អនុក្រឹត្យថ្មី! បើកឡានបែបនេះ នឹងធ្វើឱ្យអ្នកអស់លុយពី ១៥ម៉ឺន ទៅ ៣០ម៉ឺនរៀល ដោយមិនដឹងខ្លួន

2020-03-19 07:10:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យោងតាមអនុក្រឹត្យថ្មីចុះហត្ថលេខាដោយសម្តេច ហ៊ុន សែន កាលពីថ្ងៃទី១៧ ខែមីនា ឆ្នាំ២០២០ មាត្រា ៧ថ្មី បង្ហាញថា អ្នកបើកយានយន្តធុនស្រាល នឹងត្រូវពិន័យជាទឹកប្រាក់ចំនួន ១៥ម៉ឺនរៀល និង ៣០ម៉ឺនរៀល សម្រាប់អ្នកបើកបរយានយន្តធុនធ្ងន់ ក្នុងករណីប្រព្រឹត្តអំពើល្មើសដូចខាងក្រោម៖

១. បើកបរបង្ហោះ រេចុះឡើង ឆាបឬគៀរ។

២. បើកបរបញ្ចេញសំឡេងម៉ាស៊ីនខ្លាំង ឬផ្សែងច្រើន ខុសពីបទដ្ឋានបច្ចេកទេស។

៣. បើកបរយានយន្តផ្ទាល់ខ្លួនដោយគ្មានលិខិតអនុញ្ញាតធ្វើអាជីវកម្ម ឬប្រើលិខិតធ្វើអាជីវកម្មហួសសុពលភាព។

៤. បើកបរមិនគោរពលក្ខខណ្ឌសុខភាព ដែលតម្រូវឱ្យពាក់វ៉ែនតា។

៥. បើកបរខុសទិសចរាចរណ៍ ឬបើកបរជាន់គំនូសបង្ហូតកណ្តាលទ្រូងផ្លូវ។

៦. បើកបរលើសល្បឿនកំណត់ចាប់ពី ២០ ទៅ ២៩ គីឡូម៉ែត្រក្នុងមួយម៉ោង។

៧. បើកបរល្មើសនឹងការជៀស ការបត់ និងការជែង។

៨. បើកបរល្មើសនឹងសិទ្ធិអាទិភាពផ្លូវប្រសព្វ។

៩. ប្រើភ្លើងហ្វាកូត ឬភ្លើងសញ្ញាប្តូរទិសនៃយានមិនត្រឹមត្រូវ ត្រូវកែច្នៃភ្លើងខុសបទដ្ឋានបច្ចេកទេស។

១០. បើកបរដោយគ្មាន ឬមិនដំណើរការភ្លើងហ្វាកូត ភ្លើងសញ្ញាប្តូរទិស ភ្លើងហ្វ្រាំង ភ្លើងទីតាំងខាងមុខរថយន្ត និងភ្លើងក្រហមខាងក្រោយរថយន្ត។

១១. បើកបរមិនគោរពភ្លើងសញ្ញាចរាចរណ៍ពណ៌ក្រហម ឬក្រហមភ្លឹបភ្លែតៗ។

១២. បើកបរមិនគោរពផ្លាកសញ្ញាហាមឃាត់ ឬផ្លាកសញ្ញាបញ្ជា ឬផ្លាកសញ្ញាសិទ្ធិអាទិភាព ឬគំនូសសញ្ញាសម្រាប់ថ្មើរជើងឆ្លងកាត់។

១៣. បើកបរប្រើប្រាស់សំបកកង់សឹកលើសកម្រិតកំណត់ ឬរហែក ឬប្រេះ ឬប៉ោង។

១៤. បើកបរមិនគោរពសញ្ញាបញ្ជាចរាចរណ៍របស់មន្រ្តីនគរបាលចរាចរណ៍។

១៥. បើកបរផ្ទុកទំនិញល្មើសនឹងចំណុចទី១ ទី២ ទី៣ ទី៤ ទី៥ មាត្រា៥៦ នៃច្បាប់ស្តីពីចរាចរណ៍ផ្លូវគោក។

១៦. បើកបររថយន្តធុនធ្ងន់ដែលគ្មានរនាំងសុវត្ថិភាព ឬមានរនាំងសុវត្ថិភាពមិនត្រឹមត្រូវតាមតួរថយន្តខាងក្រោម ឬគ្មានគន្លឹះសុវត្ថិភាពសម្រាប់ភ្ជាប់កុងតៃន័រ ឬមានគន្លឹះសុវត្ថិភាពសម្រាប់ភ្ជាប់កុងតៃន័រមិនគ្រប់គ្រាន់ ឬគន្លឹះសុវត្ថិភាពសម្រាប់ភ្ជាប់កុងតៃន័រមិនដំណើរការ៕

ដកស្រង់ចេញពីអនុក្រឹត្យ ស្តីពី ការកែសម្រួលអនុក្រឹត្យលេខ៤៤ អនក្រ.បក ចុះថ្ងៃទី២១ ខែមីនា ឆ្នាំ២០១៧ ស្តីពីការពិន័យអន្តរការណ៍ចំពោះអំពើល្មើសនឹងច្បាប់ចរាចរណ៍ផ្លូវគោក