មុខរបស់ ប៉ាវចិន ពិតជាខ្មៅញូញ និងមានព្រះចន្ទមួយចំណិតនៅលើថ្ងាសមែនឬទេ?

2020-01-06 01:06:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តុលាការមុខដែក ប៉ាវចិន (Bao Zheng) គឺមន្ត្រីមួយរូបនៅក្នុងជំនាន់រជ្ជកាលសុង ដែលមានភាពល្បីល្បាញខ្លាំងដោយសារតែការកាត់ក្ដីឥតលម្អៀងរបស់គាត់។ សាច់រឿងរបស់លោកត្រូវបានក្រុមទូរទស្សន៍យកមកថតជាភាពយន្តភាគ ហើយទទួលបានគាំទ្រយ៉ាងខ្លាំងពីសំណាក់អ្នកទស្សនា។ ភាពយន្តដំបូងបង្អស់ថតដោយក្រុមហ៊ុនទូរទស្សន៍តៃវ៉ាន់ Chinese Television System Inc. នៅឆ្នាំ១៩៧៤ ដោយដំបូងឡើយគ្រោងថតតែ៣០ភាគប៉ុណ្ណោះ តែត្រូវបានពន្លាតរហូតដល់ ៣៥០ភាគឯណោះ ព្រោះមានការគាំទ្រច្រើន។ ក្រោយមកៗទៀត ក៏មានការថតសាជាថ្មីជាហូរហែនៅឆ្នាំ១៩៨៧ ១៩៩៣ ២០០៣ ២០០៨ និងចុងក្រោយនៅឆ្នាំ២០១០។

អ្វីដែលយើងតែងកត់សម្គាល់ចំពោះតួអង្គរបស់ ប៉ាវចិន គឺថាលោកមានមុខខ្មៅងងឹតខ្លាំង ហើយនៅចំកណ្ដាលថ្ងាសមានរូបព្រះចន្ទមួយចំណិតថែមទៀតផង។ តើតុលាការមុខដែករូបនេះពិតជាមានមុខខ្មៅញូញ និងព្រះចន្ទនៅចំថ្ងាសប្រាកដដែរឬទេ?

តួអង្គសម្ដែងនៅក្នុងខ្សែភាពយន្ត

ចម្លើយយ៉ាងខ្លីគឺថា "ទេ"។ លោកម្ចាស់ ប៉ាវ គឺជាមនុស្សដែលសម្បុរ ស មិនដូចការតុបតែងឲ្យខ្មៅងងឹតដូចនៅក្នុងរឿងភាគនោះឡើយ។ យោងតាមកំណត់ត្រាប្រវត្តិសាស្ត្រក្នុងសៀវភៅ Luzhou លោកម្ចាស់ ប៉ាវ មានរូបរាងសាមញ្ញ តែថ្លៃថ្នូរ ហើយលោកមានពុកចង្កាពណ៌ ស។ ចំណែកឯរូបព្រះចន្ទមួយចំណិតនៅចំកណ្ដាលថ្ងាសរបស់លោកក៏ជារឿងប្រឌិតផងដែរ។ បើតាមពិតទៅ ការបន្ថែមរូបព្រះចន្ទមួយចំណិតនេះដោយសារខាងភាពយន្តចង់បង្ហាញអំពីភាពអង់អាចត្រឹមត្រូវឥតល្អៀងរបស់លោក។ ពន្លឺព្រះចន្ទប្រៀបប្រដូចនឹងការចាប់កំណើតរបស់លោកម្ចាស់់ ប៉ាវ នៅទីកន្លែងដែលពោរពេញទៅដោយភាពខ្មៅងងឹតអ៊ីចឹង។

សូមបញ្ជាក់ថា លោកម្ចាស់ ប៉ាវ កើតនៅថ្ងៃទី១១ ខែមេសា ឆ្នាំ៩៩៩ ក្នុងស្រុក Hefei ខេត្ត Anhui ប្រទេសចិន។ លោកបានទទួលមរណភាពនៅថ្ងៃទី២០ ខែឧសភា ឆ្នាំ១០៦២ ក្នុងវ័យ៦២ឆ្នាំ។ មុនស្លាប់ លោកម្ចាស់ ប៉ាវចិន បានបន្សល់ទុកបណ្ដាំមួយទៅកាន់ក្រុមគ្រួសាររបស់លោកថា៖ "កូនចៅជំនាន់ក្រោយរបស់ខ្ញុំមួយណាក៏ដោយឲ្យតែប្រព្រឹត្តអំពើពុករលួយក្នុងនាមជាមន្ត្រី នឹងមិនត្រូវអនុញ្ញាតឲ្យឈានជើងចូលក្នុងផ្ទះ ឬបញ្ចុះសពនៅផ្នូរដូនតាឡើយ។ នរណាដែលមិនគោរពតាមបណ្ដាំរបស់ខ្ញុំគឺមិនជាកូនចៅរបស់ខ្ញុំនោះទេ"៕

ប្រភព៖ The Epoch Times | People Pill ប្រែសម្រួល៖ ឈាង.