កម្ពុជា ទទួលបានមូលនិធិចិន សម្រាប់ប្រឆាំងកូវីដ១៩
- 2020-04-03 04:33:43
- ចំនួនមតិ 0 | ចំនួនចែករំលែក 0
កម្ពុជា ទទួលបានមូលនិធិចិន សម្រាប់ប្រឆាំងកូវីដ១៩
ចន្លោះមិនឃើញ
មូលនិធិចិនដើម្បីសន្តិភាព និងការអភិវឌ្ឍ បានប្រគល់ជំនួយឧបត្ថម្ភក្រោមលក្ខខណ្ឌអង្គការសង្គមស៊ីវិល សម្រាប់ការពារសុខភាពប្រឆាំងនឹងជំងឺកូវីដ ១៩ (Covid-19) ក្រោមអធិបតីភាពលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោកវ៉ង វិនធាន ឯកអគ្គរដ្ឋទូតចិនប្រចាំកម្ពុជា។ ការប្រគល់ជំនួយនេះធ្វើឡើង នៅថ្ងៃទី៣ ខែមេសា ឆ្នាំ២០២០ នៅទីស្តីការគណៈរដ្ឋមន្ត្រី។
លោក ប្រាក់ សុខុន បានថ្លែងថា បរិក្ខាពេទ្យដែលជាអំណោយរបស់មូលនិធិចិនដើម្បីសន្តិភាព និងការអភិវឌ្ឍ រួមមាន ម៉ាស់ អាវការពារខ្លួន និងថ្នាំបុរាណចិន ដែលមានតម្លៃ ១លាន ១សែន ៣ម៉ឺនយ័ន្ត មានសារៈសំខាន់ខ្លាំងចំពោះកម្ពុជា ខណៈពេលដែលយើងកំពុងត្រូវការសម្ភារៈបរិក្ខាពេទ្យទាំងនោះ ដើម្បីប្រយុទ្ធប្រយុទ្ធនឹងការរីករាលដាល នៃជំងឺកូវីដ ១៩។ កាយវិការដ៏សម្បុរសនេះឆ្លុះបញ្ចាំងយ៉ាងច្បាស់ពីចំណងមិត្តភាពរវាងប្រទេស និងប្រជាជនទាំងពីរ។
ក្នុងជំនួបជាមួយ លោកវ៉ង វិនធាន ឯកអគ្គរដ្ឋទូតចិនប្រចាំកម្ពុជា ក៏បានរម្លឹកពីការបង្ហាញកាយវិការជាការគាំទ្រ និងជាសាមគ្គីភាពដែលសម្តេច ហ៊ុន សែន បានបង្ហាញនៅក្នុងការអញ្ជើញទៅបំពេញទៅទស្សនកិច្ចការងារនៅទីក្រុងប៉េកាំង ស្របពេលដែលប្រទេសចិនកំពុងប្រយុទ្ធយ៉ាងពេញទំហឹងប្រឆាំងនឹងជំងឺកូវីដ ១៩ ដែលនេះបង្ហាញពីការគាំទ្រ និងការលើកទឹកចិត្តពីសំណាក់ថ្នាក់ដឹកនាំកម្ពុជាជូនចំពោះថ្នាក់ដឹកនាំក៏ដូចជាជូនចំពោះប្រជាជនចិនទាំងមូលផងដែរ។
ប្រមុខការទូតកម្ពុជាបានបញ្ជាក់ថា “ក្នុងអំឡុងពេលនៃការផ្ទុះឡើង នៃជំងឺដ៏សាហាវនេះ នៅប្រទេសកម្ពុជាក៏បានទទួលជំនួយជាច្រើនផងដែរពីរដ្ឋាភិបាលចិន ក្រុមអ្នកជំនាញវិទ្យាសាស្ត្រចំនួន ៧រូប ត្រូវបានបញ្ជូនពីតំបន់ស្វយ័តក្វាងស៊ី មកដល់ទទីក្រុងភ្នំពេញកាលពីថ្ងៃទី២៣ ខែមីនា កន្លងទៅនេះ រួមជាមួយនិងសម្ភារៈបរិក្ខាសម្រាប់ការពារនិងទប់ស្កាត់ការឆ្លងរាលដាលនៃជំងឺកូវីដ ១៩ ដែលមានតម្លៃជាង ៣លានយ័ន្ត។ កាលពីថ្ងៃទី០១ ខែមេសា កងទ័ពរំដោះប្រជាជនចិន ក៏បានបញ្ជូនបរិក្ខាពេទ្យទម្ងន់ជាងពីរតោនមកជូនកម្ពុជាសម្រាប់ការពារប្រឆាំងនឹងជំងឺកូវីដ ១៩ នេះដែរ។ ក្រុមហ៊ុនចិនមួយចំនួនក៏បានចូលរួមផ្តល់បរិក្ខាការពារដល់់ប្រជាជនយើងផងដែរ។
ប្រមុខការទូតកម្ពុជា ក៏បានទទួលព័ត៍មានថា អង្គការសង្គ្រោះមេឃពណ៌ខៀវ ត្រៀមបញ្ជូនក្រុមគ្រូពេទ្យស័្មគ្រចំនួន ១៣រូប ដែលមានបទិសោធន៍យ៉ាងជ្រាលជ្រៅក្នុងការប្រយុទ្ធប្រឆាំងនឹងជំងឺកូវីដ ១៩ នៅចិន រួមជាមួយបរិក្ខាពេទ្យ និងថ្នាំព្យាបាលជំងឺតម្លៃ ១លានយ័ន្តថែមទៀត ដែលគ្រោងធ្វើដំណើរតាមរថយន្តពីខេត្តយូណានចូលមកកម្ពុជាតាមច្រកខេត្តស្ទឹងត្រែង ក្នុងពេលឆាប់ៗខាងមុខ ដើម្បីជួយកម្ពុជាកំចាត់ជំងឺកូវីដ ក្នុងរយៈពេលប្រមាណ១៥ថ្ងៃ”។
លោកឧបនាយករដ្ឋមន្ត្រី ប្រាក់ សុខុន បានបន្តថា នៅពេលនេះចិនក៏បានក្លាយជាប្រទេសឈានមុខគេ ក្នុងការប្រយុទ្ធប្រឆាំងក្នុងការឆ្លងរាតត្បាតជំងឺកូវីដ ១៩ នៅទូទាំងពិភពលោកផងងដែរ ដែលបានផ្តល់ជំនួយដល់ប្រទេសជាង ៨០។ ប្រទេសចិនច្បាស់ជាងើបឡើងវិញយ៉ាងរឹងមាំខ្លាំងក្លាចេញពីវិបត្តិនៃជំងឺរាតត្បាតនេះ ដែលធ្វើឲ្យប៉ះពាល់យ៉ាងខ្លាំងក្លាដល់ជីវភាពរស់នៅនិងសកម្មភាពសេដ្ឋកិច្ចនៅជុំវិញពិភពលោក៕