មនុស្ស​ជាង ២ម៉ឺននាក់ ត្រូវបានចាប់ខ្លួន និងថ្នាំញៀនជាង ៧២០គីឡូក្រាម ត្រូវបានដកហូត រួម​ទាំង​វត្ថុតាងផ្សេងទៀត នៅក្នុងប្រតិបត្តិការបង្ក្រាបគ្រឿងញៀនរយៈពេលមួយឆ្នាំក្នុងឆ្នាំ២០១៩។

យោង​តាមរបាយការណ៍របស់មន្ទីរប្រឆាំងគ្រឿងញៀន នៃក្រសួងមហាផ្ទៃបានបង្ហាញថា លទ្ធផល​អនុវត្តន៍​ច្បាប់​ពីថ្ងៃទី១ ខែមករា ដល់ថ្ងៃទី៣១ ខែធ្នូ ឆ្នាំ២០១៩ បង្ក្រាបបានសរុប ៩៥៧២ករណី។ ឃាត់​មនុស្សចំនួន ២០១១៣នាក់ ស្រី ១៣២៥នាក់ (ជនបរទេស ៤០១នាក់ ស្រី ៦៤នាក់ មាន ១២សញ្ជាតិ)។

របាយការណ៍ដដែលបន្តថា ករណីជួញដូរ រក្សាទុក​កែច្នៃចាត់ចែង និង​ដាំដុះ ៥៧០៥ករណី ឃាត់ ១០៩៥០នាក់ (ស្រី ៨៨៨នាក់)។ ករណីប្រើប្រាស់ ៣៨៦៧ករណី ឃាត់ ៩១៦៣នាក់ (ស្រី ៤៣៧នាក់)។ អនុវត្ដន៍ដីកា៖ ៣២៩ករណី ឃាត់ ៣២៤នាក់ (ស្រី ១១នាក់) ។

របាយការណ៍បានបញ្ជាក់ថា ដកហូតសារធាតុញៀនគ្រប់ប្រភេទចំនួន​ជាង ៧២០គីឡូ និង ៩១៣​កញ្ចប់តូច។ កញ្ឆាក្រៀមចំនួន​ជាង ៩៩គីឡូ និង ៩៤៤៤១ដើម។ សម្ភារៈចាប់យកមាន រថយន្ដ ៦៤​គ្រឿង ម៉ូតូ ២២៥២គ្រឿង ទូរស័ព្ទ ៥៨៧៨គ្រឿង ជញ្ជីង ៣២៩គ្រឿង អាវុធខ្លី ៦ដើម អាវុធវែង ១០ដើម។ ចលន និងអចលនៈទ្រព្យ ស្នើ​សុំបង្កក ចំនួន ២កន្លែង (ដីឡូត៍ ២កន្លែង) និងផ្ទះល្វែង ១កន្លែង៕