំនួន ៦២០នាក់ ។ លោកក៏បានអរគុណយុវជន យុវតី ដែលបានដាក់ពាក្យប្រឡងចូលនាយទាហានដើម្បីបម្រើជាតិ មាតុភូមិ។ ដើម្បីប្រឡងជាប់បេក្ខជនត្រូវខិតខំប្រឡងដោយខ្លួនឯង។
លោកបានបន្តថា គោលការណ៍របស់ក្រសួងការពារជាតិ អគ្គបញ្ជាការ គឺត្រូវធ្វើយ៉ាងណាឲ្យការប្រឡងជ្រើសរើសនាយទាហាន នៃកងយោធពលខេមរភូមិន្ទ ប្រព្រឹត្តទៅដោយត្រឹមត្រូវ មានតម្លាភាព និងយុត្តិធម៌។ អ្នកចេះ គឺជាប់ ហើយអ្នកជាប់ដោយមោទនភាពខ្លួនឯង។ កុំរកអ្នកជួយអន្តរាគមន៍ឲ្យប្រឡងជាប់ គឺអត់មានទេ។ ហើយបើមានអ្នកធានារត់ការឲ្យជាប់ត្រូវរាយការណ៍មក ដើម្បីចាត់វិធានការ ហើយកុំចាញ់បោកគេ (ពួកស៊ីឡាក់)។
សូមជម្រាបថា ការជ្រើសរើសនាយទាហាន នៃកងយោធពលខេមរភូមិន្ទ គឺមានវគ្គនាយទាហានសកម្មជំនាន់ទី២៤ វគ្គកងទ័ពជើងគោកជំនាន់ទី១២ និងវគ្គនាយទាហាមបច្ចេកទេស។
ការប្រឡងរបស់បេក្ខ ជននិងបេក្ខនារីប្រព្រឹត្តទៅតាមមណ្ឌលដែលគេបានដាក់ពាក្យប្រលង ក្នុងនោះរួមមាននៅរាជធានីភ្នំពេញ នៅវិទ្យាល័យបាក់ទូក, នៅយោធភូមិភាគ១ នៅវិទ្យាល័យហ៊ុនសែន ស្ទឹងត្រែង, នៅយោធភូមិភាគ២ នៅមជ្ឈ មណ្ឌលគរុកោសល្យភូមិភាគកំពង់ចាម, នៅយោធភូមិភាគ៣ នៅវិទ្យាល័យជាស៊ីមតាកែវ, នៅយោធភូមិភាគ៤ នៅវិទ្យាល័យអង្គរខេត្តសៀមរាប និងនៅយោធភូមិភាគ៥ នៅវិទ្យាល័យព្រះមុនីវង្សខេត្តបាត់ដំបង៕