ផ្លូវកាត់ថ្មីពីបាត់ដំបង ទៅកោះកុង ប្រវែងជិត ២០០គីឡូម៉ែត្រ ត្រូវបានបើកការដ្ឋានសាងសង់
- 2020-03-10 04:02:46
- ចំនួនមតិ 0 | ចំនួនចែករំលែក 0
ផ្លូវកាត់ថ្មីពីបាត់ដំបង ទៅកោះកុង ប្រវែងជិត ២០០គីឡូម៉ែត្រ ត្រូវបានបើកការដ្ឋានសាងសង់
ចន្លោះមិនឃើញ
រាជរដ្ឋាភិបាលកម្ពុជា បានធ្វើពិធីបើកការដ្ឋានសាងសង់ផ្លូវជាតិលេខ១០ ដែលជាផ្លូវកាត់ថ្មីពីខេត្តបាត់ដំបង ទៅកោះកុង កាលពីថ្ងៃទី៩ ខែមីនា ឆ្នាំ២០២០។
គម្រោងសាងសង់ផ្លូវជាតិលេខ១០ មានប្រវែងសរុបចំនួន ១៩៨,៧១គីឡូម៉ែត្រ តភ្ជាប់ពីសំឡូត- វាលវែង-អូរសោម ដល់កោះកុង នឹងត្រូវសាងសង់ស្របតាមបទដ្ឋានបច្ចេកទេសកម្រិត៣ របស់សាធារណរដ្ឋប្រជាមានិតចិន មានទទឹងតួផ្លូវសរុបចំនួន៩ម៉ែត្រ ជាប្រភេទផ្លូវចាក់បេតុងកៅស៊ូ (AC) ព្រមទាំងមានបំពាក់ផ្លាកសញ្ញាចរាចរណ៍ គំនូសចរាចរណ៍ បង្គោលគីឡូម៉ែត្រ និងបង្គោលសុវត្ថិភាពផងដែរ។ គម្រោងនេះ មានការសាងសង់ស្ពានចំនួន ៣៣កន្លែងប្រវែងសរុប ២៣៦១ម៉ែត្រ ក្នុងនោះ មានស្ពានអាតៃប្រវែង ៥១២ម៉ែត្រ និងកម្ពស់ដល់ ៧៥ម៉ែត្រ ដែលជាស្ពានខ្ពស់ជាងគេបំផុតនៅកម្ពុជា។
គម្រោងនេះ ចំណាយថវិកាសរុបប្រមាណ ១៨៨,៣៨លានដុល្លារ ដែលជាហិរញ្ញប្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ សាងសង់ដោយក្រុមហ៊ុនសាជីវកម្មស្ពានថ្នល់ចិន ត្រួតពិនិត្យបច្ចេកទេសសាងសង់ដោយក្រុមហ៊ុនទីប្រឹក្សាបច្ចេកទេសក្វាងចូវ វ៉ានអាន និងគម្រោងចំណាយពេលសាងសង់ចំនួន ៤៨ខែ គិតចាប់ពីខែធ្នូ ឆ្នាំ២០១៩ ដល់ខែធ្នូ ឆ្នាំ២០២៣៕
អត្ថបទ និងរូបថត៖ ក្រសួងសាធារណការ និងដឹកជញ្ជូន